Bwzhaij saj laeuzva dwg cungj yisuz ndawbiengz gvendaengz cunghgyau ndeu, hwng youq mwh Mingzcauz caeuq Cinghcauz. Mwh Dangzcauz gonqlaeng de daj Cunghyenz ginggvaq Huznanz、Fuzgen、Gvangjdungh haeuj Gveisihbwz, caiq cienz daengz Hozbuj, doeklaeng yienjbienq baenz cungj ciengq go diuq foux gvendaengz minzsug ndeu.

1 Saj Laeuzva Dwg Gijmaz

Saj laeuzva hix heuhguh “diuq roek haih”, faen baenz “siujsaj” caeuq “daihsaj” song cungj. “Siujsaj” dwg goeng dauh ndeu fwngz dawz bonj 《Saw Roek Haih》 daj gyaeuj nam daengz rieng, henz ndang lij miz song boux vunz cienmonz bae roq gyonglaz dem; “daihsaj” cix lumj yienj heiq nei, bouxyienj doq yienj doq ciengq go caiq diuq foux.

Hainduj, ndawranz miz byawz baenz bingh naek, couh cingj vunz daeuj saj laeuzva, maqmuengh guh sat le bingh ndaej ndei. Neix itbuen youq ranzding caeuq bakdou ranz bouxcawj guh. Danghnaeuz vunz- caen baenz bingh, vunzndawranz couh vih de boekgvaq、gouz boux- saenz、 cam “sien”, cungj naeuz dwg aenvih “fangz roek haih” ne, bouxcawj couh bae cingj vunz ma saj laeuzva lo. Baenzneix goeng- dauh okdaeuj gonq, sien saemj bouxdojdeih ndaw suenva gonq, doengh gova reuqnyieg fathenj dwg mbouj dwg aenvih de guenj rag va guenj mbouj ndei. Bouxdojdeih ndaw suenva naeuz, dwg aenvih miz “fangz” nyauxluenh. Yiengh- neix goengdauh couh guh aen “laeuz” ndeu (aen “laeuz” neix couhdwg aen laeuzva, aeu faexcuk guh baenz, sien guh ndei , mwh saj laeuzva cij dawz okdaeuj yungh) baij hwnj gwnz daiz bae, yaek aeu de bae gaeb “duzfangz”. Aenvih laeuzva dwg aeu vunz guh, uq gij heiq boemh, goengdauh couh heuh song boux sien okdaeuj saj laeuz, hawj laeuzva seuqcingh. Song boux sien neix okdaeuj le doq roq gyong roq laz、boq loxlez doq diuq foux, saj le yaep ndeu couh ndaej gaeb “duzfangz” lo. Neix couhdwg saj laeuzva.

2 De Dwg Baenzlawz Biujyienj

Saj laeuzva hwngfat daengz ngoenzneix, gaenq bienqbaenz cungj fuengsik eu fwen diuq foux bae angqhoh seizcin daeuj daengz roxnaeuz angqhoh demsou ndeu, singfwen angqyangz vaiqvued, gij yamq diuq foux cix mbaeu cix soengset.

Gaxgonq, saj laeuzva cawjdaeuz dwg bouxsai ndeu caeuq boux mehmbwk ndeu doiqfwen doiqfoux. Bouxsai dawz aen liengj va, mehmbwk cix gaem fagbeiz caeuq mbaw soujgaen, doq ciengq go doq diuq foux, henz- ndang cix miz vunz boq loxlez、roq gyonglaz、daz ngeihyienz、daz samyienz、boq houzgvanj daengj yozgi. Saj laeuzva miz gij dungcoz daegdingh diuq foux ndeu, lumjbaenz saj fagbeiz va、saj aen liengj va、saj mbaw soujgaen va daengj gij dungcoz yungh fwngz haenx, lij miz din doxgeuh、yamq lumj duzmax buet、dik coh naj、ngaeu coh laeng、ndwn aeu ga he lumj duzgaeq、dap din daengj gij dungcoz yungh din ga haenx.

Seizneix, de cix deng bien guh cungj foux yienhdaih ndeu. Maij aeu geijlai vunz diuq cungj ndaej. Gij hongdawz yienjheiq cix dwg raen dawz fagbeiz va caeuq mbaw soujgaen haemq lai.

3 Gij Gyaciz Youqgaenj De

Saj laeuzva yungzhaeuj le gij vwnzva cunghgyau、gij cingsaenz saenqyiengj、gij fungsug ndawbiengz caeuq gij yisuz ciengq go diuq foux daengj lai cungj gij yenzsu gvendaengz lizsij caeuq yinzvwnz, doiq yenzgiu gij lizsij vwnzva Bwzhaij Si dem Bwz- buvanh miz gij cozyung mbouj ndaej dingjlawh de, dwg gij swhliu youqgaenj de bae yenzgiu gij saenqyiengj cungh- gyau caeuq gij fungsug ndawbiengz. Caemhcaiq, daj gij diuh、gij dungcoz diuq foux、gij cangndang caeuq gij hongdawz yienjheiq saj laeuzva daeuj yawj, saj laeuzva gawq miz gij vwnzva dajndaem cunghyenz caeuq siujsoq minzcuz ndaw diegbya dwknyaen dwkbya, yungzheih yawj ndaej rox, vunzlai cungj maij yawj, gij yisuz gyaciz de gig sang.