It

Dahlingz youq aen nungzyez haifat gunghswh ndeu guhhong, gunghswh yaek baij de riengz Siujliuz Fuzbinzban ndaw cin roengz mbanj bae guh senhconz, dungyenz doengh ranzgungzhoj haenx ciemdingh “hab- doengz haeujguj”. Neix dwg aen hanghmoeg banggungz cwngfuj ndeu, hawj ranzgungzhoj lajmbanj lai ndaej miz diuz monzloh souhaeuj ndeu. Youz cin cwngfuj guh danbauj, moix ranz ranzgungzhoj coh yinzhangz daigvanj haj fanh maenz mbouj aeu leihsik cuengq hawj gunghswh haeuj- guj, ndwenndwen lingx faenhoengz. Gij hong neix laegyaek, dwgrengz hoj guh, hoeng Dahlingz cix mbouj yonjek saekdi, couh hanhak naeuz bae lo. De haeuj gunghswh daeuj geij bi neix, bouxdaeuz heuh guh maz couh guh maz, coengzlaiz mbouj euq gvaq, ngoenznaengz mbouj haengj haeujdoih guhcaemz, boux dog gag bae gag dauq. Gyoengq doengzsaeh raeblaeng naeuz de “gwnznaj ndi riunyumj, simgyoet lumj naehang, baez caeuq vunz dox- nyangz, yawj sang mbouj yawj daemq”.

Dahlingz bineix gaenq ndaej samcib lo, caengz haq. Vahsug naeuz “lwgsai hamj sam miz vunz cam, lwgmbwk hamj sam cix gvaqsauh”. Ciuq gij gangjfap gaeuqgeq, Dahlingz gaenq deng gvi haeuj loih “gvaqsauh” bae lo. Mbouj dwg mbouj miz vunz maij, mwngz yawj dah de, “byoem ndaem raez dab mbaq, fajnaj lumj gyaeqhau, aen bak dangq yinghdauz, vunz baenz sau miz yiengh”, gizlawz lumj dahsau “gvaqsauh”? Gaej gangj- naeuz nienzgeij de “geq” di, cix lij ciengz miz daegmbauq yaek iu de bae guhcaemz, hoeng de cungj mbouj han mbouj leix, cingq dwg——

Sim nyungqnyat baenz ndaij,

Naiqnueknuek gvaq ngoenz,

Dangq bouxvunz doek hoenz,

Coenz vah ndeu mbouj gangj.

Ndawhoz senq miz vunz,

Naeuz mbouj lumz mbouj ndek,

Seizneix gak giz dieg,

Dangq mbek aen simdaeuz.

Senq ndaej guhyoux gvaq,

Gyawz lij ngah bouxsai,

Ndawsim miz ronghhai,

Dai mbouj yawj ndaundeiq.

Bohmeh Dahlingz simgip lo, caenh lau de bienqbaenz “sau lw” bae, coi de cagaenj damzyoux, de mbouj guhsing. Hai, hoj guh lai lo, “feiz mbouj ndat daeuh ndat, bohmeh gat saihoz, seizneix ban bouxcoz, caen nyaphoz bouxlaux”.

Dahlingz youq ndaw gunghswh geij bi baenz le gisuz guzgan, de siengj caeuq daengx gyoengq doengzdoih caezrengz maeqfat aen hanghmoeg moq, yinxhaeuj gij ywfuk sikhab dangdieg ndaemganq, doigvangq daengz gak mbanj bae, hawj gyoengq vunz lajmbanj ndaej lai miz diuz roenloh duetgungz baenzfouq, mbouj caiq gvaq gij saedceij haemzhaemz hojhoj haenx. Couhdwg aenvih gij saedceij haemzhoj lajmbanj, bik ndaej daegyoux de laeglemx biekdeuz, haih ndaej de hwnzngoenz gvaqniemh.

Haeuj haemh, Dahlingz ing youq bak conghcueng, baez raq baez raq rumz ci haeujdaeuj fofo, gwnzmbwn ronghhai ngamq raen mbiengj he, lij miz mbiengj he mbouj rox youq gizlawz. Ndaundeiq vanq ndaej daengx mbwn deihyaenyaen, caeuq gwnz diegdeih gizgyae gizgyawj gij rongh- daeng baenz diemj baenz diemj haenx doxingj, lumj biengz gwnz biengz laj cungj caenh ronghrib mbin nei. Gij gingjsaek gyanghwnz neix geijlai maez vunz ha! Hoeng Dahlingz mbouj miz saekdi simgei bae haenh, aenvih simsaeh naekdumdum. Ngoenzcog dwg caet nyied cocaet, dwg ngoenz Daeglanghvaiz caeuq Dahdajdaemj bouxsien song boux miz cingz haenx ndaej dox raennaj. Hoeng Dahlingz cix gaenq lienzdaemh geij bi mbouj ndaej raen naj daegyoux de lo, couh lienz daeg de youq gizlawz hix mbouj rox.

Byonghhwnz lo, Dahlingz caengz raninz, de ngon fwen raix dungx raemxhaemz okdaeuj, singyaem iqetet lumj nyungz heuh, dan gag de bonjfaenh cij dingq ndaejnyi.

“Beix ha beix,

Seizneix youq gizlawz,

Geij bi ra mbouj dawz,

Nuengx cawzcawz doeknaiq.

Beix ha beix,

Mwhlawz ndaej dauq raen,

Mbouj ndaej nem guhcaemz,

Nuengx haemz saej yaek goenq……”

Ngeih

Dahlingz lumz mbouj ndaej daeg youxnduj de. Daeg de heuhguh Daegniemh, vunz Mbanjbya’ngeng, Dahlingz vunz Mbanjrunghhaz, song mbanj ngamq gek aen gemh ndeu. Songde seiznyez couh roxnaj, song ranz de dwg “caencik”, daj iq bouxlaux couh son Dahlingz heuh Daegniemh guh gobiuj, Daegniemh heuh Dahlingz guh nuengxbiuj. Hoeng songde ngoenznaengz cungj haengj cigsoh heuh coh. Yiemzgek daeuj gangj songde gizsaed mbouj dwg maz caen lauxbiuj, gij caencik song ranz neix dwg “nyinh” baenz. Dingqnyi banlaux gangj, doenghbaez ranz Dahlingz miz boux cojgux ndeu ndaej cibbet ngamq baenzvunz, couh deng dawz diuzgeng nienzmingh bae gap haq hawj goengcoj Daegniemh Mbanj- bya’ngeng. Byawz rox bide ndwenloeg caengz daengz ngoenzlaeuj, cojgux bae gvej haeux couh deng fat bagndat dai bae. Doeklaeng goengcoj Daegniemh couh aeu sau wnq guh yah. Ciuq gij fungsug gaeuq gizneix, aeu geng gvaq le, couhsuenq caengz coux haeuj ranz, dahsau couhdwg bawx ranz neix lo, “lix dwg bawx ranz gvan, dai dwg fangz ranz gvan”. Cojgux Dahlingz dai gvaq, goengcoj Daegniemh aeu sau wnq guh maex, suenq dwg aeu “yahngeih”, couh yienghneix, goeng- coj Daegniemh aeu nyinh song baih mehdaiq, ndigah daih lwg daih lan hix lai miz baih “lauxbiuj” ndeu. Ranz Dahlingz couhdwg baih “lauxbiuj” lai ndaej haenx, saehsaed mbouj miz saekdi goetyiet nanaengq.

Mwh lij youq ndaw yangh doeg cuhcungh, songde dwg doengzhag caemh ban, ceng mbouj geijlai aenaen singgeiz cungj guhdoih bae guhdoih dauq. Caen doekhaeuj coenz vah “mbauq sau ndaej doxcaeuq, caemh byaij mbouj dwgrengz” bae, daj giz gapngaroen song mbanj de bae daengz hagdangz ndaw yangh haj roek goengleix, songde baezbaez byaij cungj itloh miz gangj miz riu, daengx ndang soengswt, mbouj roxnyinh baeg saekdi.

Cuhcungh doeg sat le, Dahlingz caeuq Daegniemh cungj ndaej bae ndaw yienh doeg gauhcungh, caemh hagdangz mbouj caemh ban, haet- haemh cix haengj ndaej doxraen, ndaej ciengzseiz caez guhcaemz caez dwen hagsib. Youq yienhsingz liz ranz gyae’gyanggyang neix doegsaw, aen haggeiz mbouj ndaej dauqranz geij baez, ngoenzsinggeiz mbouj hwnj- dangz cungj dwg youq hagdangz gvaq. Mwhde song boux de cungj haengj ndaej guhdoih guhcaemz, daengz cawz yaek bizyez, hagsib gaenj lailai, miz ngoenz singgeizroek ndeu, Dahlingz iu Daegniemh bae gunghyenz youzyet, naeuz yaek cuengqsoeng saek ngoenz. Songde ndij diuz roen iq henz daemz bingzbaiz byaijyetyet, naengh laj golimz doengzcaez gangjgoj seb- seb…… Seizde Dahlingz fajnaj ndingfetfet, ndang reuxred maez vunz, daenj geu buhlienzgunz, gwnz laj lengjluplup. Daegniemh dinghdingh cimyawj de, ndawsim lumj aen vaengz laj dat raemxdiuqdan goenjloedloed mbouj dingz. Dah nuengxbiuj ngoenz- neix lengj lai ha, de caen siengj umj gvaqbae cup fajnaj de mbat ndeu! “Hei, mbouj ndaej yienghneix guh, song dou cungj lij oiq, cungj lij doegsaw, mbouj ndaej doeng ngeix sae naemj!” Daegniemh fwtfwh gag rox daezsingj bonjfaenh. Hoeng Daeg- niemh lij dwg nyaenx mbouj ndaej, hag gij yiengh bouxlaux eufwen naeuz:

“Nuengx ndaw suen miz mak,

Go cup bak hozhaenz,

Siengj mbit gwn saek aen,

Lau vunz raen mbouj haengj.”

Nyi daengz gij fwen lwgmbauq cingz naeklaeg, daegdaengq daeuq sim sau neix, Dahlingz nyaenq dwk naj cix nding, ndawsim angqfwngfwng. De veq naj gvaq lingh mbiengj bae haujlai nanz le cij guh hot fwen ndeu hoiz gvaqdaeuj:

“Byawz siengj gwn couh gwn,

Mbouj miz vunz daeuj ndaq,

Suenmak cungj mbouj cah,

Beix ngah couh duengh aeu.”

Song boux de couh yienghneix, mwngz naemj dwk uk yaek mboek eu baenz hot fwen, gou nganh ndaej yaek daimingh cij dap hot fwen, yungh cingz laeg lai, cungj lumzlangh bonjfaenh lij dwg youq ndaw hag doegsaw, caen lumj doiq mbauqsau ndeu daeuj faengz hawfwen guhyoux.

“A—— Ngwz, miz ngwz!” Sawq- mwh Dahlingz sing sang swenjvak coemj coh Daegniemh. Daegniemh fwt deng Dahlingz got ndaej ndaet- ndwtndwt, doeksaet dwk ndang cungj gyaengj liux, roxnyinh daengz aen sim Dahlingz cingq diuqbubbub, aen ndang daenj geu buhvunj mbangfid haenx youh unq youh raeuj, de lumj bungq deng dienh nei daengx ndang mazlwdlwd, yaek doengh cix doengh mbouj ndaej. Seizneix daengngoenz laeglemx ndonj haeuj laeng fwj bae, ingj ndaej gij gvaengz henz fwj lumj nyumx hwnj sok ndingfwdfwd ndeu, rumz hix mbouj rox mwhlawz dingz lo, mbawfaex mbouj ning mbouj doengh……

Sam

“Rizcawz lumj raemx lae, ndwenngoenz baeyetyet, cungj mbouj dingz mbouj yiet, yaepyet youh gvaq bi.” Baez yaep da sam bi gvaqbae, Dahlingz gauj hwnj le Vazcungh Nungzyez Dayoz, Daegniemh cix doekbuengj dauqma ndaw rungh riengz boh de guh hongnazreih.

Dahlingz bae doeg daihhag le, Daegniemh ndawsim roxnyinh hoengqvangvang, lumj deng doek maz doxgaiq nei. “Roegnyanh mbin ndaej sang, ga raez nanz buet cimh, byaleix saet roengz dingh, fwngz dinj yeu mbouj daengz.” Dahlingz fat saenqsik hawj Daegniemh cix naeuz:“Langh gou ndaej baenz ndei, gyaez mwngz sim mbouj bienq, langh gou doek minghcienh, hix cienq bae gaen mwngz”. Song boux de “mbouj gek song sam ngoenz, youh doxdoeng dienhvah, nyi sing dangq raennaj, coenzvah vansisi. Saeh nyapnyuk hix gangj, saeh sim’angq hix naeuz, nyi sing lumj raen ngaeuz, doq naeuz doq diemzsub”.（1）