6 nyied 3 hauh, Lungzswng Gak Cuz Swciyen youq Swsuij Yangh Swsuij Cunh Mbanjmyauz Siujyenz guh aen Cietlozdouh. Vahmyauz “lozdouh”eiq- sei dwg naeuz ndaemnaz. Ciet neix bonj dwg gij ciet conzdungj Myauz- cuz Swsuij Cunh, doeklaeng gak minz- cuz ciemhciemh doxgyau doxyungz le, daengx mbanj gak cuz beixnuengx cungj gvaq aen ciet neix lo. Ngoenzde, gak cuz vunzlai caez bae rauqnaz ndaemnaz、mo bya、caij maxfaex、daem ceiz daengj. Gyoengqde guh yienghneix bae mbaenjgouz fwnraemx cuk、gohuq maj ndei sou ndaej lai, caemhcaiq angqhoh Cunghgoz Gungcanjdangj laeb ndaej 100 hopbi. Gyawj geij bi neix, Mbanjmyauz Siujyenz yawj dieg guh swnghdai lijyouz, lumjbaenz aeu ranz nungzhoh guh rug hawj hek youz youq、youq ndawhaeuxnaz ciengx bya daengj, byaijok diuzroen aeu “haeux bya sou ndaej lai、swnghdai、ginghci hwngfat” bae guhhoengh aenmbanj siujsoq minzcuz ndeu.

（Vuz Swnghbinh Vuz Siuhyi / 吴生斌 吴肖裕）