Bonjbauq siusik （gicej Cinz Yajniz）Cunghgung Cunghyangh cungjsuhgi、Cunghyangh Ginhveij cujsiz Siz Ginbingz mboengqneix cazyawj le Gvangjsih raeuz. Gak cuz ganbu vunzlai gih raeuz raen cungj- suhgi daengz Gvangjsih le cungj roxnyinh cingsaenz gvaekgvaek. Gyoengqvunz foenfoen naeuz, itdingh aeu geiqmaenh gij vahdak cungj- suhgi, cauhlaeb aen Guengjsae gyaeundei sevei cujyi miz gij daegsaek Cungguek seizdaih moq bae raiz bien moq.

Veiz Cihbauj dwg boux “govuengz” Gvangjsih, daeg 90 nienz seng neix dwg daj Yizcouh aen ranzmbanj Liuz Sanhcej daeuj. De yawjraen siusik le sim’angq raeuh, doq bien fwen doq son vunzlai eu hwnjdaeuj.

Seizneix, daengx gih gungh miz 1949 aen gak gaep aengih yienghndei minzcuz doxgiet baenaj, 134 aen dieggiek guh son’gyauq minzcuz dox- giet baenaj caeuq dieggiek guh son- gyauq saedguh cukmaenh gij eiqsik caezcaemh Cunghvaz Minzcuz. Neix cungj dwg gij makbaenz youqgaenj cauhlaeb、 son’gyauq lwnhgangj gij hongsaeh minzcuz doxgiet baenaj daengx gih.

Vuz Hansiz boux Swcigih Minz- cunghveij Genhduz Genjcazcu cucangj nyinhnaeuz, aeu nyinhcaen hag caemhcaiq gvancez guhsaed gij vah youqgaenj Siz Ginbingz cungjsuhgi, dawz diuz rap moq bae guhlaeg gij hongsaeh cauhlaeb aengih yiengh- ndei minzcuz doxgiet baenaj. Laeb- maenh gij “vuj gvanh”deng haenx, ciengxlwenx dawz “sam aen liz mbouj ndaej”geiq haeuj sim, mboujduenh dem ak “haj aen nyinhdoengz”. Ra roen moq cauhmoq gij lijniemh fuengfap, doidoengh hozdung “caet haeuj”, caemhcaiq hawj de “haeuj ranz” “haeuj cehgenh、vihhong”. Hwnqguh bingz- daiz hawj daengx biengz cungj ndaej camgya, dajcauh buek dieggiek son- gyauq saedguh cukmaenh gij eiqsik caezcaemh Cunghvaz Minzcuz miz daegsaek daengj, doxgiet daengx gih gak cuz lwgminz caez guh aen ranz- mbanj gyaeundei ndeu.

Liuz Cincungh boux Liujcouh Si Minzcunghveij fucujyin naeuz, raeuz laebsim gvancez “byaij diuz roen moq cienzmienh cauhlaeb aen sevei cujyi yendaiva cungj mbouj ndaej noix saek aen minzcuz” gij vah Siz cungjsuhgi gangj haenx. Guh ndei hozdung gyo’mbaiq aendangj、riengz aendangj byaij, giethab son’gyauq lizsij aendangj, cungjgez gij cwngcwz daj duetgungz gunggeng doxdaeuj、“diuz roen coih daengz gizlawz, minzcuz doxgiet baenaj couh cauhlaeb daengz gizlawz”gij ginghniemh neix bae fatyiengz gij cingsaenz mbouj duenh roengzrengz baenaj, doicaenh dieg minzcuz Liujcouh Si caetliengh hwngfat ndaej sang.

4 nyied 27 hauh gyanghaet, Siz Ginbingz cungjsuhgi daengz Gvangjsih Bozvuzgvanj cazyawj, de dingz youq dangqnaj aen daiz Hawfwen Duzmbaj Yauzcuz dingq gyoengqvunz eu fwen. Neix hawj Lij Cinlingz boux Fuconh Yauzcuz Swciyen Minzcunghgiz giz- cangj simhai raixcaix, de doq youq Veihsin fat le gij siusik neix. De naeuz:“Bi 2020 Fuconh aeu ndaej aen mingzdaeuz aenyen yienghndei daengx guek minzcuz doxgiet baenaj, neix dwg gij makbaenz gak cuz ganbu vunzlai doxgiet doxbang、caezsim roengzrengz guh okdaeuj he.” Baezlaeng Fuconh youq dieg hainduj moq yaek aeu biucinj engq sang bae guhyiengh, doed’ok “haj aen engqgya”, cauhlaeb gij hongsaeh minzcuz doxgiet baenaj raiz bien moq.