Mbwk:

Vadauz nding le vamaenj yo,

Bimoq neix youh riengz doxdauq;

Gyo’mbaiq gungcanjdangj lingjdauj,

Aen mauhgungzhoj gou ndaej duet.

Sai:

Seizcin daeuj daengz va hai angj,

Mwngz ndaej duetgungz gou angqyangz;

Gaenx guh cungj miz caezgya bang,

Ndawranz cang rim gim caeuq ngaenz.

Mbwk:

Haeux ndaej lai gwn mbouj youheiq,

Caih beix bingzdingh leix simgei;

Raemx dienh goengloh caez doeng ndei,

Gizndei mwngz cungj ndaej miz faenh.

Sai:

Gou ndaej souh’ik lawz beij mwngz,

Ga gaeq fwed gaeq mwngz ndaej gwn;

Gouq gungz doenghyiengh mwngz ndaej swngz,

Saek caek raemx cwngh gou mbouj gien.

Mbwk:

Daegbeix souh’ik cang songzdaeuz,

Yozyau mienx cienz can gwn ndeu;

Yihliuz baujyiemj ndaej daengxheu,

Lajmbanj geujheux haeuj ranz moq.

Sai:

Nuengx gangj yienghneix cungj caensaed,

Nyinhcaen saed naemj gou rox raeuh;

Nangqdaengz ndwenngoenz beksingq raeuz,

Gizsaed vunz raeuz cungj ndaej ik.

Mbwk:

Va ndei hailangh mak doxdin,

Rumzcin fwnsaeq dah raemx cienj;

Lohsienq aendangj daeuj dazyinx,

Lwgminz ndaej gvaq ndwenngoenz ndei.

Sai:

Bouxcawj fouq le ranznden gungz,

Duj va gag dog cungj mbouj rang;

Bouxhoj goj ndaej bouxmiz bang,

Caez buet siujgangh baefoedfoed.

Caez eu:

Vunzlai sim gyaez gungcanjdangj,

Laebbaenz ngamqngamq ndaej bak bi;

Doxdax gaemfwngz conz fouqmiz,

Vunzlai docih gungcanjdangj.