It

Haujlai seiz, vunz cungj lumj deng gvaek youq baenz aen baenz aen gien nei, mboujlwnh mwngz baenzlawz cukcak hix biq mbouj duet, hix saet diuq mboujgvaq diuz mieng hung aen gien neix. Laemxseiz, neix couh lumj mehmbwn dingh le, byawz cungj mbouj miz banhfap gaijbienq.

Aen mingh Fangh Yizboh couh- dwg haujlai aen gien yienghneix.

Aen gien daih’it seiqvunz de, dwg daj ngeihcib ngeih bi haenx hainduj.

Mwhhaenx bi 2000 ndwen 7, de ngamq daj veiswngh yozyau bizyez okdaeuj, couh ndaej faenboiq daengz aen yihyen ndaw yangh bae guhhong. Aenvih de daj seiz iq couh maq- muengh majhung le guh husw, ndigah baez ciep ndaej gij siusik faenboiq, aen loqsiengj bonjfaenh caen ndaej saedyienh lo, de angqyangz dangqmaz, diuq hwnj diuq roengz, ndawsim beij gwn dangzrwi lij diemz!

Bauqdaengz ngoenzhaenx, de caeuxcaeux couh rom ndei buhndang, youq gij sing raeb bohmeh ndawde angqvauvau diuq hwnj banci bae lo. De faengzfebfeb lumj mbungqmbaj nei, itloh eufwen itloh riunyumj.

Banci hai bae song aen lai cung- daeuz lo, gvaq diuz loh bingzrwdrwd le, youh hwnj diuz roen rinsa, cijraen seiqlengq cungj dwg gofaex mwncup- cup, goengq bya sangsetset, moek- moenq mbinfoenfoen…… Fangh Yiz- boh yied naengh yied hojsouh, fwt roxnyinh conghhoz soemjgad, ndaw dungx foekfan mbouj dingh, rueg sam seiq baez bae, hoeng aen banci lij caengz hai daengz giz aeu bae haenx!

De simvueng lo, gangj mbouj ok vihmaz. De lumj rox swhgeij mbouj dwg bae hwnjban, dauq lumj aeu roengz aen raemxraengz laegletlet bae nei. Gij simcingz angqvauvau gyanghaet fwt siu sat lo, gaenq ra mbouj raen saek ngaeuz saek riz lo.

De roxnyinh miz saeh yak cingq humx dawz daengx ndang swhgeij, de ceiq lau cungj roxnyinh neix lo. “Bei, bei, bei! Ngoenzneix dwg ngoenzndei, gaej luenh siengj luenh you gag hwk bonjfaenh baenzlai ne!” De sikhaek gag nai swhgeij. Hoeng, gij heiq ndaw banci youh hawj de gyaeuj ngunh rubmyaiz geij baez, doeklaeng caen nyaenx mbouj ndaej youh rueg baez dem!

Daengz aen haw iq seiz, boux- haici sing hung heuh:“Daengz cehcan ndaw yangh lo, byawz aeu roengz couh roengz!” Banci lij caengz daengx maenh, Fangh Yizboh hojsouh lai lo, de ndwn hwnjdaeuj. Gyoengqvunz naengh baiz laeng daeh gij baufug hunghung iqiq cung gvaqdaeuj, de song ga caengz cap ndaej maenh, couh deng gij baufug haenx caenx ndaej yaek benj bae, de youh ca di rueg okdaeuj lo.

Fangh Yizboh nyaeuq bwnda gotdawz daehbuh de, song ga lumj mbouj ndaej bungq dieg nei, riengz gyoengqvunz caenx roengz ci bae lo.

De langhda yawj coh aen haw iq, aen “cehcan” neix iqetet caemhcaiq gaeuqgoeggoeg, engq mbouj yungh gangj nauhnyied mbouj nauhyied lo. Dieg “cehcan” neix cij mboujgvaq dwg gaiq dieg gyaeuj haw dingz ci ndwi, gyoengq banci doxcomz daengx youq gizneix, baez nanz couh bienq- baenz aen “cehcan” lo.

Aen haw aiq miz cibgeij mij gvangq, caet betcib mij raez. Song henz cungj dwg gij ranzvax daem- ciengz, yawj hwnjdaeuj aiq dwg haj roekcib nienzdaih couh guhbaenz. Gwnz ciengz cungj deng hoenzfeiz oemq ndaej ndaemndwtndwt, vanzlij deng gij rumzfwn dwk ndaej baenz luengq baenz luengq. Gij vax gwnz dingjranz hix ndaemndwt youh naek- caem, lumj baenz bang bangjbuq nei boemz youq gwnzde. Gyang gai bu rim gij rin hung iq mbouj doxdoengz caemhcaiq doeddieddied, aiq daj ndaw dah lauz hwnjdaeuj, bouxlaux caeuq lwgnyez byaij gvaq seiz, caen lau gyoengqde deng laemx.

“Neix couhdwg aen haw ndaw yangh?” Fangh Yizboh gag nam, ndawsim doeksaet lo, de daj yienh- singz daeuj, baez daih’it raen gwnz haw yienghneix, de cungj laihnaeuz gwnz haw ndaw yangh itdingh gvangq- langh youh nauhyied.

“Dahlan, neix mbouj dwg ‘diuz gai’, dwg ‘diuz haw’bw! Yawj mwngz mbouj lumj vunz dieg neix, dwg baez daih’it daengz neix cunz caencik lwi?” Bouxhaici cungnienz gven dou ci le, ngeuxgyaeuj riunyumj caeuq de naeuz.

“Dwg ha—— O, mbouj dwg……” Seizneix Fangh Yizboh gingqyienz mbouj rox baenzlawz gangj, cijndei gaijbak cam bouxhaici naeuz:“Boh- au, aen yihyen ndaw yangh baenzlawz bae ni?”

Bouxhaici naeuz yaek bae yihyen couh baenzneix baenzneix byaij. Fangh Yizboh van gvaq diuz haw baihdoeng, youh byaij gvaq diuz roen caemrwgrwg ndeu, cij ra daengz dieg. Baez raen daengz aen yihyen iqetet, de fwt soeng gaemz heiq he, naenghci baenzlai nanz, dauqdaej daengz lo.

De baenzlawz hix mbouj rox, neix couhdwg aen gien daih’it seiqvunz de.

Ngeih

Fangh Yizboh byaij haeuj bakdou bae, yencangj Vangz Cing okdaeuj ciep de, youh daegbied anbaiz bouxcoz Lij Dungh bang de buen hingzlij, cingjleix ranzrug…… Vanzlij gaj gaeq ceuj byaek ciepdaih de dem. Neix hawj Fangh Yizboh gamjdoengh dangqmaz, gij hojsouh naenghci caeuq gij dungxmbouq gaenq siu bae haujlai.

Yencangj Vangz Cing gaenq ndaej hajcib ngeih bi, Lij Dungh dwg boux canghyw, beix Fangh Yizboh haj bi, songde cungj dwg vunz bonjdieg. Fangh Yizboh hwnjban le, caeuq lingh boux husw Dangz Siujdingz doxgap ndaej ceiq ndei, songde caemh gwn caez youq. Aen yihyen iqet neix couhdwg seiq boux neix “danggya”, gyoengqde ngoenznaengz doxbang doxgiet, gij saedceij gvaq ndaej haemq doxhuz doxonj.

Aen yangh neix liz yienhsingz miz betcib sam goengleix, baez gvaq dah couhdwg lingh aen yienh, gij saedceij vunzmbanj gvaq ndaej hoj di. Moix ngoenz roengzban le, Fangh Yizboh cungj haengj youq henzgaenh byaijbyaij. De roxnyinh gizneix cawz- liux diuz haw geijcib mij haenx miz gaicawx, lij miz cwngfuj、yihyen、hagdangz daengj geij aen danhvei iqetet le, gizyawz dieg wnq caeuq ndaw mbanj ca mbouj geijlai. Daengx haw moix aen danhvei bouxvunz guhhong gig noix, lumj duz roegbeih nei, yienznaeuz iqetet, hoeng ndaw dungx yienghyiengh cungj miz. Fangh Yizboh byaij saek geij baez couh sug liux lo, menhmenh couh roxnyinh mbwq lo.

Fangh Yizboh moix ngoenz hwnjban roengzban, aen yangh neix baez sam ngoenz baenz ngoenzhaw, ngoenzhaw cij miz saek boux vunz- bingh daeuj aeu di yw dwgliengz, boux binghnaek cungj bae yen yihyen yawjbingh ywbingh lo. Mizseiz ndaej- hoengq, de hix bae haw byaijbyaij, cawx di byaek, yawj gyoengqvunz Mbanjcuengh cinghseuq lauxsaed baebae dauqdauq, cimh huq gangj- gyaq guh gaicawx…… Cijmiz seizneix de cij rox miz di nauhyied. Gyoengqvunz haetromh byaij sam seiq goengleix daeuj ganj haw, cawx ndei gijgwn gijyungh, youh gaenjgip ganj maranz lo. Ndigah, ngoenzhaw baez daengz banringzgvaq couh sanq lo, gij nauhyied hix couh sanq lo. Caj vunz sanq le, gwnz haw iqetet neix youh dauq caemrwgrwg moq lo.

Fangh Yizboh daj iq couh youq ndaw yienhsingz majhung, de youq gizneix guhhong gvaq saedceij, roxnyinh ca ndaej hung lai, caen miz di gwn youq mbouj gvenq, baenzneix de miz di naiqniekniek, guh maz cungj mbouj miz rengz. Caiq baenzneix guh roengzbae, mboujdan mbouj miz cinbu, vanzlij sai gij seizgan seizcoz bonjfaenh bae dem. Baez siengj daengz neix, de couh fan bae boek dauq ninz mbouj ndaek.

Caenh neix, Lij Dungh cingq siengj aeu Fangh Yizboh guh dahyoux. Aenvih Fangh Yizboh caeuq Dangz Siujdingz caemh gwn caez youq, Lij Dungh vihliux hawj Fangh Yizboh mbouj baenzneix najmong, guh maz bae gyawz cungj swnh miz faenh Dangz Siujdingz. Raen Fangh Yizboh mbwq lai, de couh siengj banhfap ciq saw daeuj hawj Fangh Yizboh caeuq Dangz Siujdingz yawj, roxnaeuz bae co denyingj gvanghdez daeuj cuengq hawj song dah neix yawj. Ndaejhoengq couh cawx noh ceuj byaek hawj song dah neix gwn, roxnaeuz daiq song dah neix bae henz dah youzraemx、ep bya……

Lij Dungh yienghneix guh, dauqfanj hawj Dangz Siujdingz dem liux haujlai maqmuengh caeuq yousim.

（1）