Bohmeh Dahlingz rox gij saeh songde le, lau yienghneix roengzbae yingjyangj daengz gij roennaj dahlwg, gag youq ndaw ranz ndaq yaek dai yaek niu, naeuz dahlwg “dujva nyaenx oksaek, lij baek gong haexvaiz”, naeuz Daegniemh “goepsou mbouj gag rox, siengj gwn noh hanqmbwn”.

Bohlingz gienq Dahlingz naeuz:“Mwngz doeg daihhag ngamq ndaej deuz ok gungxrungh, wnggai caeuq Daegniemh duenh baedauq lo, sou mbouj doxdaengh ha. Caiq gangj sou lij dwg lauxbiuj, gobiuj nuengxbiuj doxaeu couh hawj vunz dawz bae guh goj gangj bw.”

Dahlingz naeuz:“Aeya, daxboh ha, maz nienzdaih lo lij gangj maz doxdaengh mbouj doxdaengh. Gou gyaez de lauxsaed simsoh, gaenxgyaek guhhong, de hix doiq gou ndei ha. Caiq gangj, dou mbouj dwg caen lauxbiuj, mbouj miz goetyiet nanaengq, dou ndaej eifap doxaeu bw.”

Raen Dahlingz mbouj dingq- gangj, Bohlingz heiq ndaej bwt yaek conh, Mehlingz hix doek raemxda naeuz:“Mwngz mbouj nem de duenh, gou couh dai hawj mwngz yawj……”

Dahlingz raemxda rihsoegsoeg, mbouj guh sing.

Bohmeh Dahlingz youh bae ra Daegniemh. Bohlingz naeuz:“Lan ha, nuengxbiuj mwngz ndaej doeg daihhag lo, vihliux gij roennaj de, mwngz couh gaej bae geuj de lo.”

Mehlingz hix ngaeq naeuz:“Mwngz couh cuengq gvaq dah nuengxbiuj mwngz ha! Gouz mwngz lo.”

Bohmeh Dahlingz gangj baenz byonghngoenz, raemh bae geij ruz vah, Daegniemh lij dwg bak haepmup mbouj w saek sing. Gizsaed de yaek siengj gangj naeuz:“Mbouj dwg gou bae geuj, song dou caensim doxndei, mieng doengzcaez caemh- ciuh.” Hoeng, de maz cungj mbouj gangj, caih gij vah neix oepnaeuh ndaw dungx. “Dah de dah youxnduj, guhlawz ndaej vit deuz, ndiep yaek dai yaek niu, vit deuz guhlawz suenq.”

Sawqmwh Mehlingz doq daej oksing doq naeuz:“Haiya, gou roengzgvih hawj mwngz lo, yienghneix ndaej loba?!” Gangj le de caen youq baihnaj Daegniemh gvih roengzdaeuj.

Aubiuj simjbiuj cungj guh daengz yienghneix lo, Daegniemh lij ndaej gangj maz dem? Couh yiengh- neix raemxda lwqoemq ngaek gyaeuj dedded han naeuz “cuengq gvaq dah nuengxbiuj” lo.

Miz ngoenz he Bohlingz dawz aen soujgih de daeuj hawj Daeg- niemh yawj gij mbawsiengq Dahlingz nem doengzhag bouxsai caez ingj, yaeuh naeuz:“Na, neix dwg daegyoux Dahlingz, songde gietdingh gvaq mboengq he dem couh dauqdaeuj raen dou lo!”

“A?” Dingq daengz aen siusik neix, Daegniemh doeksaet yat, de lumj loek gwn gaem meiq ndeu, roxnyinh soemjsatsat, youh lumj deng vunz aeu faexmbaenq moeb gyaeuj mbat ndeu, yaek mauhlaemx bae. De cien mbouj saenq fanh mbouj saenq, mbouj saenq Dahlingz nyaenx vaiq couh lumz de, bae gyaez daegmbauq wnq.

Daegniemh laebdaeb geij ngoenz dwk dienhvah bae hawj Dahlingz, cungj daj mbouj doeng. De duenh- dingh dwg Dahlingz daegdaengq gauj aen soujgih mbouj hawj de daj ndaej haeuj, de gaenq geij ndwen mbouj raen Dahlingz dwk saenqsik daeuj lo, De gig saetmuengh doeknaiq. “Nuengx bae riengz bouxwnq, cix mbouj lwnh saek coenz, duzroeg mbin haeuj ndoeng, duzbya duet roengz dah.” De ing gwnz mbonq, ngaiz mbouj gwn, din mbouj swiq, aeu fan denz moek gyaeuj moek rwz. Gvaq le geij ngoenz, de yotyak mbaw soujgihgaj okdaeuj vit bae, vuenh lingh aen hauhmax, gip buhvaq riengz doih bae baihrog dajgoeng lo.

Caiq gangj Dahlingz youq dayoz doegsaw, deng baij roengz lajmbanj bae hag guhhong buenq bi, giz de bae haenx caengz miz doengsaenq sezsih, soujgih daj mbouj doeng, caenh ndaej dawz daeuj guh aen cung yawj seizgan ndwi. “Dieg neix baenz dieg maz, najda mok mumjgyumq, seizgan byaij ndaej numh, gvaq ngoenz lumj gvaq bi. Haet muengh gemh cungj daemq, haemh muengh hoz cungj raez, gizneix diuzgen yaez, muengh deuz bae yoenggawq.”

Hag guhhong sat le, Dahlingz dauqma daengz hagdangz, sikhaek dwk dienhvah bae hawj Daegniemh, hoeng aen soujgih cix bauq naeuz:“Doiq mbouj gvaq, aen hauh mwngz daj neix dwg hauh hoengq!” Dahlingz sikhaek ngeix daengz dwg Daegniemh daengdaengq deuzndoj, gag nambed- bed naeuz:“Caemh dwg ndaem gohuq, mwngz yienghyuq nyaenx ngawz, nuengx ndaej ndei daengz gyawz, mwngz guhlawz nyaenx huk?”

Dahlingz daihhag bizyez le, ginggvaq sawmienh gaujsi、naj doiq naj gaujhaed, ndaej haeuj aen nungz- yez haifat gunghswh ndaw singz soujfuj bae guh boux gisuzyenz ndeu. De haeuj danvih ancap ndei le, couh daegdaengq caeu seizgan ganj ma Mbanjbya’ngeng ra Daegniemh. Ndij diuz roen fwzfwdfwd byaij haeuj mbanj bae, daengx aen mbanj cungj cingxliklik mbouj raen saek boux vunz, hix mbouj miz ma raeuq gaeq heuh, dan raen geij baiz ranz gaeuq vaihvadvad caengz doemqlak liux haenx lij daengjyuek gizde, dieghongh cungj maj rim gobodmonz、gogimz- gungq、go’nywjmong…… Cimhlaeng dauqma cam daxboh cij rox, laxlawz aen Mbanjbya’ngeng aenvih rin lai namh noix hoj guh gwn, ndaej cwngfuj anbaiz gaenq senj bae daengz baih ndoi lai namh biz ndei dajndaem caemhcaiq gyawj singz soujfuj bae lo. Dauqdaej bae mbanj lawz couh mbouj cingcuj lo.

Seiq

“Ngoenzneix caet nyied caet, gangj lauxsaed hozhaemz, vunz sau mbauq guhcaemz, gou gaen doih roengz mbanj……” Gyanghaet, youq gwnz ci roengz mbanj, Dahlingz gag singsaeq ngon fwen ngi’ngi. Siujliuz caeuq linghvaih geij boux ganbu fuzbinzban ndaw cin caemh naengh gwnz ci, gyoengqde mbouj dingq fwen gvenq, cungj mbouj roxyiuj saek coenz.

Dahlingz ngoenznaengz mbouj haeujdoih geijlai, mbouj gyaez hwnj- vangj youq gwnz QQ veihsin gangjgoj, hix mbouj youq ndaw “hoenggan” roxnaeuz “gienbaengzyoux” fat saek coenz vah gvaq. Vunzlai cungj mbouj rox ndaw hoz de ngeix maz lai, baeznaengz caenh raen de roengzrengz bae guhhong.

Ngoenzneix gyoengqde roengz mbanj camh daih’it dwg Mbanj- datsangj. Itloh haeuj mbanj bae, roensuijniz bingzlwdlwd gvangqyub- yub, song henz roen faex raemh va angj, roeg ciuz mbaj mbin, hoengheiq singjsien. Haeuj daengz ndaw mbanj, raen baenz baiz baenz baiz ranz dajcang ndaej moqsaksak, lij miz dieg dingz ci、dieg guhcaemz、dieg ndaem faex ndaem va、diengz yietliengz、daemz va’ngaeux…… Heiyu, dangh- naeuz mbouj miz ndaek rin loet bakmbanj gaek miz “Mbanjdatsangj” geij cih saw hung neix camz haeuj da daeuj, gyoengqde cungj laihnaeuz dwg haeuj aen gunghyenz lawz bae lo.

Dahlingz fwen yinx lo, de cuengq sing eu haenh naeuz:

“Gyoengq roeg heuhcaca,

Lengqlengq va hailangh,

Ngoenzneix Mbanjdatsangj,

Guh ndaej dangq biengzsien.”

Gyoengqde daengz bakdou cunh- veijvei roengz ci, boux ganbu ndaw mbanj ndeu ok bakdou daeuj ciepcoux. Siujliuz gaisau hawj caezgya roxnaj:“Boux neix dwg Datsangj Cunhveij Luz fucujyin……” Dahlingz baez yawj Luz fucujyin, cingqngamj Luz fucujyin hix yawj coh de, seiq ceh lwgda baez doxbungq, song boux cungj caez doeksaetyat bae, doengzseiz hemq hwnjdaeuj —— “Daegniemh!” “Dahlingz!”

“Sou song boux roxnaj?” Siujliuz caeuq gyoengqvunz raen aen ciengz- gingj neix cungj ngeixvaeg liux……

Doeklaeng, Dahlingz gig gaenx roengz mbanj, daegbied dwg Mbanj- datsangj, bae ndaej deih raixcaix, gij hong dungyenz boux gungzhoj cuengq ngaenz haeujguj, ndaej daengz aen cunhveij Daegniemh daihlig boiqhab caeuq bangcoengh, hix haiguh ndaej swnhleih dangqmaz. Ranz gungzhoj Mbanjdatsangj bouxboux cungj saenq ndaej gvaq cunhveij saenq ndaej gvaq gunghswh, doxcanj riengz guh. Bide satbyai, doengh ranz gungzhoj Mbanj- datsangj cienzbouh ndaej duetgungz lo.

Sou cai doeklaeng Dahlingz caeuq Daegniemh baenzlawz yiengh lo? Baenzbaenz gij goj songde lij youq gwnz roen daiq gyoengq lwgminz baenzmiz laebdaeb sij roengz bae.

（2 sat）