It、Daengngoenz Hwnj Baih- doeng

Gyangmbwn naefaiq mbin,

Doek rim luengq rim hongh,

Laepdik ranz caengz rongh,

Rumzbaek rongx baenz hwnz.

Sing lumj fangzyak heuh,

Heux haeuj gyaeuj haeuj rwz,

Mbouj saek boux gamj w,

Doengxhwnz fwzrikrik.

Cauh ruz gaeuq dwgrengz,

Ngengnget raemx couh haeuj,

Da raen mbwn mbouj couh,

Bouxboux gip baenzmaz.

Biengzneix luenhnyagnyag,

Boux guh hak hengzmanz,

Guekrog daeuj haephangz,

Ngoenz guh vang guh raeh.

Daengngoenz hwnj baihdoeng,

Ndit ciuq roengz diegdeih,

Rumzcin ma daengz neix,

Doenghgo ndaej dok nyez.

Cungguek Gungcanjdangj,

Couh dangq aen daengngoenz,

Ciuq diuzloh diuzroen,

Ciuq fwj hoengz fwj gyaemq.

Ngeih、Raiz Ok Coenz Caenleix

Dangjyenz roemx doxbae,

Caih lae lwed lae hanh,

Yaek gouq cai gouq nanh,

Caij diegnamh baenz roen.

“Doenghbaez dwg vaiz max”,

“Baenaj yaek guh vunz”,

Mwnqmwnq cungj hwnj rumz,

Ngoenzhwnz nauh hoenghhub.

Ndawsingz nauh dingz hong,

Doxcomz fanj apbik,

Dangj lingjdauj daeklig,

Hen leih’ik vunzlai.

Lengqlengq laeb gunghvei,

Dangjyenz ndaej guhdaeuz,

Riengz seizdaih ciuzlouz,

Gouz ra roen gwzming.

Lajmbanj vunzguhnaz,

Hix nda laeb nungzvei,

Nauh fan dien boek deih,

Bouxmiz heiq yaek dai.

Dahliuzyangz song hamq,

Ndaej ganq boux yinghyungz,

De daiqlingx bouxgungz,

Doengzcaez moeb caizcawj.

Byawz buet raemx hawj raeuz,

Swenj naeuz guh gvaqmauh,

Byawz hemq gaej luenh gauj,

Nauh haenq hoj souciengz.

Bien 《Gaujcaz Baugau》,

Haenh baenghgauq vunzlai,

Mauz Cwzdungh bouxgvai,

Raiz ok coenz caenleix.

Sam、Cien Fanh Vunz Dai Nanh

Boux gwzming ok bing,

Gung singz hoenx baihbaek,

Ginhfaz ninz mbouj ndaek,

Lumj duzdaek cawzcou.

Caezcaez guh seng’eiq,

Hujgeiq mbouj doxhuz,

Caezcaez naengh aen ruz,

Gyang huz gag doxmoeb.

Ningz-Han Ginhcizdonz,

Song gonz guh ndaej rap,

Rongx “cing dangj” vakvak,

Dangq mabag haeb vunz.

Gwnzmbwn byaj gwq maenj,

Rumz haenq faenx luenh mbin,

Dangj raeuz mbouj gamsim,

Hwnj bing youq Nanzcangh.

Baengh bouxhoj bouxgungz,

Laeb gunghnungz hungzginh,

Hen leih’ik beksingq,

Yiemzgimq nyaux vunzlai.

Suhveizaih cwngfuj,

Ndaej senhbu laebbaenz,

Fanjdungbai dacaengz,

De haemz dungx haemz saej.

Dingj “humxhoenx” haj baez,

Lwed lae ndingmyanmyan,

Cien fanh vunz dai nanh,

Cunghyangh deng senj deuz.

Seiq、Hoenx Bae Geij Fanh Leix

Byaij Vangz Mingz lohsienq,

Hoenxciengq cungj caenh saw,

Dwkgeiz mbouj aeu gaw,

Buenzbuenz saw da bieg.

Mauz Cwzdungh vunz cing,

Rox daiq bing hoenxciengq,

Hungzginh dingj Laux Ciengj,

Seiq liengx buek cien gaen.

Seiq baez gvaq Cizsuij,

Gveiyangz mbouj haeuj singz,

Cix bae hwk Gunhmingz,

Cing ndaeng vunzdig cienq.

Guh “Yizhaij Gietmungz”,

Liuz Bwzcwngz rox ngvanh,

Gvaq Yizcuz diegmbanj,

Ndaej deuz langh ndoj rumz.

Daduhoz vaqyiemj,

Caiq ciengj Luzdinggyauz,

Dawz cungqdinj maxdau,

Lumj cigau raihbongh.

Banh gvaq goengq byanae,

Dangh diegnaez diegcumx,

Bouxboux dungx daemj dungx,

Lumj caemh gyog caemh ranz.

Hoenx bae geij fanh leix,

Dauqcungz ndaej doxcomz,

Guk haeuj ndoeng caux rongz,

Dauq baenz yongz baenz ak.

Haj、Dingj Hoenx Bing Yizbwnj

Yizbwnj ciemq Gvandoeng,

Youh nod roengz Vazbaek,

Yied vet couh yied laeg,

De yaek gyan daengx biengz.

Cungguek raeuz yungyiemj,

Laux Ciengj mbouj dawzsim,

Cunghgung Sanj Ganh Ningz,

Dingj hoenx bing Yizbwnj.

Cangh（张学良） Yangz（杨虎城）

caemh diuzsim,

Hwnj bing bik Laux Ciengj,

Sih’anh sing cungq yiengj,

Veijyenzcangj bienq gvai.

Luzgouhgyauz rumzraq,

Bongjfafa faenx mbin,

Guek raeuz gak loh bing,

Laemxsim bae dingjhoenx.

Meij(美国) Yingh(英国) caez bang

rengz,

Bing Suhlenz hix haeuj,

Gak guek gyonj doxcaeuq,

Caez daeuj hoenx bingfangz.

Cungguek Gungcanjdangj,

Bouxboux gamj buekdai,

Dingjhoenx bet bi lai,

Raiz sawfwen cingqheiq.

Dingj Yizbwnj ndaej hingz,

Lwgminz angqfwngfwng,

Lumj byaleix diuq dwngj,

Daengxcungq angqyangzyangz.

Roek、Dwkbaih Ciengj Gaisiz

Cungzging fwj laepdik,

Caemrigrig dwglau,

Daengx singz gyuem mok hau,

Ciengj(蒋介石) Mauz(毛泽东) daeuj

doxhoih.

Mbouj lau dwg yaemmaeuz,

Bouxdaeuz bae damzbuenq,

Mbouj lau deng amqsuenq,

Gamnyienh bae doxyaeng.

Aen hoih cwnghezvei,

Cungjsuenq ndaej hai baenz,

Ciengj Gaisiz hozhaemz,

De gaem gienz mbouj cuengq.

Fanjdungbai maedmaeuz,

Ciengj aeu dieggaijfang,

Haenq hwnj rumz hwnj langh,

Dangq nagma roengz daemz.

Gaijfangginh mbouj foengx,

Fatdoengh sam canyiz,

Dwkbaih Ciengj Gaisiz,

Gizgiz ndaej maengxangq.

Baekging angqyang’yang,

Gvangjcangz vunz goenjoj,

Laebbaenz Cungguek moq,

Bouxhoj daeuj danggya.

Caet、Cungguek Ak Hwnjdaeuj

Cungguek ndwn hwnjdaeuj,

Ndaej gingz gyaeuj guh vunz,

Dangj daiq raeuz soemh fwn,

Nyig rumz byaij baenaj.

Laebbaenz gunghozgoz,

Dwghoz vunz daengx guek,

Dangj daiq raeuz haenq buek,

Guek moq guh ndaej ndei.

Raen Cauzsenj miz saeh,

Raen Meijgoz bae hangz,

Gamj okbing bae bang,

Mbouj hawj hangz beixnuengx.

Hen guekgya cawjgienz,

Coh Suhlenz fanjnaj,

Caeuq Yindu hoenx gvaq,

Dingj raqraq fwnrumz.

Cungguek fouq hwnjdaeuj,

Ndaej doxcaeuq baenzmiz,

Gaijgwz geijcib bi,

Gizgiz guh ndaej hwnj.

Ginghci gauj ndaej hwng,

Raeuz miz gwn miz yiengh,

Mwnqmwnq bienq saeksiengq,

Yienghyiengh guh baenz ndei.

Cungguek ak hwnjdaeuj,

Ndaej ngiengxgyaeuj gwnzbiengz,

Cunghab gueklig giengz,

Daengx biengz byaengq da yawj.

Sou Yanghgangj Aumwnz,

Hwnj mbwn caux Denhgungh,

Guh Bwzdouj Hidungj,

Gaiqgaiq cungj ndaej baenz.

Baengh miz gungcanjdangj,

Ndaej gangj daengz guh daengz,

Cunghvaz daih fukhwng,

Byawz cungj laengz mbouj ndaej.