Heiqguengjdoeng youq Gvangjsih doenghgij dieg gangj begvah de miz haemq lai, dwg cungj heiq vwnzva Lingjnamz caeuq vwnzva Betgveiq doxgap le couh ok haenx. Bi 2014, Heiqguengjdoeng ndaej senj haeuj buek daihseiq guekgya gaep feihyiz hangmoeg mingzloeg.

Lizsij Heiqguengjdoeng

Heiqguengjdoeng youh heuhguh heiqdaih, dwg daj heiqnamz bienq daeuj. De riuz youq Gvangj- dungh、Gvangjsih、Yanghgangj、Aumwnz caeuq rogguek gij dieg miz vunz Cungguek youq haenx. Dwg cungj heiq deihfueng dawz ciengq doeg、boiq yinhyoz、buhvaq daizheiq daengj guh giz ndeu. Gij sing cawjdaeuz dwg diuh moegnyawz caeuq ngeihvuengz, giem miz diuh cap、cix naeuz cix ciengq daengj.

De gaxgonq dwg aeu Vahgun ma biujyienj. Mwh Cingciuz yaek sat Minzgoz yaek daengz, Gyoengqvunz miz vwnzva de vihle fuengbienh lwnhgangj gwzming, hawj vunzmbanj engq yungz- heih rox, couh gaij aeu Vahguengjdoeng ma baiz heiq. Doeklaeng vunz couh an coh guh “Heiq- guengjdoeng”.

19 sigij satbyaij, haujlai heiqban Guengjfuj naengh ruz riengz Dahsihgyangh doxhwnj daengz Vuzcouh、Nanzningz daengj dieg bae biujyienj Heiqguengjdoeng. Heiqguengjdoeng couh yiengh- neix baez di baez di youq Gvangjsih roengzrag, haiva baenzaen. Doengh aen sok hung Dahsihgyangh couhdwg gij dieg aeu ma biujyienj youqgaenj de. Lungzanh Yen Nazdungz Cin miz baj sigbei geiqsaw“Gvanghsi geijmaux nienz miz Gvangjdungh daihban daeuj”.

Heiqguengjdoeng laeng Gvangjsih youh heuh- guh Heiqguengjdoeng Yasifuj roxnaeuz Heiqguengj- doeng Nanzbai, gij biujyienj caeuq neiyungz gig miz daegsaek vwnzva Gvangjsih.

Heiqfaenz biujyienj saeqnaeh, haengj langhbaij gij cingzgamj ndawsim bouxvunz, baizciengz cix ciuq gij neiyungz mbouj doengz de guh ok baenz dauq yizsiz dingh ndei haenx; gyoengqvunz Lozyez daj ciuhgeq doxdaeuj couh maij goengfou, ndigah heiqfoux biujyienj mizrengz saedyungh, “bouxsai diuq siujdiuq caiq faen hung iq, mehmbwk diuq siujdiuq caeuq gaeuz hwet”; gij diuh Heiq- guengjdoeng rwenzraeuh ndeidingq, sing laz、sing ca caeuq sing loxlez dingq ndaej haemq cingcuj, diuh sang cix goksat, seiq henz gyawj cungj dingq ndaej nyi liux.

Daegdiemj Heiqguengjdoeng

Gij daegdiemj de dwg yienghlawz ne? Daih- it, seizneix Heiqguengjdoeng laeng Gvangjsih lij ce miz gij baizciengz conzdungj、 goengfou Nanzbai dem dwzgi. Lumjbaenz 《Caeuq Yah Doxcomz Dahsihhoz》 cit heiq baizciengz neix couh yungzhab le gvaq bya、haep dou doxdwk、sou sawdajgauq、caeuq yah doxcomz、nauh ranz bouxwnq、gaujciengz beij foux daengj baizciengz; baijok dwk daengzbaiz、bi byoem daengj dwzgi Nanzbai; youq gwnz daengqsang biujyienj lai cungj goengfou lumj canj daiz、diuq daiz、dongh vamoiz、sangh ciuq ging daengj.

Daihngeih, aeu gij gojgaeq Senj Fuhyinz laeng Heiqguengjdoeng Vuzconh ma baiz heiq. Baih- doengnamz Gvangjsih depgyawj ranghdieg baihsae Gvangjdungh, vunz gizde moix bi liggaeuq cieng nyied daengz ngeih nyied cungj aeu guh sibsug nienzlaeh bae geiqniemh Senj Fuhyinz. Doeklaeng gij hozdung“yawj heiq”ndawde couh bienqbaenz cungj heiq cienmonz aeu bae biujyienj lo.

Linghvaih, Heiqguengjdoeng laeng Gvangjsih lij sawq gvaq aeu Vahcuengh bae biujyienj dem. Caemhcaiq yungzhab vwnzva bonjdeih cauh’ok baenz buek heiq ndei. Lumjbaenz 《Vajsi Fuhyinz》《Fag Cuiz Aeuj Gim》《Mulenz Gouq Meh》《Genzlungz Diemj Canghyienz》《Caw Dauq Hozbuj》 daengj. Caiq lumj 《Aen Dingz Haijdangz》 yienh’ok doiq fwen、bau lwgdom、gwn haeuxfaengx、gwn byaseng、foux faexsaux daengj fungsug Mbanjcuengh gag miz de caeuq gij lizsij Hwngz Yen. Cit heiq neix lij aeu ndaej Gaiq Daih Cibngeih Cungguek Ciet Heiq Gimuciengj Ndei de.

Hojcawq Caeuq Hwngfat

Riengz dwk seizdaih bienqvaq, Heiqguengj- doeng laeng Gvangjsih mboujduenh cauhmoq, caemhcaiq menhmenh byaij coh seiqgyaiq. Lumj 《Duznou Haqsau》 cit heiq lwgnyez neix gangj le gij saeh haqsau aeuyah gwnzbiengz, yienh’ok gyaciz- gvanh、 vwnhlen’gvanh gyoengqvunz seizneix. 《Yinghlo Cienh》 cix dawz gij baizciengz biujyienj Heiqguengjdoeng caeuq gij fwen foux Heiqfanz Yindu doxgap hwnjdaeuj daengj.

Hoeng, Heiqguengjdoeng caemh daemdawz vwndiz lumj biujyienj bae bonjcienz lai、ndaej ngaenz noix, bouxyawj caeuq canghheiq cungj dwg vunzlaux lai、bouxcoz noix daengj.

Fungz Hingyenz, vunz Lungzanh, dwg boux- ciepcienz guekgya gaep feihyiz Heiqguengjdoeng. De daj lij iq couh maij Heiqguengjdoeng, caet bi couh hwnj daiz biujyienj lo, sugseg 30 lai aen baizciengz faenzfoux, lumj gij dwzgi Nanzbai diuq eij、fan ginhdouj、bienq naj、gaq cibbet lozhan daengj, de cungj sug dangqmaz. De lij yienj gvaq 100 lai cit heiq hung iq dem. Fungz Hingyenz gig yawjnaek gungganq bannomj, gangjgiu “aeu heiq daiq vunz, aeu heiq ok vunz”. De banh aen ban hag Heiqguengjdoeng, daengz seizneix gungh daiq ok 100 lai boux vunzciepban. Hawj Heiqguengjdoeng demlai lwed moq, daiq bae maqmuengh.