Dahyenh buen doxgaiq haeuj dieghong bae lo, gizneix bouxsai lai, mehmbwk noix, miz saek boux mehmbwk, hix dwg riengz bouxgvan itheij. Gyanghaemh ninz youq aen laeuz caengz guh baenz haenx, seiqlengq hoengqhanghang, rumz ci haeujdaeuj yiengjhuhu, liengzsubsub, Dahyenh daengx ndang hwnj naeng- gaeq.

Baenzhwnz, Dahyenh mbouj gamj laep lwgda, haetlaeng hwnqdaeuj naiqnueknuek, hoeng de cengqgengz guh gij hongnaek. Haemhhaemh ninz mbouj ndaek, de ndangdaej nyieg lo, hix gwn mbouj roengz, mbouj miz geijlai rengz guhhong, seizseiz deng boux hongdaeuz najndaem vetndaq.

Haet daihloeg, boux hongdaeuz naeuz Dahyenh:“Geij ngoenz neix mwngz guhhong ndaej gij ngaenz neix, mwngz daj gyawz daeuj, couh gvaq gizde bae.” Gangj sat ndenq bak maenz ngaenz he hawj Dahyenh.

Dahyenh aemq daeh mbouj rox gvaq gizlawz bae, de byaij youq gwnz loh, ci bae vunz dauq, fajfaj naj sengsatsat, mbouj miz vunz haeujsim de, hix mbouj miz vunz rox ndawsim de naemj maz. Dahyenh byaij daengz gwnz giuz, ing youq bangx lanzganh, muengh raemxdah laefoedfoed bongh baenaj, “danghnaeuz gou dwg duj raemxlangh he couh ndei lo, swyouz cwxcaih lae coh ndaw haij bae, mbouj rox yousim.” Dahyenh gag gangj gag naeuz.

“Vei, mwngz dahsau neix yaek guh maz, miz maz naemj mbouj doeng caeuq gou gangj!” Sawqmwh, Dahyenh dingqnyi sing hat he daj baihlaeng rongx gvaqdaeuj, faj fwngz hung miz rengz he rag de gvaq mbiengj ndeu bae. Dahyenh baez yawj, dwg daegcoz ndang reux naj hausek he, henzndang dingz aen cimozdoz ndeu.

“Mwngz cam gou guh maz, gou cam mwngz siengj guh maz cij deng, gou youq neix yawj funghgingj, ngaih mwngz maz saeh!” Dahyenh hozhwnj foedfoed.

“Gou laihnaeuz mwngz miz maz saeh naemj mbouj doeng lo, siengj diuq roengz giuz bae ne.” Daegcoz riuhehe naeuz. Daegcoz yied riu, Dahyenh couh yied naemj hwnj gij saeh mbouj swnhsim haenx, yied naemj couh yied hozgaek yaek dai.

“Gou lij nienzoiq, roxnyinh caengz ndaej lix gaeuq ne!” Dahyenh sing hung naeuz, baez riuj daeh couh byaij bae. De geiq maenh gij vah daxmeh, ciengeiz gaej caeuq vunzseng gangj vah, daegbied dwg bouxsai.

Ngamq byaij bae geij yamq, Dahyenh roxnyinh youh baeg youh iek, lienz vunz caeuq daeh boemz laemx youq gwnznamh.

“Dahsau, mwngz dwg mbouj dwg bungz daengz maz gunnanz lo, seizneix mwngz riengz gou bae gwn vanj raemxndat ndeu gonq.” Daegcoz haenx buet gvaqdaeuj, fuz Dahyenh hwnjdaeuj naengh gwnz cimozdoz de bae.

Dahyenh siengj euq, hoeng de gaenq mbouj miz rengz gangj vah. De miz di ienqhoij, siengj yaek diuq roengz cimozdoz bae, couhsuenq ga raek roxnaeuz dai bae hix mbouj lau. Hoeng de roxnyinh daegcoz neix hix mbouj lumj vunzrwix, bae daengz dieg caiq gangj.

Aen cimozdoz daengz aen laeuz gaeuq song caengz buenq he dingz roengzdaeuj, daegcoz naeuz:“Neix dwg ranz gou, bohmeh caeux couh gvaqseiq lo.” Dahyenh roxnyinh dungx iek raixcaix, mbouj dap vah, lwgda yawjyawj seiqlengq.

Daegcoz muengz cawj doxgaiq hawj Dahyenh gwn. Dahyenh gaemz hung gwn sat, raen daegcoz caen mbouj lumj boux simyak, cam de heuh maz coh? Guh maz hong? Daegcoz naeuz de heuhguh Daeghangz, gauh- cungh bizyez le, couh gaen vunz guh canghsiuh, dwg hawj bangxciengz gyanj hau, seizneix miz geij bouxvunz caeuq de guhhong. Ciepdwk Daeg- hangz youh doiq Dahyenh naeuz, danghnaeuz mbouj yiemz, goj ndaej youq gizneix bang gyoengq vunzgoeng de dajcawj, ngoenz cawj sam donq, ndwen ndaej bet bak maenz, bau dieg gwn dieg youq.

Dahyenh baez dingq, cadi diuq hwnjdaeuj, doq naeuz couh baenz. Naemjnaemj gij saeh caenh neix bungz daengz, Dahyenh soeng le gaemz heiq ndeu.

Dahyenh ndawsim lij roxnyinh ngeizvaeg, youh cam Daeghangz:“Sou vunz ndaw singz naengnoh hausek, hix guh ndaej cungj hong neix?”

Daeghangz riu naeuz:“Hong mbouj faen ndei yak, cijaeu canh ngaenz lai, habfap, maz hong guh mbouj ndaej?”

Youq dieghong dajcawj hawj geij boux vunzhong gwn, Dahyenh rox- nyinh gig soeng. Gvaq ndwen ndeu le, bet bak maenz couh haeuj fwngz Dahyenh lo. Dahyenh dawz gij ngaenz neix lumh bae lumh dauq, dawz caet bak maenz geiq hawj daxmeh, ce bak maenz ngaenz gag yungh.

Ngoenz ndeu, Dahyenh doiq Daeghangz naeuz:“Daeghangz, gou mbouj siengj dajcawj lo, gou hix siengj hag gyanj ciengz, neix canh cienz lai di.”

“Gijneix dwg hong naek hong uq, mbouj hab mehmbwk guh.” Daeg- hangz naeuz.

“Caez dwg bouxvunz, sou bouxsai guh ndaej, gou hix guh ndaej.” Dahyenh naeuz.

“Dahyenh, yienghneix ba, daengz seiz guhhong mwngz couh guhhong, daengz seiz cawj gwn mwngz couh cawj gwn, ndwen hawj cien haj maenz hawj mwngz.” Guh song yiengh hong lai ndaej boix cienz, Dahyenh angq dwk han lo.

Dahyenh ndang cangq ga maengh, miz rengz caemh mbouj lau sinhoj, ndaw ciengz rog ciengz de cungj guh ndaej. Guhhong rog ciengz seiz, muengh gij ranzlaeuz sangvidvid, mbangj bouxsai lij naemj mbouj rox daj gizlawz bin hwnj gwnz gaq bae. Dahyenh lawq cungj mbouj lawq, lumj duzlingz nei riengjret raih hwnjbae. Gyoengq bouxsai raen le, mbouj ndaej mbouj hix bin hwnjbae, gyoengqde naeuz:“Guhhong mbouj gvaq meh- mbwk, najmong lai lo!”

Guhhong rom ndaej cienz, ranz Dahyenh guh ndaej ranzlaeuz moq lo, hix ndaej soengq daegnuengx caeuq dahnuengx bae doeg daihhag, ndaw mbanj bouxboux doeksaet caez. Gyoengq vunzmbanj cam Dahyenh, ndaej daiq gyoengqde caez bae guhhong ra ngaenz lwi? Dahyenh naeuz:“Ndaej, cijaeu mbouj lau dwgrengz, yiengh lawz guh ndaej cienz, habfap, raeuz couh bae guh yienghde.”

Gyoengq vunzmbanj gij bouxcoz cungj riengz Dahyenh bae caeuq Daeghangz guhhong, Daeghangz canh ngaenz, Dahyenh caeuq gyoengq beixnuengx ndaw mbanj guhhong hix ndaej ngaenz lai. Ndaw daeh miz ngaenz aen hwet cij soh, gyoengq vunzmbanj cungj cek ranzvax bae guh ranzlaeuz moq, bouxboux naj haifwngfwng.

Ngoenzhaenx gwnzbyonghngoenz doek fwnmoenq, Dahyenh cingq nyaengq guhhong, Dahgingz daeuj ra Dahyenh, naeuz de geij bi neix haq vunz seng lwgnyez le, bouxgvan hix baenzbingh lo, ndawranz yiengh- yiengh aeu yungh cienz, ndaej mbouj ndaej caeuq Dahyenh caez guhhong?

Dahyenh han ndaej sangjswt, Dahgingz dauq miz di mbouj ndei eiseiq lo, najnding naeuz, gaxgonq de dungxgaeb yawj mbouj ndaej gyae, cij yawj byai din, mbouj nyienh daiq Dahyenh okdaeuj ra hong, doiq mbouj hwnj lo.

Dahyenh riuhaha naeuz:“Gij saeh gaxgonq gou caeux lumz bae lo, mwngz lij naemj gijneix guh maz.” Dahgingz dingq le, naj engq nding lo.

Mboengq ndeu, mbouj rox vihmaz, cungj mbouj raen miz vunz cingj Daeghangz lingx hong ma guh, miz vunz youq mbouj onj lo, naeuz yaek bae guh hong wnq. Dahyenh naeuz:“Gou sijsaeq cazyawj gvaq lo, seizneix guh canghsiuh cungj hong neix, cawz le rox gyanj ciengz hau, lij aeu rox cang raemx dienh caeuq bu cienmeng dem, yienghyiengh rox caez cij ndaej.”

“Dwg bw, yienghneix aen ranz he daj gyanj ciengz hau laebdaeb guh roengzbae, bouxcawj ndaej simsoeng, raeuz hix canh ngaenz engq lai.” Daeghangz doq singjset gvaqdaeuj.

Hag sug cang raemx dienh caeuq bu cienmeng le, Daeghangz engq miz hong guh lai lo, lajfwngz miz geij bak vunz guhhong, dingzlai dwg vunz mbanj Dahyenh, vunz mbanj wnq hix miz. Doeklaeng bouxboux miz cienz youq yienhsingz cawx ranz, bouxboux miz ciiq hai.

Dahyenh caeuq Daeghangz youq ndaw ndwenngoenz raezrangrang menhmenh miz cingzeiq, song boux doxaeu lo, neix dwg vahlaeng.

Miz vunz naeuz Dahyenh:“Miz baenzlai cienz, seiqneix mbouj you maz lo.”

Dahyenh riu naeuz:“Baenzlawz mbouj you, gou seizneix yaek ndaej hajcib bi lo, lij aeu soengq song daeglwg doeg daihhag. Gyoengqde doegsaw okdaeuj le, gou lij yousim gyoengqde baenz mbouj baenzcaiz, ndaej mbouj ndaej vih guekgya raeuz okrengz ne! Gaxgonq raeuz bouxlaux miz rengz ndwi mbouj roxsaw geijlai, seizneix ciuhlwg ciuhlan raeuz cawz le ndangdaej ndei miz rengz, hix aeu rox saw lai cij ndaej bw, miz rengz youh roxsaw, neix cij suenq ak.”

“Hahaha……” Gyoengqvunz baez dingq sing riu goksadsad.

（2 sat）