Bonjbauq siusik （gicej Cau Dwzfeih） 5 nyied 28 hauh, Swcigih Gyauyuzdingh、Swcigih Yinzliz Swh- yenz Sevei Baujcangdingh、Swcigih Caizcwngdingh caeuq Swcigih Benh- ban lienzhab fat le 《Gij Dunghcih Mizgven Guhndei Hong Ciusou Hag- Seng Guekgya Ok Cienz Dinghyiengq Son Guh Lauxsae Cuengh Gun Song Vah Saw 2021 Nienz》, 2021 nienz Guengjsae yaek youq daengx gih ciusou 73 boux hagseng guekgya ok cienz dinghyiengq son guh lauxsae Cuengh Gun song vah saw siujyoz, gauhcungh bizyez bae doeg conhgoh.

Ciuq cam rox, baez son’gyauq neix dwg Nanzningz Swhfan Dayoz、Guengjsae Minzcuz Swhfan Yozyen rapdawz gij yinvu son’gyauq; gij hag- seng ciusou aeu dwg hagseng gauh- cungh bizyez gyaez aendangj caeuq gij saehnieb gyauyuz beksingq, ndiep- gyaez hong gyauyuz, ndangcangq、rox gangj Vahcuengh（baugvat Vahcuengh bonjdieg）, dwg vunz Guengjsae youq gih raeuz camgya 2021 nienz buj- dungh gauhgauj dungjgauj, gauhgauj faensoq daengz diuzsienq gauj ndaej hwnj gauhciz gauhconh Guengjsae 2021 nienz. Aen gungganq dajveh 2021 nienz caeuq bi wnq miz di mbouj doengz: It dwg gaxgonq aeu bae laj- mbanj youq siujyoz roxnaeuz diemj- sonhag son Cuengh Gun song vah saw 8 bi doxhwnj, bineix gaij baenz 6 bi doxhwnj; ngeih dwg bineix yaek youq daengx gih hamj si、yienh(gih) ciusou hagseng, mbouj dan youq aen si、 yienh(gih) dinghyiengq ciusou hag- seng.