7 nyied 1 hauh gyanghaet 8 diemjcung，guek raeuz youq Baekging Denh’ anhmwnz Gvangjcangz haiguh Aen Daihhoih Angqhoh Cunghgoz Gungcanjdangj Laebbaenz 100 Hopbi. Gvangjsih gak cuz ganbu vunzlai foenfoen ngonzyawj gij cigboq daihhoih. Gij vah youqgaenj Siz Ginbingz cungjsuhgi gangj haenx yinx vunzlai gih raeuz lwnh dwk naemq raixcaix，gyoengqvunz gak dieg fanjyiengj hoenghhwd.

Bwzswz Si Minzcunghveij caemh cujciz daengx si minzcuz cunghgyau hidungj yawj daihhoih caemhcaiq nyinhcaen hag gij vah youqgaenj Siz Ginbingz cungjsuhgi. Daihgya nyinhnaeuz，aen Dangj- cunghyangh aeu Siz Ginbingz dungzci guh cehsim daj gyaeuj daengz rieng cungj dinghmaenh yawjnaek lwgminz，suenqveh aen canloz daihbuenz hawj Cunghvaz Minzcuz fukhwng hungmbwk. Daihgya yaek laebdaeb aeu aen Swhsiengj Sevei Cujyi Miz Gij Daegsaek Cunghgoz Seizdaih Moq Siz Ginbingz bae yinx roen，engq gaenjmaed doxgiet youq seiqhenz aen Dangjcunghyangh aeu Siz Ginbingz dungzci guh cehsim，guh ndei hong swhgeij，okrengz dawz guek raeuz cauhguh baenz aen guekak sevei cujyi yendaiva、saedyienh aen loqsiengj Cung- guek——Cunghvaz Minzcuz fuk- hwng hungmbwk.

（Veiz Dingz / 韦 婷）

Ngoenzde, Yungzsuij Myauzcuz Swciyen Yenveij Dungjcanbu cujciz vunzlai ndawyienh doxcaez yawj le gij cigboq aen daihhoih. “Gij vah Siz cungjsuhgi dwg gij senhyenz seizdaih，dou cungj roxnyinh gamj- doengh dangqmaz. Youz aendangj lingjdauj，dou aeu youq seizgeiz moq guh’ok cingzcik moq. Gij dungzci guh hong minzcuz cunghgyau engq aeu roengzrengz buekguh，guh- hoengh lajmbanj，fugsaeh vunzlai.” Vuz Cincuh boux fubucangj Yungz- suij Yenveij Dungjcanbu、boux- gizcangj Minzcunghgiz yienghneix naeuz.

Gyaj Fungyingh bouxganbu gaenq duiyouh haenx venj le aen“miznaj youq dangj 50 bi”geiqniemhcieng ngonzyawj le cig- boq. De naeuz：“Dingq le gij vah cungjsuhgi，gou roxnyinh gig miz- naj! Yienznaeuz gou laux lo hoeng swhsiengj mbouj laux bw，gou dwg gungcanjdangjyenz，yaek laebdaeb guh yienghndei，okrengz hwnqguh aen Mbanjmyauz doxgiet、doxhuz、baenzmiz、 vwnzmingz ndeu.”

（Cinz Cunghdwz / 陈忠德）

Gyoengqvunz aen dieg banggungz laeng Cungzcoj Si Dasinh Yen Sinhhingh Segih caeuxcaeux couh youq aen veiyisiz deq yawj cigboq lo.

Boux suhgi Sinhhingh Segih Dangj Cungjcihbu sim’angq naeuz：“Haxbaenh dingq le gij vah cungjsuhgi，seizneix aen sim gou lij diuq ndaej gig vaiq. Siz cungjsuhgi ngeuxyawj le bak bi lizsij aendangj，cungjgez caeuq daezok gij cingsaenz laebbaenz aendangj hungmbwk haenx. Seizdaih moq seizgeiz moq，yaekaeu guhsaed gij cingsaenz neix，caez sim comz rengz bae cienzmienh laebbaenz aen guekak sevei cujyi yendaiva. Gyoengq ganbu gihcwngz aeu dawz saeh vunzlai cuengq haeuj sim， yawjnaek gij leih’ik vunzlai，vih ginzcung guh saedsaeh，guh vunz cix aeu cingq、aeu seuqcingh. Gou yaek daiqlingx vunzlai segih ciengxlwenx riengz aendangj byaij，laeb ceiq mbouj baengh vunz, gag baengh fajfwngz cauh，doengzsim caez cauh ndwenngoenz ndei.”

（Nungz Siujfung / 农小凤）