Dahloegyaz diuz dahnga Dahbeigyangh con gvaq ndawmbanj, song hamq fwjmok ngeungeu, ndoeng faexcuk、faexsamoeg mwncupcup、heucwdcwd, baenz gan baenz gan laeuz hwnq youq henz nazmbaeklae henjrwkrwk haenx. 9 nyied, Mbanjmyauz Yijbuz cingq deng seiz dajsou, lengqlengq cungj gyaeu dwk lumj fukveh nei. Loz Yaujlinz, boux daih’it suhgi Mbanjyijbuz caemh sim’ angq dangqmaz. Aenvih ndawmbanj gyoengq mehmbwk laeng aen dieggiek yienh gaep cauhnieb fuhva caeuq aen dieggiek ciepcienz nyumxlab Myauzcuz ndaej bae Liujcouh、Nanzningz langhbaij gij makbaenz gyoengqde. 6 boux vunz 18 cungj doxgaiq bae camgya doxdax, aeu ndaej si gaep aen gimciengj、song aen dungzciengj caeuq swcigih gaep song ngaenz song dungz caeuq aen youhsiu ciengj ndeu. Mbanjyijbuz cawjdaeuz dwk fukbaiz miz daegsaek minzcuz、haenqrengz hwngfat lijyouzyez, aeu ndaej ciengj doiq gyoengqde ma gangj dwg gienh saeh ndei ndeu.

Mbanjyijbuz dwg aenmbanj gig miz daegsaek Myauzcuz ndeu, gyaeujvunz Myauzcuz ciemq gyaeujvunz daengx mbanj 95%. Gij minzsug vwnzva lumj ganranz Myauzcuz、dajndaem、buhvaq、dajgwn、aenvenz、daeuq max daengj cungj ce ndaej haemq ndei. Mbanj neix baengh gij gingjsaek gyaeundei caeuq yienghndei Myauzcuz naekna haenx haiguh aen Gingjgih Yijbuz Mbanjmyauz, youq Yungzsuij dwg aenmbanj hwngguh lijyouz haemq caeux ndeu. Bi 2006 ndwen 11, aen gingjgih neix ndaej bingzguh “daengx guek aendieg guhyiengh guh nungzyez lijyouz”, bi 2010 ndwen 11 cix ndaej bingzguh “guekgya gaep AAA gingjgih”. Mbanjbuzling, aen Mbanjyijbuz guenj haenx youq bi 2012 aeu ndaej gij mingzdaeuz “aenmbanj mizmingz aencin mizmingz” swcigih, bi 2014 lij aeu ndaej gij mingzdaeuz “Cunghgoz aen mbanj miz gij daegsaek siujsoq minzcuz” dem.

Loz Yaujlinz cap mbanj gaenq ndaej song bi buenq lo, de yawj dwk aen mbanj iq neix hwngfat hwnjdaeuj. Daj diuz roen ndawmbanj bienqbaenz roen siujniz doxdaeuj, gingjgih bienq ndaej engq gyaeu lo, hekyouz caemh haemq lai lo. Daj bi’gvaq doxdaeuj, mauhgvaq 11 fanh vunz daeuj daengz gizneix guhcaemz, gingjgih canjciz 500 lai fanh maenz. Ndawmbanj an le lohdaeng daiyangznwngz, gyanghaemh de byaij youq ndawmbanj, raen lai rongh haujlai, yienghneix doiq vanzging ndei, bae dienh noix hix haemq ancienz.

Mbanjyijbuz ndaej guh ndei gij sezsih giekdaej dwg aenvih Yungzsuij dinghvih ndaej cinj, mbanjde caiq baengh gij swhyenz lumj gij daegsaek siujsoq minzcuz daengj roengzrengz guh lijyouz. Bi 2005, yienh neix aeu 50 fanh maenz cingj le Dungzci Dayoz Gveihva Sezgiyen bien ok bonj 《Aen Gveihva Baujhoh Gij Mbanj Minzcuz Yungzsuij Myauzcuz Swciyen》, bi 2012 couh haifat ranzmbanj daengx yienh, dazyinx gyoengqvunz cauhguh ranzmbanj Myauzcuz.

Bi 2017, yienh neix ok le 《Yungzsuij Myauzcuz Swciyen Gij Banhfap Camhseiz Baujhoh Caeuq Hwngfat Gij Ranzmbanj Miz Daegsaek Siujsoq Minzcuz》, ndawde gvendaengz baenzlawz nyinhdingh aenmbanj miz gij daegsaek siujsoq minzcuz、gveihva、douzswh、guh canjnieb、yienghceij aenmbanj、siufuengz ancienz、hoh ndei swnghdai vanzging、swnghcanj gwndaenj daengj.

Gyawj geij bi neix doxdaeuj, gak bouhmonz caeuq vunzmbanj caez sim comz rengz bae cauhguh doengh gij sezsih giekdaej lumjbaenz aen doumbanj Myauzcuz、diuz roqranz yawj gingj、diuz saeu aenvenz、diegdangz aenvenz、diuz mieng、diengzhaex daengj. Daengx mbanj bienq ndaej engq caezcingj gyaeundei, engq miz gij daegsaek minzcuz lo.

Aen gingjgih Yijbuj engq miz mingz, lijyouz canjnieb hix guh ndaej engq hoengh, haujlai vunzmbanj cungj ndaej gwn gij “haeux lijyouz”. Gyoengqde guh gij canjnieb lumj biuriuz、dajndaem raet faexcuk、youq ndawndoeng ciengx gaeq daengj. Gij gingjdiemj lijyouz caeuq nungzgyahloz daiqdoengh le 54 hoh ranzgungzhoj 130 vunz demsou.

Bi 2018 ndwen 7, baihgwnz bued le 50 fanh maenz ngaenz cizdij ndawmbanj roengzma, Vunzmbanj Hozcozse Mbanjyijbuz aeu gij cienz neix cawx le gij gujfaenh Lungzyij Sanhcangh, ndawmbanj couh miz cizdij ginghci lo. Daengz bi 2019, mbanj neix miz 98 hoh 406 vunz ndaej duetgungz, bi 2015 gungzhoj fatsenglwd daj 30.40% roengz daengz 1.80%, bi 2019 daengx mbanj cungj ndaej duetgungz liux lo. Bi 2020, cizdij ginghci ndawmbanj sou haeuj 26.1 fanh maenz.

Mbanjmyauz ndaej duetgungz le, baezlaeng yaek baenzlawz byaij ne? Daengx yienh gak mbanj cungj guh lijyouz liux, Mbanjyijbuz aeu baenzlawz laebdaeb guh roengzbae ne? Loz Yaujlinz caeuq gizyawz gunghcoz duiyenz cungj ngeix bae ngeix dauq.

Loz Yaujlinz ngeix daengz gij dinfwngz conzdungj guh buhvaq Myauzcuz、daemjrok、nyumxlab. Bi 2020 ndwen 5 ngoenz 1, aen gunghswh Liengz Siujcez bouxciepcienz guh dinfwngz buhvaq Myauzcuz cauhlaeb haenx couh bienqbaenz ndawyienh aen dieggiek cauhnieb fuhva lo. Aen dieggiek neix gungh sou le 31 hoh vunz (miz 17 hoh dwg ranzgungzhoj), caiq cujciz doengh boux mehmbwk dawzranz fwngzsoem de siuqva、daemjrok, gai gij doxgaiq gyoengqde guh haenx.

Vunzmbanj ndaej youq ndawde gai huq, doengh boux mekmbwk dawzranz youq bakranz couh miz hong guh、ndaej demsou, youh ndaej ciepcienz caeuq fatyiengz gij dinfwngz minzcuz dem. Loz Yaujlinz mbouj rox guh gijneix, hoeng de roxnyinh gij doxgaiq neix ndei dangqmaz, ndigah de guh bouxdaemxcengj he. De gaenxmaenx bae ra gij bouhmonz doxgven, doeklaeng coibaenz aen dieggiek youq Mbanjyijbuz an’ gya.

“De ak raixcaix, guh gijmaz cungj siengj baenzlawz hawj ndawmbanj bienq ndaej engq ndei.” Liengz Siujcez yienghneix haenh Loz Yaujlinz. Mwh ngamq hainduj guh cix mbouj miz ngaenz, ndaw dieggiek lienz daizdaengq cungj mbouj miz, dwg Loz Yaujlinz caeuq song boux duiyenz cap mbanj bae danhvei bangbaengh haenx ceng’aeu buek daizdaengq ma.

Liengz Siujcez bineix ndaej 49 bi, dwg swcigih gaep feihyiz bouxciepcienz gij dinfwngz guh buhvaq Myauzcuz、“Lauxcangh Liujcouh”、bouxdaihsae gunghyi meijsuz Liujcouh Si. De 13 bi couh hainduj hag Siuqmyauz lo, bi 2006 de youq Mbaujyijbuz hai aen diengzhong guh buhvaq Myauzcuz, gij doxgaiq de siuq haenx lij aeu ndaej guekgya ciengj. Lumj bi 2020 “funghvuengz gim” doxdax cauhmoq sezgi doxgaiq aeu ndaej gimciengj. Haujlai vunz cungj coi de bae ndawyienh roxnaeuz ndawsi hai diemq, hoeng de mbouj maij. “Gou siengj louz youq mbanj dou, miz hek daeuj gou lij ndaej guh bouxgangjgaij he, hawj vunzwnq cungj rox gij vwnzva Myauzcuz dou. ”

Liengz Siujcez gangj, gij dinfwngz Mbanjyijbuz youq gwnz lizsij gig mizmingz, gaxgonq seiqhenz mbanj lij aeu gij baengz ndawmbanj ma guhyiengh. Daengx yienh caenh gag Liengz Gveiciuh caeuq boux lwgbawx de Gyaj Yaz rox guh nyumxlab Myauzcuz conzdungj lo. Gij faexsamoeg、raiz aennyenz、va daengngoenz daengj yienghraiz gyoengqde veh haenx cix dwg Yungzsuij gag miz. “Danghnaeuz songde mbouj guh lo, doengh gij yienghraiz neix couh aiq raeg lo.”

Vihle hawj gij dinfwngz conzdungj ndaej ciepcienz, Liengz Siujcez sou le lwgsae, baengh aen dieggiek bae doigvangq gij Baengzmyauz、Siuqmyauz、nyumxlab, daiqdoengh gij beixnuengx fwngzsoem de bae doxdax. Caeuq doenghbaez gag bae doxdax mbouj doengz, mbat neix dieggiek miz geij boux cejnuengx doengzcaez bae doxdax, mbangjboux mbat daih’it bae couh aeu ndaej ciengj ma, neix hawj de roxnyinh gig miznaj. “Gaxgonq mbouj caengz camgya gvaq, ngeiz swhgeij guh ndaej ndei mbouj ndei ne? Swhgeij yawj mbouj hwnj swhgeij, couh engqgya mbouj miz vunz yawj ndaej hwnj mwngz lo. Seizneix bae doxdax, guekgya、cwngfuj yawj ndaej hwnj gij doxgaiq dou, aensim gou angq dangqmaz.” De maqmuengh minzcuz vwnzva hwngfat ndaej engq ndei, dinfwngz cij miz vunz ciepcienz, de doiq baezlaeng Mbanjmyauz hwngfat gig miz saenqsim.