Sai:

Bi ngeih lingz ngeih lingz,

Sing geizheih okda,

Haemhndaep miz luemjbyaj,

Lajmbwn caen noix raen.

Mbwk:

Daj ciuh laux roengzdaeuj,

Caengz nyi naeuz yiengh gvaq,

Haemhndaep miz luemjbyaj,

Lajdeih mbouj bingzan.

Sai:

Mbouj caengz daengz yauhcwn(cin),

Gwnz mbwn byajraez byet,

Yiengj lumj mbwn yaek dek,

Beksingq sim dai luenh.

Mbwk:

Haemhndaep byajraez yiengj,

Siengj daengz bouxboux ndaenq,

Haemhndaep byajraez maenj,

Raeuz yaek raen cainanh.

Sai:

Haemhndaep couh doek rit,

Coit couh byajraez,

Seizcin baenzlai gyae,

Byajraez daeuj bauq nanh.

Mbwk:

Haemhndaep couh doek rit,

Coit couh byajraez,

Ciuh geq daengz banneix,

Ngeix dauq caengz raen gvaq.

Sai:

Bi ngeih lingz ngeih lingz,

Gwnz biengz mbouj bingzan,

Binghlah dauqcawq sanq,

Bouxboux fanz yaek dai.

Mbwk:

Ngeihcib bi duznou,

Raeuz gven dou gangjgoj,

Gwnz biengz fat bingh moq,

Guek raeuz cungj rox caez.

Sai:

Binghlah fwt daeuj daengz,

Vunz mbanj caengz raen gvaq,

Mbouj haeujsim deng lah,

Raeuz vajaw(danqheiq) linlin.

Mbwk:

Binghlah fwt daeuj daengz,

Mbanjmbanj baenz riuz doh,

Bingh neix dwg bingh moq,

Raeuz baenzlawz goq mingh?

Sai:

Dangjcunghyangh doxyaeng,

Daengx guek daeuj ok rengz,

Fung singz youh fung geng(geuq),

Mbouj hawj deng binghlah.

Mbwk:

Binghlah neix caen yak,

Miz boux gimq bak ndaeng,

Caj canghyw daeuj daengz,

Caengh ndaej gouq diuzmingh.

Sai:

Bouxdaeuz youq baihgwnz,

Son vunz guh fuengzre,

Bouxlaux caeuq lwgnyez,

Cungj re ndei cij baenz.

Mbwk:

Bouxdaeuz youq cunghyangh,

Gangj vah raeuz couh dingq,

Roengzsim daeuj re bingh,

Mingh raeuz cij gyaeuraez.

Sai:

Ngoenz haidin okdaeuj,

Yaek aeu daiq goujcau,

Bae gizlawz doxdauq,

Swiq fwngz hau cij youq.

Mbwk:

Daiq goujcau okdou,

Mbouj lau bingh haeuj ndang,

Raeuz dingq dangjcunghyangh,

Gangj gohyoz fuengzre.

Sai:

Mbanjmbanj miz vunz souj,

Gizgiz fung dou roen,

Binghlah neix mbouj goenq,

Raeuz hoenxciengq mbouj dingz.

Mbwk:

Mbanjmbanj miz vunz souj,

Doudou miz vunz hen,

Bouxlawz guh mbouj deng,

Roengzrengz daeuj son’gyauq.

Sai:

Hujgeiq mbouj doxvaij,

Vunzlai mbouj doengz naengh

Gekliz guh ndaej daengz,

Caengh gemjnoix binghnanh.

Mbwk:

Beixnuengx yaek doxra,

Aeu dienhvah doxdoeng,

Baengzyoux yaek hwnjroengz,

Doeng vah cingz hix naek.

Sai:

Boux guh laeuj guh caz,

Gaej yungh ra hujgeiq,

Aen bingh gig geizheih,

Guh mbouj ndei baihgya.

Mbwk:

Miz fangzdai vaiznit,

Itdingh aeu haeujsim,

Noix daeuj geij bouxcin(caen),

Ndaej gemjnoix binghnanh.

Sai:

Cungh、sihyih doxgap,

Fanriep caeuq fandenz,

Gwnzlaj miz doxgven,

Raeuz nenq(geiq) youq ndawsim.

Mbwk:

Ywhek gap ywdoj,

Raemxmboq caeuq raemxdah,

Aeu daeuj yw binghlah,

Lajmbwn riuz Cungguek.

Sai:

Gyoengq canghyw miz sim,

Yamqdin haeuj Vujhan,

Roengzrengz gouq binghnanh,

Hwnzngoenz ganq mbouj dingz.

Mbwk:

Gak aen yihliuzdui,

Miz bouxoiq bouxlaux,

Sinhoj hix mbouj lau,

Bauj guekcoj bingzan.

Sai:

Yihliuzdui dwggyaez,

Miz saeh buet bae gonq,

Yienghyiengh dingq dangj son,

Bauj Vujhan onjdingh.

Mbwk:

Gyoengq gungh’anh bouxbing,

Engq miz sing miz saek,

Mboujlwnh saeh mbaeu naek,

Yienghyiengh gaek haeuj sim.

Sai:

Dangj gvensim cibfaen,

Ngaenzcienz soengq daengz ranz,

Lwgminz raeuz bungz nanh,

Gungcanjdangj guh daengz.

Mbwk:

Cunghyangh guh ndaej ndei,

Doengzcaez daeuj ganqguenj,

Cainanh hix mbouj luenh,

Suenq Cungguek maenh’ak.

Sai:

Gyoengq lwglan guek raeuz,

Mizmbangj youq diegrog,

Raen daengz binghlah ok,

Buekmingh daeuj bangcoh.

Mbwk:

Gyoengq lwglan youq rog,

Caenhsim daeuj ok ngaenz,

Ndiep beixnuengx cibfaen,

Aencingz geiq mbouj lumz.

Sai:

Bouxdaeuz youq cunghyangh,

Gangj coenzcoenz miz leix,

Son lwgminz baenz meiz(miz),

Saeh neix bouxboux haenh.

Mbwk:

Cunghyangh guh ndaej cingq,

Raeuz beksingq bingzan,

Vunzlai mbouj deng nanh,

Raeuz fanh daih mbouj lumz.

Sai:

Fuengzre aeu maedsaed,

Ndaetndaet daeuj hensouj,

Bouxboux guh ndaej daeuj,

Cij mbouj souh cainanh.

Mbwk:

Miz bingh couh aeu fuengz,

Hong hix gaej cuengq soeng,

Bingh neix bingh mbouj doengz.

Loeng gvaq seiz couh baih.

Sai:

Raeuz miz cai miz nanh,

Gungcanjdangj venj sim,

Soengq cien ngaenz fanh gim,

Raeuz gwn imq daenj raeuj.

Mbwk:

Beksingq caeuq bouxdaeuz,

Ukgyaeuj hix daezsang,

Bouxboux dingq cunghyangh,

Dwk binghnanh roengz caez.

Sai:

Cungguek gohyozgyah,

Lajmbwn cungj riuzmingz,

Baengh gohyoz yw bingh

Vunz gingq lumj bohmeh.

Mbwk:

Guekcoj raeuz ak lai,

Seiqgyaiq cungj riuz doh,

Yienghyiengh miz gohyoz,

Lohloh guh ndaej daengz.

Sai:

Boux husw dwggyaez,

Netsim bae bangcoh,

Yungyiemj hix mbouj ndoj,

Roengzsim goq bouxbingh.

Mbwk:

Dwggyaez gyoengq canghyw,

Moekrwz bae yw bingh,

Doeklaeng hoenx ndaej hingz,

Bauj ndaej mingh vunzlai.

Sai:

Bi ngeih lingz ngeih it,

Yaepyit youh daeuj daengz,

Raeuz aeu lai doxyaeng,

Baenzlawz caengj(souj) binghlah.

Mbwk:

Ngeih lingz ngeih it nienz,

Raeuz gaenq cienz ndei liux,

Yienghyiengh ciuq bi’gvaq,

Fuengz binghlah daih’it.

Sai:

Miz dangj daeuj lingjdauj,

Raeuz lau gijmaz lo,

Yw bingh miz gohyoz,

Bingh mbouj rox haeuj ndang.

Mbwk:

Vah dwg baenzneix gangj,

Raeuz dingq dangj cij baenz,

Miz cunghyangh gaemgaenz,

Lwgminz aeu gaen ndei.

Sai:

Binghlah dwg daihsaeh,

Mbouj ndaej guh bunye(ruprap),

Gaej gangj vah lwgnyez,

Aeu rox re rox fuengz.

Mbwk:

Binghlah dwg saeh hung,

Cuengq haeuj dungx haeuj saej,

Fuengzre guh daengz daej,

Mbouj heiq bingh hwnj ndang.

Sai:

Geij cien daih roengzdaeuj,

Guek raeuz lau gijmaz,

Vunzdig lumj go’nya,

Gaj liux caez liux doh.

Mbwk:

Geij cien daih roengzdaeuj,

Guek raeuz lau gijmaz,

Miz dangj daeuj dang gya,

Binghlah raeuz mbouj lau.