Molwnh Bouxcuengh riuzcienz youq ranghdieg vahdoj baihnamz Gvangjsih lumjnaeuz Cingsih、Dwzbauj、Nazboh daengj dieg haemq lai, daengz seizneix gaenq miz sam、seiq bak lai bi lizsij lo. Molwnh daj gij diuh guh saehmo bienq gvaqdaeuj, dwg gwnzbiengz cungj yisuz cix ciengq cix naeuz ndeu. Vihle hawj vunzbiengz engq yungzheih rox, miz canghheiq couh aeu Vahgveiliuj ciuq gij cwngheuh Vahcuengh heuhguh Molwnh. “Mo” couhdwg “bohmo”, “lwnh” couhdwg “sei、gangj.”

Miz sawgaeuq geiq naeuz, daj Sungciuz satbyai daengz Yenzciuz hainduj, Gveiqsae gak dieg gaenq hwngq guh saehmo bae gouz fuk cawz nanh lo. Neix dwg souh gij vwnzva cungyienz yingjyangj, gij hozdung neix daengz Mingzciuz Cingciuz guh ndaej engq hunghoengh. Seizhaenx vunz mboujdan doiq guh saehmo mizyinx, lij aeu gij diuh de bae danq ciuhvunz bonjfaenh、cingzngeih ndawsim、damz saeh gangj lizsij daengj. Molwnh Cingsih、Dwzbauj fat ndaej engq hoengh, yienj gijmaz、 baenzlawz yienj gyoengqde cungj guh ndaej haemq caezcienz, daengz Cingciuz couh miz vunz guh hong sat le, ndaej hoengq caiq giem guh canghheiq bae yienj Molwnh dem.

Gij bouhloh Molwnh doenghbaez miz buizcaeq、yienjciengq、sou sik daengj. Buizcaeq couhdwg caeq bouxsaenz cojgoeng. Aeu baij daizcaeq gonq, siu yieng diemj lab le caiq baij doxgaiq bae buiz. Canghheiq Molwnh cix aeu gij buhvaq cienmonz de ma cangndang, siu yieng le couh naengh haeuj gaiqdemh dangqnaj daizcaeq bae ciengq Molwnh lo. Canghheiq Molwnh laeng cojgoeng camndei le, couh sei gij saedceij gwnzbiengz baenzlawz haemzhoj gonq, yienghneix le cij gangj lwglan yaek mbaenj- gouz cojgoeng soengq fuk cawz nanh, hawj lwglan guh ndaej gwn、mbouj bingh mbouj maz, doenghduz ndaw ranz ciengx ndaej baenz daengj. Baenz dauq yizsiz aeu ciengq baenz diemj geij cung cijndaej. Ciengq sat le, canghheiq Molwnh caiq hawj bouxcawj venj hoengz （venj diuz saihoengz haeuj aenhoz bae）, couh ndaej duet gij buhvaq cienmonz nwngq lo. Neix couhdwg sou sik.

Molwnh Cingsih faen guh sanggyaz、ya’gyaz, Molwnh Dwzbauj cix faen guh baihnamz、baihbaek. Youq ndawde, Molwnh ya’gyaz Cingsih caeuq Molwnh baihbaek Dwzbauj hwngfat ndaej haemq vaiq. Gij goswz ya’gyaz Molwnh Cingsih aeu 7 cih 6 coenz guh duenh ndeu, gungh miz 52 coenz, dawzyinh dwg dawz yinh hwetgiek, mbangjbaez caemh cab miz geij coenz 5 cih、3 cih, roxnaeuz mbouj ciengq aeu caenh gag gangj aeu cungj miz. Gij diuh cawjdaeuz aeu diuhya’gyaz dingh ndei haenx, swz bienq diuh caemh riengz bienq, baenz coenz baenz coenz gig caezcingj. Diuh de hainduj miz diuhyinx “ai”, yaek sat le youh miz diuhsat “lang ya li”.

Gij goswz Molwnh baihbaek Dwzbauj cix aeu 5 cih roxnaeuz 7 cih doxcab guh 6 coenz baenz duenh ndeu, dawzyinh caemh dawz yinh hwetgiek. Gij diuh faen diuhyinx、cingqfaenz、satbyai. Gij diuh cingqfaenz haemq lumj fwen baihbaek Dwzbauj, yozgi dwg aeu roix lienhdiet ndeu roxnaeuz aen gimmbawdiet ndeu.

Cit heiq Molwnh conzdungj miz 《Soengq Haiz》 《Ienq Cingz》 《Bwzswz Cienh》 daengj, daj gaxgonq cienz daengz seizneix cungjlij hawj vunz simmaez. Ciuhgeq canghheiq fwngz ndeu umj samyienz fwngz ndeu dawz beiz, gangj Vahcuengh bae gag danz gag ciengq, daengz seizneix bienqbaenz geij vunz biujyienj, naengh dwk ciengq、 ndwn dwk ciengq、 byaij dwk ciengq cungj ndaej. Gij hongdawz aeu ma biujyienj de lij lumj gij gaxgonq, miz seiz dawz gyongnyag, mbangjbaez gaem aendomq, caiq miz yienzndokmax、samyienz、yienzdoj daengj lai cungj yozgi, yaem rwenz swnh rwz, ndeidingq haeujsim, mizyinx dangqmaz.

Aen sigi gonq goujcib nienzdaih co, Cingsih cujciz le aen doih Molwnh ndeu bae Neimungzguj camgya doxdax ndaej ciengj ma, daj seizhaenx vunzrog couh rox Molwnh Bouxcuengh gagmiz neix lo. Hoeng Molwnh mboujdan ciepcienz hoj hwngfat hix hoj. Seizneix canghheiq Molwnh gwnzbiengz Cingsih ngamq miz mbouj daengz 10 vunz lo, gyoengqde nienzgeij cungj dwg 65 bi doxbae, cungj mbouj ciengq Molwnh geijlai lo. Conhgyah ndaw hangznieb cungj nyinhnaeuz yienghgo Molwnh Bouxcuengh gagmiz neix dij raixcaix, wngdang baujhoh yenzgiu ndei, roengz- rengz lwnhgangj caeuq dajcauh.

Cib geij bi neix doxdaeuj, Cingsih Si Yinzminz Cwngfuj daujlwnh lai baez, caiq baijbouh ndei, yaek dajcauh Molwnh baenz cungj binjbaiz vwnzva ndei ndeu, vwnzva bouhmonz cix aeu vunz guh gij hongsaeh baujhoh caeuq fatyiengz Molwnh, bien le haujlai cezmuz ndei bae ndaw si、ndaw gih caiqlij daengx guek camgya vwnzyi doxdax, doidoengh Molwnh ciepcienz caeuq hwngfat ndaej engq ndei.