Ndwen 7 ngoenz 16, guekgya cujsiz Siz Ginbingz fak saenq cukhoh Aen Hoih Seiqgyaiq Yizcanj Gaiq Daih 44.

Siz Ginbingz ceijok, seiqgyaiq vwnzva caeuq swhyienz yizcanj dwg gij cingzcik youqgaenj vunzloih vwnzmingz hwngfat caeuq swhyienz hwngfat baenaj, hix dwg gij caidij youqgaenj coicaenh vwnzmingz mbouj doengz doxgyau doxhag. Baujhoh ndei、swnjcienz ndei、yungh ndei doenghgij caizfouq dijbauj neix, dwg gij cwzyin caezcaemh raeuz, dwg gij iugouz bietdingh aeu vunzloih vwnzmingz laebdaeb caeuq seiqgyaiq ndaej laebdaeb hwngfat.

Siz Ginbingz giengzdiuh, Cungguek hengzguh gij leixniemh hwngfat moq, ciuq gij cingsaenz doiq lizsij fucwz、doiq beksingq fucwz, nyinhcaen hengz 《Aen Goeng’iek Baujhoh Seiqgyaiq Vwnzva Caeuq Swhyienz Yizcanj》, mboujduenh daezsang naengzlig caeuq suijbingz baujhoh yizcanj. Cungguek nyienh itheij caemh seiqgyaiq gak guek caeuq Lenzhozgoz Gyaugohvwnz Cujciz, gyagiengz doxgyau doxgap, doidoengh vwnzmingz doiqvah, coicaenh doxgyau doxhag, haeujcoengh saehnieb baujhoh seiqgyaiq yizcanj, caezcaemh henhoh ndei gij vwnzva dijbauj caeuq swhyienz dijbauj daengx vunzloih, doidoengh cauhlaeb aen minghyinh caezcaemh vunzloih.

Aen Hoih Seiqgyaiq Yizcanj Gaiq Daih 44 ngoenzhaenx youq Fuzgen Swngj Fuzcouh Si haimuq, aen hoih youz Lenzhozgoz Gyaugohvwnz Cujciz cawjbanh、Cungguek ciepbanh.

(Sinhvazse)