Haeuj doeng le, Linzgvei Yen Veisenh Cin Mbanjgaeuq ranzranz hohhoh couh nyaengq guh bitbenj lo. Mbanjneix dwg aenmbanj Veizcuz, guh bitbenj dwg gij conzdungj mbanjde.

Byaij haeuj Mbanjgaeuq lumj byaij haeuj aen seiqgyaiq bitbenj ne. Bakdou、laengranz、gwnz dingjranz、laj roqranz、gwnz diegdangz daengj, gizgiz cungj ndaej raen bitbenj, seizseiz cungj nyouq raen gij heiq rang bitbenj, gij ciengzmienh neix youq laj ndit seizdoeng gig sekda. Caih mwngz byaij haeuj ranz lawz, cungj ndaej raen gyoengq vunz ndeu swiq bit、ciemz bwnbit、dak bit, aen ranz ndeu couhdwg aen diengzhong iq ndeu…… Byaij hwnj gwnzlaeuz bae, cix raen gwnz dingjranz cungj venj roxnaeuz baij miz ndangbit、gabit daengj. Aen mbanj neix caen dwg aen mbanj bitbenj dahraix.

Ranz Bwz Senhli dwg aen ranz hung guh bitbenj ndeu, daj dingjlaeuz ranzde yawj coh daengx mbanj, caenh raen dauqcawq cungj miz bitbenj, aiq miz fanh lai duz yienghneix. Gij laeuz ndawmbanj seiq mienh doeng rumz, neix caeuq laeuz gizwnq mbouj aiq doengz geijlai. “Neix dwg vihle guh bitbenj couh cienmonz hwnqbaenz yienghneix ho.” Bwz Senhli riu dwk naeuz. Bi 2007, ranzde baengh guh bitbenj rom ndaej di ngaenz he, doeklaeng de couh aeu 40 fanh maenz hwnj le aen ranzlaeuz seiq caengz yienghneix. Song caengz baihgwnz aeu bae guh aen dieghong bitbenj. Aenvih bitbenj yaek aeu langh nanz, ranzlaeuz seiqmienh cungj aeu doeng rumz cijndaej, ndigah de youq gwnz dingjlaeuz gang le aen bungz ndeu re fwn, yienghneix couh ndaej youq laj bungz langh bit lo. Vunzmbanj cungj dwg baenzneix hwnj ranz, cienmonz hwnj bae langh bit, ndigah cungj ranzlaeuz neix cix heuhguh “laeuz bitbenj”.

Mbanjgaeuq guh bitbenj daj ciuhgeq daengz seizneix gaenq miz 200 lai bi lo. Moix bi daj liggaeuq ndwen cib doxbae, guh bitbenj ceiq habngamj lo. Vunz Mbanjgaeuq coengzlai cungj dwg ciuq gij dinfwngz conzdungj bae loengh, gij bitbenj gyoengqde guh okdaeuj haenx cix hom cix feih. Genj duzbit ma guh bitbenj caemh gangjgiu bw. Ciengx bit ni, yaek aeu haeuxraeh gueng baenz bi doxhwnj, yienghneix cij daj ndawde genj aeu duz ndangcangq de, yiengh bitlaux neix noh saed, baez langh de mbouj yungzheih bienqyiengh, baez gwn de gij noh mbouj yungz, feih raixcaix.

Gaj bit、myot bwn、swiq cengh le youh ciemz gij bwnnyungz、bwnsomz ok, heh gij nyauj caeuq byaifwed okdaeuj, buq dungx le dawz dungxsaej ok, yienghneix bu bingz uet liuh le caiq cuengq roengz aenboemh bae iep baenz hwnz baenz ngoenz. Gij Laeujsamva aeu ma iep bit haenx dwg vunz bonjdeih gag ngauz he, rangfingfing, youh saw youh swnh, mbouj haemz mbouj manh. Iep ndaej le cix aeu gaen mbaeq uet naengbit seuq bae, couh dawz hwnj benj bu bingz, langh nit langh rumz dinghyiengh.

Deq naengrog loq hawq di he couh aeu diuz faexcuk ndeu cengq hai aek bit, mbouj hawj daengx duz bit bienqyiengh, caiq fonj mbiengj wnq langh dak, dak ca mbouj geijlai le couh ndaej venj hwnj gwnz faexsaux bae langh rumz lo. Mwh langh bitbenj aeu yawj mbwn miz maz bienqvaq、rumz daj gizlawz daeuj bae senj dieg langh, baujmaenh saeknoh bitbenj dak ndaej yinzndei. Gvaqlaeng caiq aeu feiz bae gangq cijndaej. Yienghneix guh yaek miz buenq ndwen doxbae cijndaej gwn. Guh bitbenj aeu miz gingniemh miz naihsim, ndigah vunz naeuz “gwn bitbenj yungzheih, guh bitbenj hoj”. Bitbenj heiq rang ndeiyawj, baez geux de miz di youz he hoeng mbouj raen nywnx, gwn sat cungjlij siengj gwn dem.

Vunzmbanj naeuz, bak bi doxdaeuj, gyoengq- vunz cungj maij cawx bitbenj ma guh nienzhuq. Doenghbaez daihgya dwg gag guh gag gwn, aenvih bitbenj youh rang youh ndeigwn, vunzrog cungj caz cam gij huq neix gai mbouj gai. Daj 20 sigi 80 nienzdaih doxdaeuj, vunzmbanj couh laebdaeb dawz bitbenj okrog bae gai lo. Gajlaeng, gyoengqde youh ciuq gij dinfwngz guh bitbenj bae loengh gij saejbit、dawbit、nyaujbit daengj. Neix mboujdan hawj gij huq bitbenj engq laiyiengh, lij ndaej hawj vunzmbanj demsou.

Gyawj geij bi neix, bitbenj canjnieb caen dwg yied guh yied hoengh. Lij miz vunzmbanj youq gwnzmuengx dajgai gij huq neix. Baengh aen canjnieb bitbenj, vunzmbanj menhmenh bienq fouq lo, doengh aen “laeuz bitbenj” moqsaksak haenx bienqbaenz gij gingjsaek ndei ndawmbanj. Seizneix gyoengqvunz cingq ngeix dwk baenzlawz hawj gij huq conzdungj neix gai ndaej engq lai、gij canjnieb bitbenj guh ndaej engq hung.