Sinhvazse Baekging 5 nyied 27 hauh dienh Youq mwh Cungguek Yizbau cauhbanh ok bauq 40 hopbi, Cunghgung Cunghyangh cungjsuhgi、guekgya cujsiz、Cunghyangh Ginhveij cujsiz Siz Ginbingz fak saenq bae hoh, caensim caen’eiq camnai daengxcungq ganbu cizgungh bause caeuq lauxhangz、baengzyoux guekrog.

Siz Ginbingz youq ndaw saenq naeuz, 40 bi doxdaeuj, Cungguek Yizbau fatok gijndei bonjfaenh, gaenxmaenx senhconz gaisau Cungguek gaijgwz hailangh，vih gangj ndei gij gojgaeq Cungguek、cienzboq gij sing’yaem Cungguek fatok gij cozyung youqgaenj.

Siz Ginbingz maqmuengh Cungguek Yizbau dawz cauhbanh ok bauq 40 hopbi guh gizhaidin moq, geiqmaenh gij cizcwz doxlienz guek ndaw guek rog、doxdoeng seiqgyaiq, gaemdawz aen gizmen hung seizseiq hung, cauhmoq aen dijhi vahgangj doiqrog, cauhlaeb aen gwzgiz cienzboq daengx meizdij, hwnjguh aen doih suciz sang, mboujduenh daezsang gij rengz yingjyangj gozci, gaisau gij leixniemh hwngfat、diuzroen hwngfat、gij cingzcik hwngfat Cungguek engq ndei bae, langhbaij Cungguek caensaed、lizdij、cienzmienh engq ndei bae, vih coicaenh Cungguek caeuq seiqgyaiq doxgyau doxdoeng guh’ok gungyen moq.

Cungguek Yizbau 1981 nienz 6 nyied 1 hauh cauhbanh ok bauq, dwg yinghvwnz yizbau guekgya gaep Cungguek moq laebbaenz le faenh daih’it daengx seiqgyaiq fathengz. Ginggvaq 40 bi hwngfat, gaenq guhbaenz aen dijhi daengx seiqgyaiq、bouxdoeg lai、lai loh saw、daengx meizdij cienzboq, bauqceij soqfathengz 70 fanh faenh baedauq, daengx meizdij cungjsoq vunzyungh mauhgvaq 3.5 ik.