Vahsug naeuz “ndwenlab bak ngoenz ndei”, yaek daengz cieng lo, ngoenzngoenz dwg ngoenzndei, gyoengqvunz haeuj ranz coux bawx, an’gya senj dieg, ngoenzngoenz miz saeh angq.

Ndwenlaeb ngoenz ndeu lajbyonghngoenz, Lauxngeih ndawgyog gou naeuz de haeuj ranz moq, heuh dou daengx ranz vunz gvaqbae gwn caeuz, de naeuz hix mbouj dwg cingj hek, couhdwg heuh cibgeij boux beixnuengx ndawgyog guhdoih gangjgoj gangjgoj.

Mehyah gou cam:“Baengzyoux mwngz haemhneix coux bawx, hix cingj raeuz bae gwn laeuj bw, yaek bae ranz Lauxngeih roxnaeuz bae ranz baengzyoux mwngz.”

Dwg o, baengzyoux gou caeuq gou daj youq gauhcungh guhdoih doegsaw seiz couh gyaucingz daengz seizneix, doxndei lumj caen beixnuengx nei, haemhneix de coux bawx lo, baenzlawz noix ndaej gou.

Gou naeuz:“Haemhneix couh bae ranz Lauxngeih, gyawz cungj mbouj bae.”

Song ndwen gonq, Lauxngeih youq yienhsingz cawx dauq ranz ndeu, dauq ranz neix seiq rug song ding, it bak seiqcib bingzfueng, seiqcib roek fanh maenz ngaenz. Lauxngeih cawx dauq ranz neix le, aen gyog dou cibsam boux lwgsai cungj ndaej daengz yienhsingz cawx ranz youq liux lo.

Mbanj gou youq ndaw rungh, bya lai reih noix, bouxvunz ngamq miz haj faen reih, ndawreih rin lai namh noix, ndaem mbouj baenz maz doenghgo. Faen reihnaz daengz hoh, gak boux gak guh le, haeuxgwn dwg gaeuq gwn lo, couhdwg ra ngaenz sinhoj lai, ndawmbanj boux miz rengz guhhong haenx cungj gonqgonq laenglaeng okbae dajgoeng lo.

Seizde gou caeuq mehyah doxyaeng:“Raeuz hix okbae dajgoeng ba, dajgoeng rom ndaej fanh maenz ngaenz le raeuz couh dauqranz hwnj ranz moq.”

Seizhaenx boux miz fanh maenz ngaenz couhdwg ranz ceiq fatcaiz he lo.

Bi 1994, gou caeuq mehyah daeuj daengz yienhsingz ra hong guh, miz boux baengzyoux ndeu youq bien yienhsingz ciengx gaeq, de naeuz danghnaeuz dou naemj ciengx, de nyienh son dou baenzlawz ciengx gaeq. Couh yienghneix dou couh youq gizgyawj yienhsingz co aen dieg ndeu ciengx gaeq.

Youq ndawranz ciengx gaeq mbouj miz haeux, ngoenz langh gaeq okbae miz mbouj miz gwn, couh caih duzgaeq gag ra gwn, ciengx baenz bi duzgaeq cij miz song sam gaen naek. Doeklaeng dou ciengx gaeq miz gohyoz, ciengx sam ndwen lai couh ndaej gai gaeq lo, bi ndaej gai sam seiq buek gaeq, gaeqnoh gyaqcienz yienznaeuz mbouj sang, gai buek gaeq he hix ndaej canh di ngaenz. Dou ciengx gaeq seiq bi le, rom ndaej di ngaenz he lo, mehyah naeuz:“Raeuz dauqbae ranzmbanj hwnj ranz moq ba.”

Gangj saedvah, daeuj daengz yienhsingz geij bi, raen daengz yienhsingz ngoenz doek ngoenz bienq ndei, yienghyiengh fuengbienh, gou hix da raen sim fiz, caen naemj youq yienhsingz an’gya. Gou naeuz:“Mbouj, raeuz youq yienhsingz cawx ranz ba.”

Couh yienghneix, bi 1998, dou youq yienhsingz cawx gaiq diegranz ndeu, hwnj ndaej aen laeuz miz geij caengz youq lo. Gou baenz ndawmbanj、 ndawgyog boux daih’it youq yienhsingz cawx ranz.

Lauxseiq ndaw gyog doegsaw okdaeuj le, couh youq yienhsingz gaen vunz coih ci. De miz rengz, youh gaenx hag, mbouj geij nanz de couh hag ndaej mbouj noix dinfwngz. Ci hung ci iq de cungj coih ndaej, aen ci gyawz vaih de cungj rox coih caez. Lauxseiq damj hung, gvaqlaeng de gag hai aen diemq coih ci ndeu, sinhoj geij bi, de hix youq yienhsingz cawx ranz lo.

Lauxcaet ndawgyog miz simgei, rox dajsuenq, gyoengq vunzmbanj cungj okbae dajgoeng lo, gij reihnaz ndaw mbanj cungj mbouj miz vunz raeq lo, Lauxcaet gvanbaz co gij reih naz ndawmbanj roengzdaeuj caez, reih bingz ndaem oij gai aeu ngaenz, reih bya ndaem gosangh ciengx nonsei.

Baihgwnz raen Lauxcaet guh ndaej miz sing miz saek, miz siengq miz yiengh, couh ok ngaenz hawj de hwnj ranz ciengx non, lij bang ngaenz bang doxgaiq hawj de ndaem oij. Geij bi roengzdaeuj, Lauxcaet miz ngaenz lo, de hix daeuj yienhsingz cawx dauq ranz ndeu.

Ranz Lauxcib miz haj beixnuengx, gyaranz hoj, de ngeihcib bi seiz couh gaen vunz bae Guengjdoeng guhhong, de gaenx guh mbaet yungh, ndawdaeh rom ndaej di ngaenz he le de couh dauqranz, dajsuenq guh ranz moq, de naemj: Guh ranz moq dwg gienh daihsaeh ndeu, aeu heuh gyoengq beixnuengx gyahoh daeuj gwn can laeuj he cij ndaej.

Lauxcib naemj bae ra duzyiengz he daeuj gaj. Ndaw mbanj couh miz vunz ciengx yiengz, de bae cam boux ciengx yiengz seiz, rox daengz seizneix gaen nohyiengz dwg ngeihcib geij maenz, de youq mbouj onj lo.

Dieg dou bya lai nywj noengq, ceiq hab ciengx yiengz, miz ngaenz cawx yiengzlwg couh baenz, mbouj you duzyiengz mbouj miz doxgaiq gwn. Lauxcib gietdingh mbouj hwnj ranz moq gonq, sien yungh ngaenz bae guh goek ciengx yiengz, daengzcog gai yiengz ndaej ngaenz le caiq guh dajsuenq.

Lauxcib mbouj caiq okbae dajgoeng lo, youq ranz haeujsim ciengx yiengz. Hainduj de ciengx geijcib duz yiengzmeh, gvaqlaeng roengz daengz geij bak duz. Ciengx yiengz sam bi le, Lauxcib bibi ndaej gai geijcib duzyiengz, de miz ngaenz lo, de youq ranzcoj hwnj ndaej aen ranzlaeuz moq he, youh daengz yienhsingz cawx dauq ranz ndeu. De naeuz daengzcog baedauq yienhsingz fuengbienh haeujok.

Daegnuengx Cibsam seng ok dungxmeh couh ga’gvad, gvaqlaeng hix aeu bouxbaz ga’ndiengj ndeu, song boux cungj mbouj ndaej guh hongnaek, hix mbouj ndaej okbae ra ngaenz, gyaranz hoj lumj aeu raemx swiq gvaq nei.

Vah bouxgeq naeuz “giz gumh cungj miz giz bo bouj”. Cibsam gvanbaz seiqvunz cungj dwg gvaq mbouj swnh, hoeng song daeglwg de cungj cibfaen cengqheiq, boux gaen boux bae doeg daihhag lo.

Bohmeh mbouj ndaej okbae ra ngaenz, gyoengqlwg youh doegsaw, gij ndwenngoenz neix baenzlawz gvaq? Seizneix, miz gungcanjdangj、miz cwngfuj daeuj bangcoh, ranz Cibsam ndaej yiengjsouh dihbauj, gyoengq lwg de ndaej netsim bae doegsaw.

Cwngfuj youq yienhsingz guh ranz hawj doengh boux gungzhoj senj dieg bae youq. Aenvih Cibsam dwg ranz gungzhoj, ndigah de ndaej soengqhawj dauq ranz ndeu, daengx ranz vunz hix angqfofo beuj daengz yienhsingz bae youq lo, cwngfuj lij ra hong hawj Cibsam gvanbaz guh dem.

Lauxngeih miz song dah lwg, dahdah coengmingz. Lauxngeih mbouj vei gyoengqlwg, ndawranz mboujguenj miz geijlai ngaenz hix cungj soengq gyoengq lwg bae doegsaw, song dah lwg hix cengqheiq, cungj gauj hwnj daihhag liux.

Lwgnyez bae dieggyae doegsaw, gwn daenj sawjyungh yienghyiengh yungh ngaenz, Lauxngeih gvanbaz boux ndeu youq ranz dajndaem dajciengx, boux ndeu okrog bae ra hong guh, bi sou ndaej geijlai ngaenz dingzlai yungh youq gwnz ndang gyoengq lwg, gvanbaz geij bi mbouj ndaej cawx saek geu buh moq vaq moq, aen ranz gaeuq vaihvadvad hix mbouj miz ngaenz lingh guh.

Gyoengq doengzdoih ndaw mbanj bouxboux hwnj ranz laeuz moq youq, song dahlwg cungj yawj youq ndawda, naemj youq ndawsim: Cungj miz ngoenz ndeu dou hix ndaej hawj bohmeh gwn youq mbouj you mbouj heiq.

Sinhoj cungjsuenq gvaqbae lo, song dahlwg daihhag okdaeuj cungj miz hong guh lo, gyoengqde miz ngaenz le, gienh saeh daih’it couhdwg youq yienhsingz cawx ranz hawj daxboh daxmeh youq.

Lauxngeih haeuj ranz moq haemhhaenx, dou cibsam boux beixnuengx cungj daengz caez, ndaw ranz moq sing gangj sing riu nauhcaengcaeng, daihgya cungj nyinhnaeuz——Mbouj miz gungcanjdangj couh mbouj miz aen sevei ndei neix, mbouj miz aen sevei ndei neix, raeuz couh mbouj miz ngoenz ndei neix!