Dangz Siujdingz ndaej samcib bi lo, daengz gizneix hwnjban ndaej sam bi lai, hix caengz damzyoux. De raen Lij Dungh baenzmbauq youh gaenx- guh, ngamjhoz dangqmaz, caeux couh siengj caeuq de guhyoux lo. Aenvih swhgeij beix Lij Dungh sam bi, lau de yiemz…… Dangz Siujdingz maj baenz hung hix noix raen bouxyah beix bouxgvan.

Gaxgonq, miz haujlai baez de caeuq Lij Dungh caez youq giz ndeu seiz, de ngamq siengj haibak gangj gij sim’eiq bonjfaenh lo, Lij Dungh couh riu naeuz:“Cejdingz miz maz saeh couh gangj vei.” De baez dingq daengz “cej” cih neix, gij vah ndaw hoz cungj ndwnj roengz dungx bae lo.

“Cejdingz miz maz saeh ha?” Lij Dungh riu cam.

“Danghnaeuz dahsau beix gvaq daegmbauq sam bi, mwngz baenzlawz siengj ni?”

“Vahsug naeuz ‘mehmbwk beix bouxsai, caiz doxmoek doxaemq’, beix sam bi, miz maz youqgaenj? Cijaeu song boux sim doxgyaez!”

“Gangj ndaej ndei! Daengzcog gou couh ciuq biucinj neix ra gvan!” Dangz Siujdingz riugekgek naeuz, sim diemz gvaq dangzrwi.

Seizneix Dangz Siujdingz yawj Lij Dungh engq swnhda lo. Lij Dungh doiq Fangh Yizboh yied ndei, sim de yied in, hoeng……

Lij Dungh bouxmbauq neix gangj noix guh lai, moix baez cungj hawj Fangh Yizboh doeksaet youh vuenheij, gij saedceij bingzciengz menhmenh miz di mbouj bingzciengz lo. Songde ngoenzngoenz miz gangj miz riu, dujva doxndiep menhmenh youq ndawsim Fangh Yizboh hai okdaeuj lo.

Mbouj rox mbouj nyinh, bi he gvaqbae lo, Fangh Yizboh couh yienghneix haeuj aen “gien” daih- ngeih bae lo.

Sam

Dangz Siujdingz raen Lij Dungh ngoenznaengz riunyum da mbouj liz Fangh Yizboh, de ndawsim soemj- satsat.

Ngoenz he, youh lwnz daengz Dangz Siujdingz caeuq Lij Dungh cigban. Dangz Siujdingz raen mbouj miz vunz daeuj aeu yw, couh ing youq bakdou ranzbanhgoeng, song da dinghdingh yawj Lij Dungh, ndawda cungj dwg maezlienh. Lij Dungh geizheih muengh coh de. Dangz Siujdingz caiq hix nyaenx mbouj ndaej, buet gvaqbae gotdawz Lij Dungh, doq daej doq cup. Lij Dungh doeksaet yat, baenzlawz cungj bwed mbouj duet.

Dingjlingz Fangh Yizboh byaij gvaqdaeuj, yawjraen gij yiengh neix. De doeksaet dangqmaz, sikhaek cung ok henz dah bae, de daejsubsub, gij rumz boq daengz gwnz naj、gwnz ndang daeuj, de geijlai maqmuengh gij rumz neix ci deuz gij saeh haxbaenh bae. Yawj gij raemxdah coh baihdoeng mbouj dingz mbouj duenh lae bae, de rox, gij cingzngeih caeuq Lij Dungh hix gaen lae bae gizgyae lo.

Gizsaed, bohmeh Fangh Yizboh gig lau de lij haq youq lajmbanj, moix baez de dauqranz, bohmeh cungj nambedbed, naeuz miz vunz yaek gaisau bouxcoz ndaw singz caeuq de doxraen…… Mwhhaenx ndawsim de cij miz Lij Dungh, bohmeh gangj maz de cungj mbouj dam gvaq.

Gaxgonq Fangh Yizboh lij miz di naemnaiq, seizneix dauqdaej roengz ndaej gietsim doxbiek lo!

Ngoenz daihngeih, de couh cingjgyaj bae ranz, gouz bohmeh ra vunz diuh de bae dieg wnq. De gvendou youq, ngoenzhwnz ninz dwk. Bohmeh mbouj rox de vihmaz, yousim dangqmaz, raen dahlwg baenzneix, dapwngq gij cingjgouz de lo.

Fangh Yizboh diuh deuz lo, Lij Dungh lumj hoenz mbin bae nei, simcieg dangqmaz. Doeklaeng de baez raen Dangz Siujdingz cungj hozndat, mbouj gangj saek coenz couh buetdeuz.

Song ndwen gvaqbae, aen bak- sieng ndaw sim Fangh Yizboh ngamq baenz gyaep lo, Lij Dungh sawqmwh ndwn youq dangqnaj de.

Fangh Yizboh yienznaeuz hawj Lij Dungh gejnaeuz, hoeng, de mbouj saenq. Fangh Yizboh heuh Lij Dungh lingh ra vunz, de swhgeij hix gaenq bae caeuq bouxwnq doxraen lo, Lij Dungh naeuz cij aeu de guh yah. Songde couh yienghneix dingzdingz duenhduenh youh gvaq le sam bi.

Bohmeh raen Fangh Yizboh youh caeuq Lij Dungh baedauq lo, couh siengj banhfap gienq de. Meh de naeuz:“Mwngz baez haq roengz lajmbanj, seiqvunz couh lumj doek rag youq gizde lo……” De naeuz:“Seizneix youq lajmbanj, mbouj dwg seiqvunz youq lajmbanj, dou lij coz, gaenxguh baengh bonjsaeh diuh daeuj ndaw singz couh baenz lo!”

Fangh Yizboh cungj mbouj dawz gij vah bohmeh haeujrwz, dauqfanj caeuq Lij Dungh engq doxgyaez lo. Raen de caen laemxsim aeu haq, dah hung mbouj dingq gangj, bohmeh sim’unq lo, doengzeiq songde dox- aeu, ndawsim cij muengh songde yied gvaq yied ndei.

Seiq

Baez yaepda, cib lai bi gvaqbae lo, Lij Dungh gvanbaz caez yungh- rengz guhhong, dauqdaej ndaej diuh hwnj yihyen hung ndaw singz lo. Songde seng miz dahlwg he, lij cawx ranz cawx ci dem.

Doeklaeng, guekgya hawj lai ciengx lwg daihngeih, Fangh Yizboh youh seng ndaej daeglwg songseng, seizneix cingq naenghndwen.

De caeuq Lij Dungh youq aen “gien” vuenyungz ndawde gvaq ndaej diemzswdswd, bohmeh Fangh Yizboh cungjsuenq ndaej soeng gaemz heiq he lo.

Haemh ndeu, Fangh Yizboh baez singj gvaqdaeuj, couh yaek daengz cibngeih diemj cung lo, Lij Dungh youh bae gwn laeuj caengz dauqma. De gag hwnqdaeuj ra raemx gwn, swnhbienh dawz soujgih daeuj yawj- yawj. Cingq yawjraen aen saenqsik baengzyoux he haxbaenh fat daeuj.

Baengzyoux fat aen doz daj gienbaengzyoux cienj gvaqdaeuj. Dwg Lij Dungh fat okdaeuj, ndaw doz Lij Dungh unqswnh bungj faj naj Dangz Siujdingz caemhcaiq cup najbyak de, doiqnaj lij miz aen dangauh cap rim lab dem. Mbaw doz baihgwnz Lij Dungh sij dwk——Docih mwngz cibgeij bi doxbuenx!

Dai lo! Fangh Yizboh da ndaem lo! Lij Dungh gingqyienz muenz de caeuq Dangz Siujdingz caez gvaq ngoenzseng! “Cibgeij bi doxbuenx” dwg maz eiqsei? Lij Dungh fat diuz neix youq gienbaengzyoux vanzlij lanz de bae, mbouj hawj de yawj ndaej raen dem!

“Bum” sing he, aen boigingq gwn raemx daj ndaw fwngz de saenz doek roengz lajdieg bae, soiq liux lo. Miz naed gingq iq he biu hwnjdaeuj camx haeuj angjdin bae, lwed laelele!

Mehbuz daj ndaw rug bwn- gyaeuj nyungqnyat damq gyaeuj okdaeuj, gvaiq de guh saeh lujlaj.

Fangh Yizboh uk luenh rwz maenj, haeb heuj haeb faenz, song ga saenzdwddwd cungj unq liux. De fwt naengh roengz eij bae, song fwngz goemq naj, daengx ndang lumj miz cien fanh duzmoed haeb nei, youh humz youh get, mbouj rox baenzlawz guh cijndei……

Ndaek neix couhdwg ciengz naeuz gyaez gou? Gou samcib lai bi hix mauhyiemj seng lwg, seizneix lij youqndwen, de dauq bae cup dah wnq, vih dah wnq gvaq ngoenzseng! Vanzlij gek yah bonjfaenh guh vunz “gien” rog! Mbwn ha mbwn, gij saeh neix cungj guh ndaej ok, byajbag dai de suenq lo! Fangh Yizboh raemxda laelulu, ndawsim mieng naeuz.

Aen ndangdaej Fangh Yizboh mbouj ndei lai, guekgya naeuz ndaej seng lwg daihngeih le, de daengz samcib ngeih bi cij daiqndang ndaej youq. De baenzlawz hix lumz mbouj ndaej mwhde ngamq seng bouxlwg daih’it.

Seizde ciuq guekgya cwngcwz, cijndaej ciengx lwg ndeu. Mehbuz caetcib lai bi, dwg vunz lajmbanj, itcig muengh Fangh Yizboh seng ndaej daeglwg he.

Rox Fangh Yizboh dwg miz dahlwg, mehbuz mbouj sim’angq saekdi, maz cungj mbouj dam lo. Lij Dungh rox dwg dahlwg seiz, hix naeuz mbouj youqgaenj, byawz rox sim de baenzlawz siengj? Dahlwg yaek seng seiz, de hix sij mbouj ndaej cingjgyaj buenx Fangh Yizboh caj lwg okseng.

Fangh Yizboh hwet get lumj yaek daekgat, hix gag haeb heuj nyaenx dwk, daengx ndang saenzdwddwd, dwgrengz dangqmaz. De boux dog bae banh gij saeh gvendaengz seng lwg.

Doeklaeng, daxmeh caeuq dah- nuengx Fangh Yizboh ngamj ganj- daeuj, bang anbaiz ndei de cij ndaej onjsim yietbaeg. Seiz youqgaenj, vanzlij dwg ranzmeh caen. Fangh Yizboh gag siengj gag doek raemxda. De seizhaenx caen dwg gwn vei ngoemx, maz haemzhoj cungj gag gyan roengz dungx bae.

Doeklaeng, seng lwg daihngeih seizde, aenvih nienzgeij engq hung, seng lwg okdaeuj oklwed lai, lij cadi vut mingh bae dem!

Siengj mbouj daengz, cibgeij bi daeuj, de dauq baenz “vunz gien rog” Lij Dungh lo! Caen hangz vunz! Fangh Yizboh lumj deng fangz gaemh hoz nei, doiqcaw mbouj ndaej.

“A——” De swenj sing hung he, fwt ndwn hwnjdaeuj, cung ok dou bae. Raemxda lumj gij naedcaw nei itloh doek roengzdaeuj. Gvaq caenh he, de daej baeg lo, ndawsim hix menhmenh caem roengzdaeuj lo. De lij miz sam boux lwg, lij miz bohmeh dahnuengx, miz baenzlai vunzcaen, couhsuenq doiqnaj de dwg baenz aen baenz aen “gien” seiqvunz, de hix aeu haeb heuj byaij roengzbae, Lij Dungh cungj vunz yak neix, mbouj boiq youq aen gien seiqvunz de youq lo……

（2 sat）