——Gij gangjvah youqgaenj Siz Ginbingz cungjsuhgi youq Aen Daihhoih Angqhoh Cunghgoz

Gungcanjdangj Laebbaenz 100 Hopbi, youq sevei gak gyaiq Guengjsae fanjyiengj hoenghhwd

——习近平总书记在庆祝中国共产党成立100周年大会上的重要讲话在广西社会各界引发热烈反响

□ Moz Beibei

7 nyied 1 hauh banhaet，Aen Daihhoih Angqhoh Cunghgoz Gungcanjdangj Laebbaenz 100 Hopbi youq Baekging Denh’anhmwnz Gvangjcangz hoenghhwd ciuhai，Cunghgung Cunghyangh cungjsuhgi、guekgya cujsiz、Cunghyangh Ginhveij cujsiz Siz Ginbingz gangj gij gangjvah youqgaenj. De giengzdiuh，ginggvaq daengx aendangj daengx guek gak cuz lwgminz laebdaeb haenqrengz buekguh，raeuz saedyienh le aen moegbiu buekguh bak bi daih’it，youq gwnznamh Cunghvaz cienzmienh laebbaenz le siujgangh sevei，gaijgez le gij vwndiz cieddoiq gungzhoj lizsij caengz guh baenz gvaq，cingq cingsaenz gvaekgvaek yamq coh aen moegbiu buekguh bak bi daihngeih cienzmienh laebbaenz aen guekak sevei cujyi yendaiva ndeu.

Gij gangjvah cungjsuhgi hawj Guengjsae gak cuz lwgminz lwedndat goenjfan，youq gyoengq ganbu ginzcung sevei gak gyaiq gih raeuz yinxfat fanjyiengj haenq.

Swcigih Yinzliz Swhyenz Sevei Baujcangdingh Swyez Danhvei Yinzsw Gvanjlijcu cucangj Cai Yimeiz naeuz，cungjsuhgi youq gwnz daihhoih giengzdiuh，gij goekrag Cunghgoz Gungcanjdangj youq lwgminz、gij lwed youq lwgminz、gij rengz youq lwgminz. De guh boux dangjyenz ganbu youq gwnz roen moq，yaek gaenxmaenx yangjying Dangjcunghyangh haucau，laebdaeb saedhengz aen fazcanj swhsiengj aeu lwgminz guh cungsim， aeu vih beksingq cimh leih cimh ik、 gej nanz gej you dangguh giz roengzfwngz caeuq giz roengzrengz youqgaenj gvendaengz gij gaijgwz yinzsw cidu saehnieb danhvei，hopheux gij vwndiz boux youq swyez danhvei guhhong gaenj guh、nanz guh、simyou、maqmuengh haenx，doenggvaq mboujduenh cauhmoq gij banhfap cwngcwz，saedguh ndei gak cungj hong yinx vunz、ganq vunz、ce vunz gvendaengz gyoengq swyez danhvei goenghai ciu vunz、an vihhong、gij vihhong cingj vunz guh daengj，caiq fugsaeh ndei daengx gih sam fanh lai aen swyez danhvei caeuq bak fanh lai boux youq ndaw swyez danhvei guhhong de，guhbaenz “dieggumz cwngcwz”， yinx engqlai vunzcaiz daeuj Guengjsae、fugsaeh Guengjsae，vih cauhlaeb aen Guengjsae gyaeundei sevei cujyi miz gij daegsaek Cungguek gunghawj gyoengq vunzcaiz baenzboengj.

Gvangjsih Baujhu Caeuq Yenzgiu Gij Sawgaeuq Saujsu Minzcuz Cungsim cujyin Veiz Yuzcu naeuz：“Cunghgoz Gungcanjdangj laemxsim guh gij saehnieb hungmbwk Cunghvaz Minzcuz，bak bi cingq dwg mwh hoenghhwdhwd. Seizneix gij sawgaeuq siujsoq gou yenzgiu minzcuz neix daj hainduj daengz seizneix cungj caengz rim hajcib bi，lij lumj laeq lwgnyez deq cij，engq aeu roengzrengz. Youq gwnz roen moq yenzgiu gij sawgaeuq siujsoq minzcuz，itdingh aeu fatyiengz gij cingsaenz hungmbwk laeb dangj，guh hong minzcuz aeu ndaetndaet hopheux diuz cawjsienq cukmaenh gij eiqsik caezcaemh Cunghvaz Minzcuz，genhciz ‘baujhoh youqgaenj、ciengjgouq daih’it、hableix leihyungh、gyagiengz guenjleix’ diuz gunghcoz fuengcim neix，cienzmienh guh ndei gij hong soucomz caeuq baujhoh gij sawgaeuq gak minzcuz，caemhcaiq gyalaeg yenzgiu，vih Guengjsae gyamaenh gya’gvangq gij makbaenz daengx guek minzcuz doxgiet baenaj sifangih daezhawj gij vwnzva camciuq.”

Fuzsuih Yen Cwnghez Diuyenz Caeuq Veijyenz Lenzlozveij cujyin Liengz Sinhyungj naeuz：“Gou aeu haeujlaeg hag gij cingsaenz cungjsuhgi daezok de——‘miz saeh hozunq doxyaeng， saeh vunzlai youz caezgya doxyaeng’，doicaenh hong cwnghez ietraez daengz gihcwngz，fazveih gij youhsi doxyaeng minzcuj yinzminz cwnghez，gietcomz gij dungxcaiz gak fueng，miz bouhloh bae cujciz veijyenz roengz gihcwngz，hopheux gij cwngcwz caeuq gij cungsim dangjveij cwngfuj guhhong， baujcang gij fuengyiengq deng.”

Bingzgoj Si Cozgyah Hezvei fucujsiz Yiz Ciz naeuz：“Gou dwg boux canghraiz youq gihcwngz ndeu，gag roxnyinh gij sawjmingh miznaj caeuq aenrap hungnaek. Baezlaeng，gou aeu gij cingsaenz gangjvah cungjsuhgi guh dazyinx，doxgiet daiqlingx daengx si boux guh hongvwnzyi，caeuq seizdaih caez bae、caeuq lwgminz caemh sim，haeuj gij saedceij ndawde bae、youq ndaw lwgminz roengz rag，gij ‘din、da、uk、bit’ cungj aeu doxhab hwnjdaeuj，gag rox gingz mbaw geiz、comz simvunz、ganq bouxmoq、hwngfat vwnzva、langhbaij yienghndei raeuz.”

Sihlinz Yen Nazlauz Nungzminz Vwnzyoz Cangcoz Hezvei veicangj、Sihlinz Yen Nazlauz Cin Mbanjnazlauz“Duzsuhgvanj Bouxguhnaz”bouxguenjleix Vangz Civeij cujciz vunzmbanj yawj daihhoih. Yawj sat le，de lij heuh vunzmbanj gangj、 sij gij gamjsouh okdaeuj. De naeuz：“Gou roxnyinh，aenvih Cunghgoz Gungcanjdangj haenqrengz buekguh，ndigah cij miz gij saedceij vuenyungz ngoenzneix，raeuz aeu insik gij vuenyungz daeuj ndaej mbouj yungzheih neix，geiqmaenh lizsij aendangj，ciengxlwenx riengz aendangj byaij! Gaenlaeng，gou yaek daiq ndei aen duivuj hezvei，roengzrengz raizok gij faenzcieng ndei cij hab gij iugouz seizdaih. Caemhcaiq，ganq engqlai bouxguhnaz sij faenzcieng，gujli gyoengqde lai yawj saw，lai hag gij gisuz gohyoz，okrengz hwngguh lajmbanj!”

Gvangjsih Minzcuz Dayoz hagseng Suh Danhnih naeuz：“Cungjsuhgi gangj，gyoengq bouxcoz Cungguek seizdaih moq aeu dawz aenrap saedyienh Cunghvaz Minzcuz fukhwng hungmbwk. Gou haeujlaeg hag gij lizsij aendangj le，roxnyinh seizdaih moq gij maqmuengh guekgya youq laeng bouxcoz. Doeklaeng，gou aeu hag ndei gij cihsiz，gij swhsiengj hix aeu riengz aendangj byaij，doiq swhgeij aeu yiemz，mboujduenh muzlienh swhgeij，roengzrengz baenz boux gungcanjdangjyenz miznaj ndeu.”

Ngoenzde，Gvangjsih Minzcuz Bause sojmiz vunz cungj doxcomz yawj le aen cigboq daihhoih. Caezgya simcingz gikdoengh fouzbeij，cungj naeuz mbouj miz Cunghgoz Gungcanjdangj lingjdauj，couh mbouj miz gij ndwenngoenz vuenyungz gak cuz lwgminz ngoenzneix. Dwg aendangj bang Bouxcuengh raeuz cauh Sawcuengh，hawj aen minzcuz raeuz miz gij saw dungjyiz. Doeklaeng aeu rox aencingz aendangj、dingq vah aendangj、riengz aendangj yamq bae，seizdaih moq aeu guh ndei gij hongsaeh sinhvwnz yizlun aendangj，okrengz cauhlaeb aen Guengjsae gyaeundei、saedyienh aen loqsiengj fukhwng.