5 nyied 24 daengz 27 hauh, Swcigih Gyauyuzdingh youq Gveigangj Si Cinzdangz Gih haiguh bi 2021 aen hozdung dangciengz yawjhag doxlwnh Cuengh Gun sonhag daengx gih. Daengx gih gungh miz 100 lai boux conhgyah、lauxsae son’gyauq Vahcueng Vahgun haenx camgya. Hozdung baudaengz conhgyah guh gyangjco、ngonzyawj dangzgoq sonhag Sawcuengh、hagdangz langhbaij gij vwnzva minzcuz、doxgyau doxlwnh faenyiengj gingniemh daengj. Hozdung neix doidoengh hwngfat le aen saehnieb minzcuz gyauyuz, hawj gyoengq lauxsae engq rox baenzlawz son’gyauq Sawcuengh Sawgun, raiz ok bien moq bae roengzrengz gaijgwz gij son’gyauq song vah daengx gih.

（Vangz Yinz / 黄 云）