Gwnz roen cuengq hagcaeuz, Miuzmiuz doq byaij doq guhcaemz. Daxbuz naeuz:“Gaej guhcaemz lo, vaiqdi byaij, yaep dem maranz ceiz le deng meh mwngz ndaq.” Miuzmiuz mbouj dawz vah daxbuz haeujrwz, gag guhcaemz faenh de. Daxbuz cijndei bengrag de maranz.

Miuzmiuz bineix doeg siujyoz sam nienzgaep, cingzcik de mbouj- suenq yaez hix mboujsuenq ak.

Buzlan dauqdaej ndaej youq ndaw seizgan daxmeh gvidingh haeuj ranz lo.

Miuzmiuz baez yamq haeuj dou, daxmeh couh naeuz:“Vaiqdi guh cozyez.” Seizneix daxmeh cingq cawj- caeuz.

Miuzmiuz ce daehsaw le, gouz daxmeh naeuz:“Gou siengj bae baihrog guhcaemz yaep he.”

Daxmeh naeuz:“Gij lwgnyez dam guhcaemz mbouj dwg lwgnyez gvai.”

Miuzmiuz naeuz:“Hoeng, Fangh- fangh、Liujliuj cingq youq gizhaenx guhcaemz ne.”

Daxmeh naeuz:“Gvai! Gij yinvu mwngz dwg doegsaw, mbouj dwg guhcaemz. Vaiqdi guh cozyez.”

Miuzmiuz roxnyinh euq mbouj gvaq daxmeh, couh mbouj gangj lo, bae hai densi. Densi caengz rongh liux, couh deng daxmeh ndaep bae. Daxmeh naeuz guh cozyez aeu naeksim, mbouj ndaej sim gwnz sim laj.

Aen bak Miuzmiuz ndiengq ndaej sangsetset, lumj yaek venj ndaej aen huzlaeuj nei bae, de menhmenh mbon ok gobwnj caeuq bit. Daxmeh raen le naeuz:“Din fwngz aeu riengjret di! Vaiqdangq!”

Yaek daengz caet diemj cung seiz, cozyez dauqdaej guhsat lo. Miuzmiuz bae hai densi, maez- mwdmwd yawj dung’vaben.

Daxmeh daek duix haeux ndeu oet haeuj fwngz Miuzmiuz bae, naeuz:“Vaiqdi gwn haeux, yaek daengz seizgan bae bouj goq lo.”

Miuzmiuz daek amq haeux ndeu haeuj bak bae myaij. Dung’vaben ndeiyawj raeuh, de dwglumz gwn amq haeux daihngeih lo.

Daxmeh youh gyaep:“Vaiqdi gwn haeux!” Daxmeh gyaep baez ndeu, Miuzmiuz couh gwn amq ndeu. Daxmeh cigsoh ndaep densi bae. Miuzmiuz hozndat, ce duixhaeux le naeuz mbouj gwn lo. Daxmeh naeuz aeu gwn liux gij haeux ndaw diux. Miuzmiuz naeuz gwn imq lo.

Miuzmiuz haeuj ndaw rug bae, bomq youq gwnz conghcueng, yawj coh rog cueng. Haujlai lwgnyez youq gizgyae rog cueng guhcaemz, doihndei Fanghfangh、Liujliuj hix youq ndawde.

Miuzmiuz gouz daxmeh naeuz:“Meh, gou gyaez bae hag, hoeng, gou mbouj gyaez bae bouj goq.”

Daxmeh naeuz:“Mbouj ndaej! Mwngz mbouj bae bouj goq, dangh- naeuz cingzcik doek roengzdaeuj, mwngz couh deng doengzhag riu, riu mwngz vunz bamz. Caiq naeuz, mwngz mbouj ndaej youq giz goeknduj couh saw hawj bouxwnq nw! Vaiq vaiq, daengz seizgan lo, raeuz aeu okdou lunw. Ngoenzneix dwg singgizit, bouj suyoz, gaej aeu loeng gobwnj nw.”

Caet diemj seiqcib faen, Miuz- miuz deng daxmeh rag hwnj denceh bae bouj goq.

Youq rog ranz gizdieg bouj goq, geij boux bohranz mehranz soengq lwg daeuj bouj goq doxlwnh gangjgoj.

Daxmeh Miuzmiuz danqheiq naeuz:“Dahlwg gou bouj goq mbouj noix, hoeng, cingzcik de hix mbouj raen ak geijlai ni!”

“Lwg gou hix yienghneix.”

“Eiya! Sou gaej iugouz sang lai.”

“Danghnaeuz mbouj bouj, cingzcik engq yaez.”

“Dan dwg bouj goq gou sai bae haujlai ngaenz lo.”

“Couhdwg gai lwed hix hawj lwg gou bae bouj goq.”

“Ai! Boux guh bohmeh couhdwg yienghneix lo.”

……

Gyoengq bohranz mehranz coenz vah he hix mbouj liz lwg bonjfaenh, cungj simyou lwg bonjfaenh hag mbouj ndei, cingzcik yaez.

Ndawranz gizdieg bouj goq, lauxsae cingq gangj goq, Miuzmiuz cix bazlwtbazlw, yaep he ngonz dingjranz, yaep he yawj rogcueng, ndawuk cungj yienh’ok gij ngaeuz Fangh- fangh、Liujliuj cingq guhcaemz nauhyied angqyangz. Ngeix dwk ngeix dwk, de lumjbaenz hix ndaej caeuq gyoengqde guhcaemz nei, din fwngz hix doengh hwnjdaeuj lo……

Bouj goq sat le dauq daengz ranz, gaenq dwg cib diemj cung lo, gaenriengz swiqndang, cib diemj buenq de aeu cinjseiz hwnj mbonq ninz. Ngoenz ndeu Miuzmiuz couhdwg yienghneix gvaq sat lo.

Ndwenngoenz Miuzmiuz mbouj ndaejhoengq saekdi: Singgizit bouj suyoz, singgizngeih bouj yijvwnz, singgizsam bouj yinghyij, singzgizseiq bouj cozvwnz, singgizhaj lienh raizsaw, singgizroek banngoenz lienh ganghginz, ngoenzsinggiz lienh diuq- foux. Ndwenngoenz Miuzmiuz couh yienghneix ngoenz dem ngoenz, ndwen dem ndwen gvaqbae lo.

Miz ngoenz ndeu, daxmeh yaek okbae gwn caeuz, de daengq Miuzmiuz naeuz:“Haemhneix daxmeh miz saeh, hawj daxboh soengq mwngz bae bouj goq, bouj yinghyij, gaej dawz loeng gobwnj nw.”

Miuzmiuz naeuz:“Meh, mwngz aeu cangndang gyaeundei di nw, mboujnex ngaiz baengzyoux mwngz riu, riu mwngz daenj yaez.” Daxmeh dingq le daej riu mbouj baenz.

Daxmeh hai aen gvihbuhvaq, fan gwnz fan laj, cungj ra mbouj ndaej saek geu buhvaq gyaeundei baenz daenj okdou. Seizneix de cij siengj ndaej hwnj swhgeij gaenq sam bi mbouj cawx saek geu buhvaq moq gvaq lo, cijndei ndwn youq gizde riumbw.

Ngoenz ndeu, Miuzmiuz lumj gaxgonq nei bae hagdangz, daengz cuengq hagcaeuz dauq daengz ranz gwn gvaq haeuxcaeuz le, de couh roxnyinh hojsouh, daxmeh doq daiq de bae yihyen, yienghneix haemhneix couh mbouj ndaej bae bouj goq lo.

Miuzmiuz ninz youq gwnz mbonqbingh, caen geizheih, de sim- cingz soeng dangqmaz. Husw hawj de dwk cim, de da mbouj yaep saek mbat, gwnz naj lij riu dem. Husw haenh de gvai, haenh de damjlaux. De cix sing daemq gag naeuz:“Baenzbingh caen ndei, gou gyaez baenzbingh!”

Yienznaeuz de gangj ndaej sing daemq, hoeng, daxmeh、husw cungj dingq ndaej nyi lo. Husw anj lo. Daxmeh gyozgip lo, doq naeuz:“Dahniq neix gangj maz vah ne? Gangjmoengx luba? Lauheiq fatndat coemh aen uk bonjfaenh vaih lunw?

Laebdaeb venjcim sam haemh, Miuzmiuz ninz gwnz mbonqbingh, lumj duz roegvameiz nei cici caca ciuz mbouj dingz, yaep he ciengqgo, yaep he doeg sei……

Haemh daihseiq, gwn caeuz gvaq le, daxmeh gyaep de bae bouj goq. Miuzmiuz naeuz:“Gou lij gyaeuj ngunh, aeu bae venjcim.”

Daxmeh naeuz:“Canghyw gaenq daengq gvaq, bingh ndei lo, mbouj- yungh bae venjcim lo.”

Miuzmiuz cacoemj naeuz:“Gyaeuj gou lij ngunh, baenzlawz naeuz bingh ndei le ni? Boux canghyw neix dauqdaej rox mbouj rox!”

Daxmeh naeuz:“Vunzbag! Venj- cim venj hwnjyinx la? Venjcim mbouj aeu ngaenz ha?”

Doeklaeng Miuzmiuz youh deng daxmeh rag hwnj denceh bae bouj goq lo.

Daj baezde hwnj, moix gek ndwen song ndwen, Miuzmiuz cungj deng fatndat baez ndeu, baezbaez cungj dwg de daegdingq guh. De gyanghwnz mbouj hoemq moeg, daengz ngoenz daihngeih couh deng dwgliengz nohndat lo. Baez nohndat de couh ndaej bae yihyen.

Bae lai baez le, canghyw husw cungj sugnaj de lo. Gyoengqde couh riu Miuzmiuz naeuz daeuj yihyen deih lumj bae ranzdaiq nei.

Miuzmiuz dingq le riunyum mbouj oksing.

Daxmeh cix najnyaeuq naeuz:“Ndangdaej dahniq gou nyieg lai lo, caen capheiq, sai ngaenz cixbah lij nguh bouj goq dem!”