Mboengqxneix, Gveigangj Si Cinzdangz Gih guh bi 2021 doxdax son’gyauq Sawcuengh. Hozdung faen guh song cuj, aen cuj siujyoz youq Gujsanh Siujyoz banh, aen cuj cuhcungh cix laeng Minzcuz Cunghyoz gawjbanh, gungh miz 13 boux lauxsae camgya.

Gyoengqde hwnjdangz beij gijmaz ne? Miz gij saeh mizyinx mwh iq de、fwen、gojgaeq daengj. Gyoengq lauxsae aeu guhcaemz、yienj heiq、doiqciengq、cuengq sing doeg daengj bae yinx gyoengq lwghag engq haengjgyaez hwnjdangz. Bineix 4 nyied daej, Cinzdangz Gih gaenq banh le bi 2021 lwghag doxdax aeu Sawcuengh、Sawgun raiz faenzcieng, gungh miz 64 boux lwghag camgya.

Gyawj geij bi neix doxdaeuj, Cinzdangz Gih roengzrengz hwngfat song vah son’gyauq, bibi cungj dinghngoenz guh doxdax son’gyauq Sawcuengh caeuq aeu Sawcuengh、Sawgun raiz faenzcieng. Hawj daihgya gag maij hag、yungh song vah, hawj gyoengqde daj “heuh gou hag”bienqbaenz “gou maij hag”, hwngfat aeu Vahcuengh、 Vahgun ma son’gyauq lwghag, caiq coicaenh minzcuz doxgiet, hawj gak minzcuz doxhuz doxndei, caez hwngfat guhhoengh.

(Luz Gingfungh Veiz Libingz / 陆庆峰 韦丽平)