Vahbaihnaj: Bineix dwg Cunghgoz Gungcanjdangj laebbaenz 100 hopbi. 100 bi ndwenngoenz doxbae, 100 bi yaep da couh gvaq, vih goenghoh Cunghgoz Gungcanjdangj laebbaenz 100 hopbi, geiq maenh gij sawjmingh caeuq simnduj, swnjciep gij gihyinh hoengznding, Gvangjsih Minzcuz Bau caeuq Gvangjsih Bouxcuengh Swcigih Gyauyuzdingh doxyien banh aen cwnghvwnz hozdung aeu Sawcuengh sij, cawjdaez heuhguh “geiq maenh aencingz aendangj, riengz aendangj yamq bae”, doeklaeng menhmenh fat gij faenzcieng ndei, caeuq daihgya caez dauqngeix gij lizsij ronghlwenq aendangj, caez roxnyinh gij hungmbwk ronghgywg aendangj.

Gungcanjdangj hwnjdaeuj,

Raeuz raen ndei lailai,

Ciuq banneix seizdaih,

Bouxboux simhai swenj.

Miz liux gungcanjdangj,

Raeuz cij angq baenzlai,

De gouq le vunzlai,

Lij daiq raeuz fatcaiz.

Gaxgonq guh gwzming,

Saehcingz mbouj yungzheih,

Gvaq geijlai gumzgamx,

Cij hamj daengz ngoenzneix.

Gaijfang caetcib bei(bi),

Ngoenz beij ngoenz bienq moq,

Cam bouxgeq hix rox,

Gungzhoj sanq liux caez.

Daengz gaijgwz hailangh,

Dangj raeuz hengz ndaej ndei,

Bouxgungz bienq bouxmeiz(miz),

Ngoenz ndei doengzcaez gvaq.

Gungcanjdangj lumj boh,

Vix bouxhoj byaij roen,

Bouxboux cungj miz gwn,

Roen siujgangh daeuj daengz.

Lumj dieg raeuz Gvangjsih,

Di he cungj mbouj ca,

Gizgiz lumj suenva,

Daihgya bouxboux angq.

Roen seiqlengq caez doeng,

Hwnj roengz mbouj yungh deq,

Hojceh bienq gauhdez,

Doxgveq lumj moed raih.

Seiqlengq caez ranzlaeuz,

Bouxboux cungj rox cauh,

Mbouj dwg gangj vah fauh,

Ranz mbanj lumj ndaw singz.

Ndaw mbanj lumj gwnz haw,

Doxdax guh ranz gvangq,

Aenaen ndongqrangrang,

Haucancan lumj ngaenz.

Lwgnyez haeuj hag youq,

Gouj bi mbouj gyau ngaenz,

Boux ranz gungz daeuj daengz,

Lij bouj ndaej ngaenz gwn.

Boux ndaem duh ndaem haeux,

Mbouj nab liengz saek gaen,

Mboujdanh soengq haeuxfaen,

Lij bouj ngaenz dwkdaeh.

Mbanjmbanj cungj doeng dienh,

Mbouj caiq diemj youzdaeng,

Caih haemhlaep daeuj daengz,

Ndaej daemj baengz guh siuq.

Gaxgonq gwn raemxdaemz,

Haemz soemj lumj gwn meiq,

Seiz miz swlaizsuij,

Mbouj heiq(you) raemx mbouj cingh.

Miz bingh couh bae yw,

Mbouj gai cwz gai vaiz,

Yihbauj caen ndei lai,

Yaek dai hix mbouj heiq.

Bouxgeq loegcib bi,

Ndwenndwen miz ngaenz soengq,

Daxbuz caeuq daxgoeng,

Gwn daenj soengswdswd.

Raeuz miz gwn miz daenj,

Baengh dangj soengq aencingz,

Dangj miz eiq miz sim,

Lwgminz angq gvaq ciuh.

Aencingz gungcanjdangj,

Yied gangj yied miz lai,

Guekcoj bienqvaq daih,

Nai mbouj liux mbouj caenh.