（ciep banj daeuz）

Cunghvaz Minzcuz dwg gij minzcuz hungmbwk gwnz seiqgyaiq, miz 5000 lai bi vwnzmingz lizsij goek gyae lae raez, vih vunzloih vwnzmingz cinbu guh’ok le gung’yen lumz mbouj ndaej. Bi 1840 ciengz ciengq ienqnamh le, Cunghgoz cugyamq baenz buenqcizminzdi buenqfunghgen sevei, guek- gya deng ap、bekqsingq miz nanh、vwnzmingz deng uq, Cunghvaz Minzcuz deng souh gij cainanh doenghbaez caengz miz gvaq. Daj seizhaenx hainduj, saedyienh Cunghvaz Minzcuz fukhwng hungmbwk, couh baenz aen loqsiengj ceiq hungmbwk Cunghgoz beksingq caeuq Cunghvaz Minzcuz.

Vih gouq minzcuz deng mied, Cunghgoz beksingq haenqheiq fanjgang, gyoengq boux gyaez guekgya buet bae hemqheuh, Daibingzdenhgoz、Fouhswt Bienq Fap、Yihozdonz Yindung、Sinhaih Gwzming doxlienz guh hwnjdaeuj, gak cungj fueng- anq gouq guek doxlwnz okdaiz, hoeng doeklaeng cungj dwg saetbaih. Cunghgoz gaenj aeu miz gij swhsiengj moq yinxlingx guh yindung daeuj gouqdai, gaenj aeu miz cujciz moq comz rengz guh gwzming.

Cibnyied Gwzming sing bauq baez yiengj, soengq Majgwzswh Lezningz Cujyi daeuj hawj Cunghgoz. Youq ndaw Cunghgoz beksingq caeuq Cunghvaz Minzcuz roxsingj hungmbwk, youq ndaw Majgwzswh Lezningz Cujyi caeuq Cunghgoz gunghyinz yindung dox giethab gaenjndaet, Cunghgoz Gungcanjdangj laebbaenz. Cunghgoz miz le gungcanjdangj, neix dwg gienh saehbienq hung hai seizdaih moq, gaijbienq le gij fueng’yiengq caeuq diuzroen hwngfat gaenhdaih gvaqlaeng Cunghvaz Minzcuz laegdaeuq, gaijbienq le gij roennaj caeuq minghyinh Cunghgoz beksingq caeuq Cunghvaz Minzcuz laegdaeuq, gaijbienq le gij byaijyiengq caeuq gwzgiz seiqgyaiq hwngfat laeg- daeuq.

Cunghgoz Gungcanjdangj baez laebbaenz, couh dawz vih Cunghgoz beksingq maeuz vuenyungz、vih Cunghvaz Minzcuz maeuz fukhwng laebdingh baenz gij sawjmingh goeknduj bonjfaenh. Bak bi doxdaeuj, sojmiz buekguh、sojmiz vutmingh、sojmiz dajcauh Cunghgoz Gungcanjdangj doxgiet daiqlingx Cungh- goz beksingq guh haenx, gyoebgyonj hwnjdaeuj couhdwg aen cawjdaez ndeu: Saedyienh Cunghvaz Minzcuz fukhwng hungmbwk.

——Vihliux saedyienh Cunghvaz Minzcuz fukhwng hungmbwk, Cunghgoz Gungcanjdangj doxgiet daiqlingx Cunghgoz beksingq, buekmingh bae hoenx、 baenzbaenz cungj mbouj lau, cauh le gij cingzcik hungmbwk sinhminzcuj cujyi gwzming. Raeuz ginggvaq bwzfaz cancwngh、dujdi gwzming cancwngh、gang’yiz cancwngh、gaijfang cancwngh, yungh gij gwzming vujcangh fanj gij fanjgwzming vujcangh, doifan digoz cujyi、funghgen cujyi、gvanhliuz swhbwnj cujyi sam goengq bya hung, laebbaenz le Cunghvaz Yinzminz Gunghozgoz beksingq danggya guh cawj, saedyienh le minzcuz doglaeb、beksingq gaijfang. Sinhminzcuj cujyi gwzming ndaejhingz, daengzdaej gietsat le gij lizsij Cunghgoz gaeuq buenqcizminzdi buenqfunghgen sevei, daengzdaej gietsat le gij gizmen buenz sa sanq Cunghgoz gaeuq, daengzdaej cawz le gij diuzyoz mbouj bingzdaengj lezgyangz apbik gya hawj Cunghgoz caeuq sojmiz daeggienz digoz cujyi youq Cunghgoz haenx, vih saedyienh Cunghvaz Minzcuz fukhwng hungmbwk cauh le gaenbonj sevei diuz- gienh. Cunghgoz Gungcanjdangj caeuq Cunghgoz beksingq yungh buekguh akgiengz lwnh seiqgyaiq yiemzrwd, Cunghgoz beksingq ndwn hwnjdaeuj lo, aen seizdaih Cunghvaz Minzcuz caih vunz gaj、deng apbik haenx gvaqbae mbouj dauqma lo!

——Vihliux saedyienh Cunghvaz Minzcuz fukhwng hungmbwk, Cunghgoz Gungcanjdangj doxgiet daiqlingx Cunghgoz beksingq, baengh rengz swhgeij、haenqrengz buekguh, cauh le gij cingzcik hungmbwk sevei cujyi gwzming caeuq hwnjguh. Raeuz guh sevei cujyi gwzming, siumied aen cidu funghgen boksok apbik youq Cunghgoz laebdaeb geij cien bi haenx, laebbaenz aen cidu gihbwnj sevei cujyi, doinyoengx hwnjguh sevei cujyi, hoenxhingz gij boekdaenh buqvaih caeuq vujcangh deuqnyex digoz cujyi、bagenz cujyi, saedyienh le sevei bienqgwz ceiq gvangq ceiq laegdaeuq Cunghvaz Minzcuz miz lizsij doxdaeuj, saedyienh le gij bonghyat hungmbwk aen guekhung baihdoeng gijmaz cungj mbouj miz、gyaeujvunz lai haenx yamq hung hamj haeuj sevei cujyi sevei, vih saedyienh Cunghvaz Minzcuz fukhwng hungmbwk demhroengz le gaenbonj cwngci cenzdiz caeuq cidu gihcuj. Cunghgoz Gungcanjdangj caeuq Cunghgoz beksingq yungh buekguh akgiengz lwnh seiqgyaiq yiemzrwd, Cunghgoz beksingq mboujdan ak buqvaih aen seiqgyaiq gaeuq ndeu、hix ak hwnjguh aen seiqgyaiq moq ndeu, cijmiz sevei cujyi cijndaej gouq Cunghgoz, cijmiz sevei cujyi miz daegsaek Cunghgoz cijndaej hwngfat Cunghgoz！

——Vihliux saedyienh Cunghvaz Minzcuz fukhwng hungmbwk, Cunghgoz Gungcanjdangj doxgiet daiqlingx Cunghgoz beksingq, gaijfang swhsiengj、daihdamj buekguh baenaj, cauh le gij cingzcik hungmbwk gaijgwz hailangh caeuq hwnjguh sevei cujyi yendaiva, raeuz saedyienh gij cienjbienq hungmbwk gig miz yiyi laeggyae gwnz lizsij aendangj Cunghgoz moq laebbaenz doxdaeuj, laebdingh gij lohsienq gihbwnj duenh cogaep sevei cujyi, giendingh mbouj bienq doinyoengx gaijgwz hailangh, hoenxhingz gij deuqnyex fungyiemj gak fuengmienh, haicauh、genhciz、henhoh、hwngfat sevei cujyi miz daegsaek Cunghgoz, saedyienh le gij cienjbienq hungmbwk daj aen dijci giva ginghci gig caebcomz daengz aen dijci hawciengz ginghci sevei cujyi gig miz rengzhoengh、daj fungsaek buenq fungsaek daengz cienz fueng’vih hailangh, saed- yienh le gij dwkbyoengq hungmbwk daj gij cingzgvang swnghcanjliz haemq doeklaeng daengz ginghci cungjliengh yathamj daengz seiqgyaiq daihngeih, saedyienh le gij yathamj hungmbwk beksingq gwn mbouj imq daenj mbouj raeuj daengz cungjdaej siujgangh、buetcoh cienzmienh siujgangh, vih saedyienh Cunghvaz Minzcuz fukhwng hungmbwk gunghawj le dijci baujcingq miz rengzhoengh moq caeuq gij diuzgienh doxgaiq hwngfat riengjret. Cunghgoz Gungcanjdangj caeuq Cunghgoz beksingq yungh buekguh akgiengz lwnh seiqgyaiq yiemzrwd, gaijgwz hailangh dwg aen banhfap youqgaenj ndeu gietdingh diuzmingh roennaj Cunghgoz daihneix, Cunghgoz yamq hung gyaephwnj seizdaih lo!

——Vihliux saedyienh Cunghvaz Minzcuz fukhwng hungmbwk, Cunghgoz Gungcanjdangj doxgiet daiqlingx Cunghgoz beksingq, gagsaenq gaggiengz、soujcingq cauhmoq, comz doxdaeuq hungmbwk、gunghcwngz hungmbwk、saehnieb hungmbwk、loqsiengj hungmbwk, cauh le gij cingzcik hungmbwk sevei cujyi miz daegsaek Cunghgoz seizdaih moq. Cibbet Daih Aendangj doxdaeuj, sevei cujyi miz daegsaek Cunghgoz haeuj daengz seizdaih moq, raeuz genhciz caeuq gyagiengz aendangj cienzmienh lingjdauj, dungjcouz doinyoengx “haj vih it daej” cungjdaej baijbouh、hezdiuz doinyoengx “seiq aen cienzmienh” canloz baijbouh, genhciz caeuq guhndei aen cidu sevei cujyi miz daegsaek Cunghgoz、doinyoengx guekgya ceihleix dijhi caeuq ceihleix naengzlig yendaiva, genhciz ciuq fapgvi guenj aendangj、guhbaenz aen dijhi fapgvi ndaw aendangj haemq caezcienz, hoenxhingz baenzroix deuqnyex fungyiemj hung- naek, saedyienh aen moegbiu buekguh bak bi daih’it, dinghmingz gij canloz baijbouh saedyienh aen moegbiu buekguh bak bi daihngeih, saehnieb aendangj caeuq guekgya aeundaej cingzcik hungloet、fatseng bienqvaq hungloet, vih saedyienh Cunghvaz Minzcuz fukhung hungmbwk gunghawj le gij cidu baujcingq engq caezcienz、gij giekdaej doxgaiq engq maenhsaed、gij rengz cingsaenz engq cawjdoengh. Cunghgoz Gungcanjdangj caeuq Cunghgoz beksingq yungh buekguh akgiengz lwnh seiqgyaiq yiemzrwd, Cunghvaz Minzcuz coux daeuj le gij bonghyat hungmbwk daj ndwn hwnjdaeuj、miz hwnjdaeuj daengz ak hwnjdaeuj, saedyienh Cunghvaz Minzcuz fukhwng hungmbwk haeuj daengz duenh lizsij cienj dauqnyangz mbouj ndaej!

Bak bi doxdaeuj, Cunghgoz Gungcanjdangj doxgiet daiqlingx Cunghgoz beksingq, yungh gij heiqseiq mbouj lau “vih miz vutmingh ceiqheiq lai, gamj hawj biengz gaeuq vuenh biengz moq”, raiz le gij sei ceiq hungmbwk gwnz lizsij geij cien bi Cunghvaz Minzcuz. Bak bi neix doxdaeuj haibik diuzroen hungmbwk、cauh saehnieb hungmbwk、aeundaej cingzcik hungmbwk, itdingh raiz haeuj ceksaw lizsij hwngfat Cunghvaz Minzcuz、ceksaw hwngfat vunzloih vwnzmingz!

Gyoengq dungzci、gyoengq baengzyoux!

Bak bi gonq, gyoengq bouxbyaijgonq Cunghgoz Gungcanjdangj cauhlaeb le Cunghgoz Gung- canjdangj, guhbaenz le gij cingsaenz laeb aendangj hungmbwk genhciz caenleix、giensouj lijsiengj, hengzguh goeknduj、rapdawz sawjmingh, mbouj lau vutmingh、 doxdaeuq maenh’ak, doiq aendangj cungcig、mbouj vei beksingq, neix dwg gij goekrag cingsaenz Cunghgoz Gungcanjdangj.

Bak bi doxdaeuj, Cunghgoz Gungcanjdangj fatyiengz gij cingsaenz laeb aendangj hungmbwk, ciengzgeiz buekguh laebhwnj aen bujhi cingsaenz vunz Cunghgoz Gungcanjdangj, lienh ok cwngci binjgwz ronghsien. Lizsij baenaj mbouj dingz, cingsaenz daihdaih doxcienz. Raeuz aeu laebdaeb fatyiengz cienzdoengj miznaj、swnjcienz lwed meg saekhoengz, ciengxlwenx cienz gij cingsaenz laeb aendangj hungmbwk roengzbae、fatyiengz ndei bae!

Gyoengq dungzci、gyoengq baengzyoux!

Bak bi doxdaeuj, sojmiz cingzcik raeuz aeundaej, dwg gij gezgoj vunz Cunghgoz Gung- canjdangj、Cunghgoz beksingq、Cunghvaz Minzcuz doxgiet buekguh. Vunz Cunghgoz Gungcanjdangj aeu Mauz Cwzdungh dungzci、Dwng Siujbingz dungzci、Gyangh Cwzminz dungzci、Huz Ginjdauh dungzci guh cujyau daiqbiuj haenx, vih Cunghvaz Minzcuz fukhwng hungmbwk laebbaenz le gij goenglauz hungmbwk riuzcienz fanh daih! Raeuz yaek aeueiq gyoengqde!（cienj banj daihsam）