（ciep banj daihsam）

Gwnz roen moq, raeuz itdingh yaengxsang mbawgeiz doxhuz、hwngfat、doxgap、caemhhingz, hengzguh gij cwngcwz vaigyauh doxhuz gaglaeb gag guh cawj, genhciz byaij diuzroen hwngfat doxhuz, doidoengh hwnjguh gij gvanhaeh gozci yienghmoq, doidoengh cauhlaeb aen minghyinh caezcaemh vunzloih, doidoengh doxcaez hwnjguh “rangh ndeu loh ndeu” hwngfat youh ndei youh vaiq, yungh Cunghgoz hwngfat moq gung seizgei moq hawj seiqgyaiq. Cunghgoz Gungcanjdangj yaek laebdaeb doxcaez caeuq sojmiz guekgya caeuq beksingq gyaez doxhuz haenx, fatyiengz gij gyaciz caezcaemh daengx vunzloih doxhuz、hwngfat、goengbingz、leixcingq、minzcuj、swyouz, genhciz doxgap、mbouj guh doiqdingj、genhciz hailangh、mbouj guh fungsaek、genhciz doxleih caez ndaej、mbouj doxdawz doxbuek, fanjdui bagenz cujyi caeuq giengzgienz cwngci, doidoengh loekci lizsij coh moegbiu ronghsag baenaj!

Cunghgoz beksingq dwg beksing dizcang leixcingq、mbouj lau yakrwix, Cunghvaz Minzcuz dwg gij minzcuz rox minzcuz miznaj caeuq miz sim gagsaenq. Cunghgoz beksingq coengzlaiz mbouj hangz、apbik、dangq hoiq sawj gvaq beksingq guekgya wnq, doenghbaez mbouj miz, seizneix mbouj miz, daengzcog hix mbouj miz. Doengzseiz, Cunghgoz beksingq hix mbouj dapwngq saek loh seiqlig baihrog hangz、apbik、dangq hoiq sawj raeuz, bouxlawz naemj baenzneix guh, itdingh youq baihnaj cangzcwngz gangdiet 14 ik lai Cunghgoz beksingq yungh lwed noh guh baenz haenx bungq dwk gyaeuj dek lwed lae!

——Hag’aeu lizsij、 haicauh daengzcog, itdingh guh doxdaeuq hungmbwk miz haujlai lizsij daegdiemj moq. Gamj doxdaeuq、gamj ndaejhingz, dwg gij rengz cingsaenz hung’ak Cunghgoz Gungcanjdangj hoenxhingz mbouj ndaej, saedyienh aen loqsiengj hungmbwk couh aeu haenqrengz buekguh、roengzrengz mbouj soeng. Ngoenzneix, raeuz beij gwnz lizsij seizlawz cungj haeujgyawj、engq miz saenqsim caeuq naengzlig saedyienh aen moegbiu Cunghvaz Minzcuz fukhwng hungmbwk, doengzseiz itdingh caepcawq ok rengz engq lai、roengzrengz engq haenq.

Gwnz roen moq, raeuz itdingh gyagiengz gij yisiz miz cainanh、itloh youq seiz onj ngeix seiz nanh, gvancez cungjdaej guekgya anhcenzgvanh, dungjcouz hwngfat caeuq ancienz, dungjcouz daengxbuenz canloz Cunghvaz Minzcuz fukhwng hungmbwk caeuq gij bienq seiqgyaiq bak bi caengz miz gvaq haenx, roxnaj gij dwzcwngh moq iugouz moq guek raeuz sevei cujyau mauzdun bienqvaq daiq daeuj haenx laegdaeuq, roxnaj gij mauzdun moq deuqnyex moq gozci vanzgi luenhlab labcab daiq daeuj haenx laegdaeuq, gamj doxdaeuq, maenh doxdaeuq, bungz bya hai roen、bungz dah guh giuz, gamj hoenxhingz sojmiz deuqnyex fungyiemj!

——Hag’aeu lizsij、 haicauh daengzcog, itdingh gyagiengz doxgiet lwg Cunghvaz. Gij ginglig buekguh bak bi, Cunghgoz Gungcanjdangj itloh aeu doengjit cansen baijyouq dieg youqgaenj, mbouj- duenh gyamaenh caeuq hwngfat doengjit cansen ceiq gvangqlangh, doxgiet gij rengz sojmiz doxgiet ndaej、diuh sojmiz yinhsu gaenxmaenx diuh ndaej, hanhdoh ceiq hung bae gyonj gij rengz caezcaemh haenqguh. Gyaez guek doengjit cansen dwg gij fapbauj youqgaenj Cunghgoz Gungcanjdangj doxgiet daengxcungq lwg Cunghvaz ndawguek rogguek saedyienh Cunghvaz Minzcuz fukhwng hungmbwk.

Gwnz roen moq, raeuz itdingh genhciz doxgiet dox lienzhab, genhciz doxdoengz caeuq lai yiengh doengjit, gyagiengz swhsiengj cwngci yinxlingx, gvangqlangh comz doxrox, gvangqlangh comz vunzcaiz lajmbwn, roengzrengz ra soqgoeng’iek ceiq hung、veh ok aen gvaengxluenz caemhsim ceiq hung, guhbaenz gij gizmen daengxcungq lwg Cunghvaz ndawguek rogguek sim naemj coh giz ndeu、ok rengz coh giz ndeu, comz rengz hung saedyienh minzcuz fukhwng!

——Hag’aeu lizsij、 haicauh daengzcog, itdingh mboujduenh doinyoengx aen gunghcwngz hungmbwk moq hwnjguh aendangj. Gamj gag gwzming dwg gij geiqhauh yienhda Cunghgoz Gungcanjdangj caeuq cwngdangj wnq mbouj doxdoengz. Aendangj raeuz ginggvaq lienh bae lienh dauq cix cingsaenz gvaekgvaek, aen yienzaen gig youqgaenj couhdwg raeuz itloh genhciz aendangj aeu guenj aendangj、cienzmienh daj yiemz guenj aendangj, mboujduenh wngqdoiq ndei gaujniemh fungyiemj bonjfaenh youq gak duenh lizsij bungz daengz haenx, baujmaenh aendangj raeuz youq ndaw lizsij baenaj seiqgyaiq seizseiq bienqvaq laegdaeuq neix itloh byaij youq baihnaj seizdaih, youq ndaw lizsij baenaj wngqdoiq gak cungj deuqnyex fungyiemj ndawguek rogguek itloh baenz gij rengz hawj daengx guek beksingq ndaej baengh!

Gwnz roen moq, raeuz aeu geiqmaenh gij dauhleix dajdiet bonjfaenh aeu miz rengz, gagrox gyagiengz cienzmienh daj yiemz guenj aendangj ciengxlwenx youq gwnz roen, hwnjguh cwngci aendangj daeuj daiqlingx, laebdaeb doinyoengx aen gunghcwngz hungmbwk moq hwnjguh aendangj seizdaih moq, mboujduenh yiemzmaed cujciz dijhi aendangj, haenqrengz hwnjguh aendoih ganbu suciz ndei miz binjdwz miz dungxcaiz, giendingh mbouj bienq doinyoengx hwnjguh dangjfungh lenzcwng caeuq guh fanj nduknaeuh, genhgez cawz sojmiz yinhsu haih aendangj senhcin caeuq seuqcingh bae, cawz sojmiz binghdoeg myaexnduk aendangj cangqmaenh deuz, baujmaenh aendangj mbouj bienqcaet、mbouj bienq saek、mbouj bienq feih, baujmaenh aendangj youq ndaw lizsij baenaj seizdaih moq genhciz caeuq hwngfat sevei cujyi miz daegsaek Cunghgoz itloh baenz gij haedsim lingjdauj maenh’ak!

Gyoengq dungzci、gyoengq baengzyoux!

Raeuz aeu cienzmienh cinjdeng gvancez gij fuengcim“guek ndeu song loh cidu” “vunz Gangj guenj Gangj” “vunz Au guenj Au”、 gauhdu gaguenj, doeksaed gij gienz Cunghyangh cienzmienh guenj Yanghgangj、Aumwnz Daegbied Hingz- cwnggih, doeksaed faplwd cidu caeuq caephengz gihci daegbied hingzcwnggih henhoh guekgya ancienz, henhoh guekgya cujgenz、ancienz、hwngfat leih’ik, henhoh daegbied hingzcwnggih sevei onjdingh, baujmaenh Yanghgangj、Aumwnz ciengz- geiz hoenghvuengh onjdingh.

Gaijgez Daizvanh vwndiz、saedyienh guekgya cienzbouh doengjit, dwg gij lizsij yinvu Cunghgoz Gungcanjdangj ciengxlwenx mbouj bienq, dwg gij maqmuengh caezcaemh daengxcungq lwg Cunghvaz. Aeu genhciz gij yenzcwz aen Cunghgoz ndeu caeuq “Gouj Ngeih Doxdoeng”, doinyoengx guekcoj doxhuz doengjit baenaj. Sojmiz lwg Cunghvaz baugvat beixnuengx song hamq, aeu caemh diuz sim ndeu、doxgiet baenaj, genhgez cuknuenz sojmiz “Daizduz” maeuzsiengj, caezcauh minzcuz fukhwng daengzcog gyaeundei. Bouxlawz cungj mbouj ndaej yawjsiuj gij sim gengrengz、 ceiqheiq giendingh、 naengzlig hung’ak vunz Cunghgoz henhoh guekgya cujgenz caeuq diegnamh caezcingj!

Gyoengq dungzci、gyoengq baengzyoux!

Daengzcog duh bouxcoz, maqmuengh youq bouxcoz. Bak bi gaxgonq, bang bouxcoz moq ndeu yaengxsang boekfeiz swhsiengj Majgwzswh Cujyi, youq aen Cunghgoz biengzdomx neix haemzhoj bae ra roennaj minzcuz fukhwng. Bak bi doxdaeuj, youq laj mbawgeiz Cunghgoz Gungcanjdangj, daih dem daih Cunghgoz bouxcoz yungh seizcoz vih aendangj caeuq beksingq saehnieb bae buekguh, baenz gij rengz sienfung saedyienh Cunghvaz Minzcuz fukhwng hungmbwk. Cunghgoz bouxcoz seizdaih moq aeu rapdawz mbaq rap vih saedyienh Cunghvaz Minzcuz fukhwng hungmbwk, gyagiengz gij ceiqheiq、goetheiq、daejheiq vunz Cunghgoz, mbouj vei seizdaih, mbouj vei seizcoz, mbouj vei aendangj caeuq beksingq maqmuengh!

Gyoengq dungzci、gyoengq baengzyoux!

Bak bi gaxgonq, mwh Cunghgoz Gungcanjdangj laebbaenz cijmiz 50 lai boux dangjyenz, ngoenzneix gaenq baenz aendangj gaemgienz hung seiqgyaiq daih’it miz 9500 lai fanh boux dangjyenz、lingjdauj aen guek hung 14 ik lai gyaeujvunz、yingjyangj daengz daengx lajmbwn.

Bak bi gaxgonq, Cunghvaz Minzcuz youq baihnaj seiqgyaiq dwg gij yiengh doekbaih mbouj hoengh. Ngoenzneix, Cunghvaz Minzcuz yiengh hwngfwdfwd byaij youq baihnaj seiqgyaiq, cingq yungh yamqdin dangj mbouj ndaej hamj coh fukhwng hungmbwk.

Bak bi gvaqbae, Cunghgoz Gungcanjdangj gyau faenh dapgienj ndei ndeu hawj beksingq、hawj lizsij. Seizneix, Cunghgoz Gungcanjdangj doxgiet daiq- lingx Cunghgoz beksingq youh hamj hwnj le diuzroen ganjgauj moq saedyienh aen moegbiu buekguh bak bi daihngeih.

Daengxcungq Cunghgoz Gungcanjdangjyenz！Dangjcunghyangh iuheuh gyoengqsou, geiqmaenh sawjmingh goeknduj, giendingh swhsiengj leix- niemh, hengzguh gij cunghcij aendangj, ciengxlwenx caeuq beksingq vunzlai lwed noh doxlienz, itloh caemh beksingq naemj youq doxcaez、guh youq doxcaez, doxcaez dohgvaq hojnanz、caemh haemz caemh hoj, laebdaeb vih saedyienh beksingq ndaej gvaq ndwenngoenz ndei roengzrengz mbouj soeng, roengzrengz vih aendangj caeuq beksingq lai guh lai miznaj!

Gyoengq dungzci、gyoengq baengzyoux!

Cunghgoz Gungcanjdangj laebceiq guh gij saeh hungmbwk cien daih fanh daih Cunghvaz Minzcuz, bak bi cingqdwg seizcoz! Dauqyawj doenghbaez, muenghyawj daengzcog, miz Cunghgoz Gung- canjdangj gengrengz lingjdauj, miz daengx guek gak cuz beksingq doxgiet gaenjndaet, aen moegbiu cienzmienh hwnjguh baenz aen guek giengz sevei cujyi yendaiva itdingh guh ndaej baenz, aen loqsiengj Cunghgoz Cunghvaz Minzcuz fukhwng hungmbwk itdingh saedyienh ndaej!

Cunghgoz Gungcanjdangj hungmbwk、miznaj、cingqdeng fanhbi!

Cunghgoz beksingq hungmbwk、miznaj、yingh- yungz fanhbi!

(Sinhvazse Baekging ndwen 7 ngoenz 1 dienh)