Liggaeuq caet nyied cibseiq doengxhaemh, henz Dahswhgyangh vunz lai vunz daih, ndaetfwdfwd. Sing fwen rwenz raeuh, ienva diemj rongh baenz mbiengj mbwn, doengh aen daeng goujlungz gwnz Dahswhgyangh riengz rongh hwnjdaeuj, doeklaeng haujlai daengdah caemh deng diemj rongh. Doenghgij daengdah guh ndaej gyaeundei、lai cungj lai yiengh, hoengzhoengz heuheu、hunghung iqiq cungj miz, lumj gij ndaundeiq gwnz- mbwn nei, dak miz maqmuengh riengz raemxdah riuz bae. Neix couhdwg ciet daengdah Swhyenz lo.

Gij yienhceiq Swhyenz geiq naeuz, gaxgonq mbouj caengz miz diuz dietloh Sienghgvei, Dahswhgyangh couhdwg diuz lohraemx daj Gveibaek doeng daengz Huznanz youqgaenj ndeu. Mwh Dangzcauz Sungcauz, song dieg sojmiz gaicawx hozdung cungj dwg byaij diuz lohraemx neix. Boux- seng’eiq caeuq bouxruz baenz bi cungj naengh ruz baedauq, aenvih rumz hung langh gip, ciengzseiz miz ruz boek le ngaiz dai vunz. Ndigah, moix bi caet nyied cibseiq, gyoengq- vunz couh bae henz dah caeuq doengh boux daiuengj de guhdauh. Guh sat le youh cuengq geij aen daengdah haeuj ndawdah bae, it dwg caeuq doengh duz fangzlangh yinx roen, ngeih dwg cawz yakrwix siu cainanh, mbaenjgouz saehsaeh cungj swnh.

Bi 1995, Swhyenz Yen Yinzminz Cwngfuj raen yienghneix le couh dawz ciet daengdah Dahswhgyangh caeuq ciet eufwen Mbanjmyauz Vujbaiz gyonj youq ngoenz caet nyied cibseiq bae guh mbat dog. Neix couhdwg Gaiq Daih’it Ciet Eu Fwen Cuengq Daeng. Baezlaeng, moix bi caet nyied cibseiq cwngfuj couh youq ndawyienh guh aen ciet neix lo, yinx ndaej haujlai hekyouz daeuj guhcaemz.

Fung Vwnzswn bineix ndaej 64 bi lo, dwg boux lauxcangh guh daeng laeng Swhyenz gig mizmingz ndeu. Ranz de daj ciuhgeq couh rox guh daengdah lo. De 8 bi riengz daxboh de hag guh daeng, seizneix daeglwg、mehbawx caeuq lanmbwk de cungj rox guh daeng, daiq daeglan iq de cungj rox guh daeng va’ngaeux dem. Bibi loeg caet nyied, de cungj heuh vunz- mbanj itheij daeuj guh daeng. Neix mboujdan hawj vunzmbanj demsou, lij hawj gij dinfwngz guh daeng ndaej ciepcienz dem.

Doenghbaez, guh daeng cungj dwg miz gaiqmaz couh aeu gaiqmaz ma guh. Fung Vwnzswn naeuz, cungj daeng neix ceiq caeux heuhguh “daengreb”. Aen debdaeng dwg aeu reb gyaux mba caiq gya di raemx ma naengj baenz, caiq aeu youz caeuq raemxreiz doxgyaux ndei, aeu ganj- ngaeux guh muenz, neix couhdwg gij sim aendaeng lo. Caiq aeu faexcuk ma guh aen’gyaq, aeu ronghfaengx ma guh gij naeng baihrog. Daiq nyumx saek cungj dwg bae ndaw- ndoeng ra doenghgo yw’nyumx ma nyumx. “Saekhoengz dou aeu gogaeu- lwed, saekhenj dwg aeu govuengzgae henj, saek hoengznding cix aeu gocaenghnaengh.”

Gajlaeng coh miz daeng gingq- saenz、 daeng va’ngaeux、 daeng faengxgaeuyiengz sam cungj daeng neix. Daeng gingqsaenz dwg aeu seiq diuz saeu guh goetgangq, caiq aeu dungh ut baenz ndangdaeng, seiq naj aeu ceijmbang nem hwnjbae, gwnzde cix raiz miz doenghgij vah ndei haenx, aeu lab roxnaeuz aeu debdaeng coux youzcehbyaek cap diuz muenz le cuengq haeuj ndawde bae, aen daeng ndeu couh guh ndei lo. Daeng va- ngaeux dwg dawz ceij hajsaek daet lumj dujva’ngaeux hai dwk cingq hoengh nei, dawz gijde nem haeuj aen debdaeng bae, neix dwg cungj daeng ceiq heih guh ndeu. Gij caizliu guh daeng faengxgaeuyiengz haemq daeg- bied. Gyoengqvunz hwnj ndoi bae ra iengcoengz ma, dub soiq le couh aeu ceij duk hwnjdaeuj, gaenx lumj aen faengxgaeuyiengz nei, gwnzde soem lajde luenz. Youh dawz gijde nem haeuj bajbenj bae. Cungj daeng neix mwh ngamq diemj seiz gij feiz ronghmyabmyab, gajlaeng yied dawz yied hoengh, rumz baez ci de, lumj baenz duj baenz duj va hoengz youq ndaw dah doenghyubyub.

Riengz dwk seizdaih hwngfat, couh miz lai cungj lai yiengh daengdah lo, lumjbaenz daeng lungz- fung、daeng batgak、daeng gung daengj. Gij yienghceij gak mbouj doxdoengz, lumj doenghduz doenghgo daengj. Doengh aen iq de ngamq geij conq hung, doengh aen loet de cix miz geij ciengh hung. Ndawde cungj ceiq hungloet ndeu dwg daeng duzlungz lo. Aen ndeu aiq miz saek cib mij raez, guh ndaej gig gyaqciq.

Gyawj geij bi neix doxdaeuj, Swhyenz Yen gaenxmaenx banh ban son’gyauq guh daengdah, roengzrengz gungganq buek canghguhdaeng oiq. Miz haujlai bouxcoz lij bae daengz ndawranz ra Fung Vwnzswn hag guh daeng dem. Neix hawj de gig simhai. De naeuz, cijaeu gij dinfwngz neix mbouj gatcied, conzdungj couh mbouj rox duenh.