Ndit ndatfwgfwg, hoengheiq lumj giet baenz ndaek ndeu nei, aeng’wtwt, mbouj miz saekdi rumz, hawj vunz diemheiq mbouj ndaej. Dahyenh ngaemgyaeuj gwq vat gumz haeux- yangz, hanh daj gwnz naj ndik roengzdaeuj, de aeu genbuh baez mad, youh laebdaeb ngaemgyaeuj guhhong.

Mbiengj reih baihhaenx, dah- nuengx dwk ceh haeuxyangz, daxmeh vanq bwnh roengz gumz, daegnuengx gaem gvak moek ceh, seiq boux caemrwgrwg mbouj gangj saek coenz vah, caenh dingqnyi gij sing faggvak caeuq namhrinreq doxbungq cienz haeuj rwz.

“Meh, gou mbouj siengj bae doegsaw lo, geij ngoenz neix gou naemj bae baihrog dajgoeng rom ngaenz, cungj beij youq ranz daj- ndaem ndei, caiq naeuz daegnuengx dahnuengx doegsaw aeu yungh cienz lai.”

“Dahyenh, mwngz doegsaw mbouj lai, okrog ra hong nanz. Couhsuenq ra ndaej hong hix dwg guh gij hong naek hong uq haenx.Yienznaeuz boh mwngz mbouj youq lo, gou lij aeu cengqgengz soengq mwngz doeg roengzbae.” Daxmeh doq vanq bwnh doq naeuz.

“Gou caen mbouj siengj doeg lo, gou mbouj siengj vaih cienz vaih haeux ndawranz.” Dahyenh caeuq daxmeh youq ndaw reih doxeuq baenz buenq ngoenz, daxmeh euq mbouj gvaq. “Mwngz siengj bae gyawz couh bae, daengzcog gwn vei gaej gvaiq gou.” Daxmeh cijndei baenzneix naeuz.

Daj daxboh baenzbingh gvaqseiq le, daxmeh sinhoj ciengx Dahyenh gyoengqde sam beixnuengx, Dahyenh dwg dahdaih, de siengj bang daxmeh rap di rap.

Geij ngoenz gonq, Dahgingz ndaw mbanj ngamq daj Gvangjcouh maranz, Dahyenh hix riengz vunzlai bae ranz de guhcaemz gangjgoj. Dah- gingz cang ndaej hawj vunz simmaez, daenj geu vunjsaeng saekhau he youh mbang youh rongh, byoemgyaeuj hix nyumx ndaej henjlamlam, gienj nyungq lumj aen rongzgaeq nei. Dahgingz naeuz, de youq Gvangjcouh haeuj aen gunghcangj ndeu guh daehnaeng, hawj gwn hawj diegyouq, moix ndwen lij canh ndaej bit cienz hung ndeu dem. Dahyenh dingq ndaej hozhaenz raixcaix, cam Dahgingz ndaej daiq bonjfaenh bae Gvangjcouh guhhong lwi? Dahgingz naeuz daiq vunz okrog miz di mazfanz, aeu naemjnaemj gonq.

Ngoenzcog Dahgingz youh aeu bae Gvangjcouh lo, Dahyenh caiq bae camcam, yawjyawj ndaej mbouj ndaej riengz de guhdoih bae.

Byaij haeuj ranz Dahgingz, Dah- gingz cingq caeuq daxsauj de nyaengq cawj ngaizhaemh.“Gingz, ngoenzcog ndaej caeuq mwngz caez bae Gvangj- couh lwi?” Dahyenh cam naeuz.

Caengz caj Dahgingz dapvah, daxsauj Dahgingz couh han naeuz:“Ndaw ndang miz ngaenz daengz gyawz cungj mbouj lau, mwngz mbouj rox gag dapci bae ha!”

“Gou caengz okrog bae gvaq, siengj caeuq Dahgingz guhdoih caez bae, daengz Gvangjcouh le, mbouj yungh heuh de ra dieggwn diegyouq, hix mbouj heuh de bang ra hong, mbouj mazfanz de law.” Gangj gij vah neix, Dahyenh roxnyinh aen sing cihgeij iqetet.

Dahgingz ngaemgyaeuj swiq byaek mbouj gangj vah. “Bak gangj ndaej baenz soeng, daengz seizhaenx couh rox lo!” Daxsauj Dahgingz youh vut coenz vah okdaeuj. Dahyenh dingq le, baenq ndang byaij deuz.

Gouz vunzwnq mboujyawx gouz cihgeij, Dahyenh haebhaeb heuj, oet geij geu buhvaq haeuj daeh, boux ndeu dapci okbae lo.

Mbat daih’it dandog okrog, Dah- yenh miz di lau. Youq gwnz ci, de mbouj gamj caeuq vunzwnq gangj vah, vunzwnq gangj maz de hix mbouj han, mbouj rox mbouj nyinh byonghhwnz couh daengz dieg lo.

Baez roengz ci, muengh dwk gyoengqvunz sam haj baenzgyoengq guhdoih lizbae, Dahyenh dinghdingh ndwn youq gizhaenx, mbouj rox yamq gvaq gizlawz bae. Ra dieg ninz youqgaenj. De ra aen lijgvanj ninz haemh ndeu gonq.

Ranz ngamq rongh, Dahyenh couh hwnqcongz lo. Gwn ngaizromh le, de couh aemq daeh bae ra hong lo.

Muenghmuengh aenaen ranz- laeuz sangvidvid, yawjyawj gyoengq vunz gyoengq ci gwnz gai baebae dauqdauq, Dahyenh roxnyinh gijneix geijlai nauhyied gyaeundei, hawj vunz ndawsim couxrim siengjmuengh.

Dahyenh byaij coh aen gungh- yezgih he, raen haujlai vunz byaij bae byaij dauq, sai mbwk cungj miz. Gyoengqde caenx youq bakdou gunghcangj yawj ciu mbouj ciu hong, mizmbangj gunghcangj ciu hong, mizmbangj gunghcangj vunz gaenq gaeuq mbouj caiq ciu lo. Dahyenh raen dahsau daep nganxciuq he gaem mbaw ceij he byaij okdaeuj, youq bangxciengz ngamq nem ndaej, gyoengqvunz couh humx gvaqbae ndaetfoedfoed. Dahsau daep nganx- ciuq haenx naeuz:“Daihgya gaej gip, riengz gou daeuj baizdoih ndei.”

Dahyenh buet gvaqbae baizdoih, ndaej baiz youq baihnaj, de song da muengh gvaqbae. Aeya! Bak lai vunz baiz ndaej raezrangrang ne. Dahyenh naemj: Caeklaiq buet ndaej vaiq, ngoenzneix miz maqmuengh lo. Dah- yenh doq naemj doq riu hwnjdaeuj.

Dahsau daep nganxciuq haenx daj gyaeuj daengz byai muengh gyoengqvunz baez ndeu, yienzhaeuh aeu fwngz vix bouxneix bouxhaenx okdaeuj. Dahyenh haenqrengz muengh bae coh dahsau haenx, maqmuengh ndaej heuh okdaeuj. Dahsau haenx lumj yawj mbouj raen Dahyenh nei, hamj gvaq de heuh vunzwnq. Da yawj gaenq miz ngeihcib lai boux dahsau okdaeuj lo, Dahyenh simgip lo, de baez daemhdin, ae sing ndeu. Seiz- neix, dahsau daep nganxciuq haenx muengh coh Dahyenh, naeuz:“Dou gizneix cij ciu 18 bi daengz 22 bi, mbouj ciu vunz laux baenzgya gvaq.”

Dahyenh aj bak yaek naeuz bonjfaenj gaenq ndaej 17 bi, mbouj- caengz geq hix caengz baenzgya ne. Vah caengz ok bak, dahsau daep nganxciuq haenx vadfwngz naeuz:“Ciu ndaej 30 boux lo, vunz gaenq gaeuq lo, baezneix caenh ciu lwgsau mbouj ciu lwgmbauq.”

Dahyenh muengh gij lwgsau ndaej bae dienz biuj, gyoengqde cawz le yiengh ndei ndang reux, ca mbouj lai dahdah ndangdaenj doxdoengz, geu buh dinjdet haenbingj, geu vaq gavaq gaebgebgeb, dawz diuz ga suek ndaej ndaetndetndet bae, lumj song diuz faexsaux nei sohsiusiu daengj youq gizhaenx.

Dahyenh ngaemgyaeuj yawjyawj gij ndangdaenj cihgeij, buhvaq gvangqlumlum, yienghsik dojdatdat caemhcaiq gaeuqgatgat, baez yawj couh rox ngamq daj lajmbanj daeuj, ndangdaej lij bizbwdbwd dem, hawj vunz laihnaeuz nienzgeq gaenq haq guh baz vunz lo.

Youh youq lijgvanj ninz haemh ndeu le, haet laeng, Dahyenh youh laebdaeb bae ra hong.

Dahyenh raen aen gunghcangj he ciuhong, haetneix mbouj miz geijlai boux daeuj ra hong, de ndawsim caeg angq, riengz cib lai boux vunz haeujbae mienhsawq lo.

Dahyenh caeuq gyoengqvunz naengh youq giz he, caj vunz dawz mbawbiuj daeuj dienz. Yaepyet, miz bouxsai ndeu daeuj lo, ndaw fwngz gaem dab ceij nanupnup ndeu, naeuz aen cangj neix ngaenzhong sang, ngaiz byaek mbouj yaez, diegyouq hix ndei, aeu fat mbaw sigienj gaujsi gonq, gauj ndaej ndei cij ndaej haeujdaeuj guhhong.

Dahyenh gaem mbaw sigienj baez yawj, dwg sij Yinghyij 26 aen cihmeh daihsij caeuq siujsij, lij miz cib lai diuz daez suyoz. Yied lau maz couh yied bungz maz, doegsaw seiz, Dahyenh ceiq lau Yinghyij caeuq suyoz lo, baezneix mbouj rox baenz- lawz guh.

Dahyenh gig vaiq sij ndei 26 aen Yinghyij cihmeh daihsij siujsij, suyoz ngamq guh seiq haj diuz couh mbouj rox lo. Dahyenh yawjyawj henz gyawj dahsau ndeu, raen de ngaemgyaeuj sij ndaej gig vaiq, Dahyenh siengj ndwn hwnjdaeuj yawjyawj mbaw gienj de. Cingqngamj bouxsai fat sigienj haenx byaij gvaqdaeuj, dahsau haenx hix haenqhaenq caengz Dahyenh mbat da he.

Baezneix, Dahyenh ra hong youh ra hoengq ndwi lo. Dahyenh naemj: Mbwn seng mbwn ciengx, mbouj saenq aen mbwn mbouj hai lwgda, yienghneix guh mbouj ndaej, cungj miz yienghde guh ndaej.

Ninz lijgvanj geij haemh lo, moix ngoenz lij aeu gwn ngaiz, ndaw daeh ngaenz yied daeuj yied noix, Dahyenh baenzhwnz ninz mbouj ndaek, gag naemj: Ngoenzcog itdingh aeu ra ndaej hong guh, mboujnex gaej gangj ra ngaenz, bonjfaenh cungj lix mbouj ndaej lo.

Baezneix, Dahyenh mbouj bae gunghcangj ra hong, de byaij coh dieghong. De raen bang vunz he cingq buen cien daek sa, cam naeuz lij aeu vunz guhhong lwi? Bouxsai faj naj ndaemndat he muengh Dahyenh mbat he, cam naeuz:“Mwngz caen guh ndaej gij hong neix?” Dahyenh muengz ngaekgyaeuj naeuz ndaej. “Ngoenz ngeihcib maenz bau gwn bau youq, ngoenzfwn ngoenzndit mbouj ndaej yietnaiq.”（1）