Banringz, fwnraq doeksubsub. Cuengqhag le, gou lij youq bangunghsiz nyaengq di hong.

Gaenh bi daeuj, doengh gij hagseng youq ndaw hag gwn youq haenx cungj ndaej baihgwnz bouj ngaenz, neix dwg guekgya gvansim gyoengq lwgnyez lajmbanj, youq hagdangz gou couhdwg guenj gienh saeh neix, aeu haeujsim guh ndei cijndaej.

“Deg deg deg.” Dingq daengz geij sing iq roq dou, gou caiq mbouj miz sim naemj roengzbae. Gou dingz roengzdaeuj, mbouj guhhong lo.

Boux mehmbwk ndaej saek 50 lai bi ndangnyaet he, daenj dauq buh gaeuqgeq habndang ndeu ndwn youq bakdou bangunghsiz.

Gou ndwn hwnj riunyum naeuz:“Mehsimj, haeujdaeuj vei.”

Mehsimj yousim riri, ngamq yaek yamqdin haeujdaeuj, youh dingz roengzdaeuj.

“Gou…… gou vanzlij duet gouh haizdumz gou cij haeujbae lo……” Mehsimj gig mbouj cwxcaih, remjnaj naeuz. Gangj sat de couh ngaemgyaeuj yawjyawj lajdin gouh haiz dumzdwddwd swhgeij, gig najmong.

“Mehsimj, mbouj yungh law, gou hix mbouj duet haiz ni.” Gou raen de baenz guhhek, caeuq miz saek mehmbwk lajmbanj saekdi couh sing hung hemqhuhu haenx gig mbouj doxdoengz.

Aen laeuz sonhag neix ngamq hwnq moq, dibanj、coujlangz、laelouz、lajciengz……cungj nem miz cienmeng, seiqlengq ronghsagsag, beij gij laeuz sonhag gaxgonq gyaqciq lai lo.

Ngoenzneix doek fwn hung, gouh haiz mehsimj gaenq deng nyomx dumz lo. Yawj gwnz dibanj raeuzradrad neix, de aengjgyaengj mbouj dingh, engq mbouj gamj haeujdaeuj.

Raen mehsimj neix mbouj gamj yamqdin, gou byaij gvaqbae, rag fwngz de naeuz:“Mehsimj, yawj vei, gou hix daenj haiz.” Mehsimj baez raen gouh haiznaeng seuqsak gou, lau gou rag de haeuj dou, sikhaek gungj hwet roengzbae, riengjvaiq duet gouh haizbaengz dumz de bae, lwgfwngz diem gvaq henz dou bae baij ndei, cij iet hwet gaen gou haeujdaeuj.

Gou vadfwngz heuh mehsimj naengh gwnz sahfaz bae. Yawj mehsimj yienghneix, gou dauqfanj mbouj ndei eiqsei lo. Caeuq de caez naengh roengzdaeuj le, gou cam de:“Mehsimj, mwngz daeuj ra gou dwg vih maz saeh ne?”

Mehsimj gangj, ranz de dwg ranzhoj, baezneix daeuj ra yozyau, dwg siengj cam mbat he, baenzlawz banh gij bujcu daeglwg de.

Gou baez anj, daj gij vahgangj caeuq hengzdoengh de, baenzlawz hix yawj mbouj ok de dwg vunz ranzhoj.

Caeuq de gangjgoj gou cij rox, gvan de cibgeij bi gaxgonq couh gvaqseiq lo, song bi gaxgonq gyagoeng gyabuz hix doxgaen gvaqciuh, lw de boux dog ciengx sam lwgnyez, soengq lwgnyez doegsaw. Daegdaih gaenq hwnj daihhag, dahngeih doeg gauhcungh, daegnyez doeg siujyoz, dwg gvan de gvaqseiq le cij okseng, dwg lwggyaxgyaeq.

Cibgeij bi gaxgonq, ranz vunz mehsimj hix gig vuenyungz: Gyagoeng gyabuz cungj cangqmaenh, lwgnyez lingzleih, de caeuq gvan de doxgyaez doxbang.

Mehsimj caeuq gvan de doeg cuhcungh seiz dwg doengzhag, de doeg co’ngeih seiz, bohmeh caeuq daegnuengx aenvih huxci, cungj dai liux, lw de baenz lwggyax. Ranz gvan de couh souciengx de, doeklaeng gyoengqde daj iq daengz hung couh doxndiep doxgyaez, caemhcaiq baenzranz dem.

Mwhhaenx hix mbouj miz geijlai ngaenz, gwndaenj hix mbouj suenq ndei, hoeng, gyoengqde doxmaij doxgyaez, gaenx guh mbaet yungh, gvaq ndaej gig swnhsim.

Bouxgeq naeuz “vunz rox ngoenz gwn, mbouj rox ngoenz dai”. Cibgeij bi gonq seizhah haemh he, gvan de fatbingh, mbouj daengz song ndwen couh biek boh biek meh、biek yah biek lwg bae lo. Aen ranz vuenyungz neix lumj mbwn loemq nei.

Gyagoeng gyabuz gaenq ndaej 70 lai bi, ngamq miz lwg dog neix, seizneix boux gyaeujhau soengq boux gyaeujndaem, siengsim dangqmaz. Mbouj geij ngoenz gyagoeng youh luqlawq laemx baez he, caiq hix hwnj congz mbouj ndaej. Mehsimj ngoenz ciuqgoq song bouxlaux, haemh youh dajleix song lwgnyez, lij aeu guh hongnaz dem, de ngoenznaengz caegcaeg lae raemxda, simfanz saeksaek, miz geij baez lij ngunh bae……

Mehsimj seizneix dwg saeumeh ranz de, danghnaeuz de caiq dingj mbouj ndaej laemx roengzbae, aen ranz neix caen doemq bae lo! Gyabuz yawj de sinhoj ndaej ndang mbouj ndei, gig sim’in, coi de bae yihyen hawj canghyw yawj baez he.

“Ndang mwngz mbouj miz maz bingh, mwngz bae yawj fucanjgoh mbat he ba.” Canghyw gangj.

Canghyw fucanjgoh naeuz mehsimj gaenq mizndang sam ndwen lai lo. Mehsimj dingq le, gig doeksaet, de caeux couh gezcaz, swhgeij nienzgeij baenz hung lo, gvan hix ngamq gvaqseiq mbouj geij nanz…… Saeh neix baenzlawz coh vunz gejgangj?

De itloh dauqma, itloh siengj, simfanz simnyap lai lo.

Gaxgonq hojsouh, de laihnaeuz dwg dajleix gvan de youh guhhong, sinhoj lai cauhbaenz…… Ngoenzlaeng dungx yied ngoenz yied hung, gyoengqvunz raen le, baenzlawz gangj cij ndei?

Mehsimj ngaekngeu ngeix geij ngoenz cij dajsuenq lwnh hawj gyabuz nyi, caih bouxlaux baenzlawz gangj.

Siengj mbouj daengz, gyabuz dingq le dauqfanj gig vuenheij, nyinhnaeuz lan neix dwg lwg de cienh’eiq ce roengzdaeuj nai song bouxlaux. Gyagoeng rox le, cingsaenz hix ndei haujlai lo.

Gawqyienz yienghneix, couh daiq ndei lwg neix ba, mehsimj maemj.

Gij saedceij ranz mehsimj gvaq ndaej engq haemzhoj lo. Geij lwgnyez menhmenh majhung, song bouxlaux hix ciemhciemh doeknyieg. 10 bi ndawde, de aeu ciengx lwgnyez, youh aeu dajleix song bouxlaux, gijgwn、gijdaenj、gijyungh daengx ranz vunz…… Yienghyiengh cungj at ndaej de ajngaebngaeb bae. Haujlai baez, de cungj gag lae raemxda, aenvih, de caen mbouj rox swhgeij lij cengq ndaej geijlai nanz……

Geij bi gaxgonq, gyabuz raen mehsimj baenzneix sinhoj, couh gienq de gaijhaq:“Ranz neix gaenq mbouj miz baengh lo, mwngz swnh lij oiq, vaiq bae ra vunz gap gvaq ba, cij aeu ciengx ndei geij lwgnyez couh baenz, mbouj yungh gvaqniemh gou.”

Dingq daengz neix, mehsimj couh daejsubsub dap goengbuz:“Neix couhdwg ranz gou, bohmeh caeuq gyoengq lwgnyez couhdwg gij maqmuengh gou, gou gyawz cungj mbouj bae!” Mehsimj gangj ndaej gyabuz sim’in dangqmaz. Gyabuz hix gamjdoengh ndaej daej mbouj dingz, daj ndawsim docih gwnz mbwn soengq bawx baenxneix simndei simsienh hawj ranz bonjfaenh!

Yienghneix, de laebdaeb swhgeij ndaem 20 moux reih’oij, ngoenz doek ngoenz, bi gvaq bi, de couh yienghneix haeb heuj cengq gvaqdaeuj, itcig daengz seizneix.

“Mehsimj, seizneix ranz mwngz yied gvaq yied ndei lo, lwglwg lingzleih, baihlaeng itdingh majhung baenzcaiz, hawj mwngz najrongh.” Gou gaem fwngz de ndaetndaet bae, nai de naeuz.

“Deng lo, daegdaih gou hag yw, dayoz yaek doeg sat lo, seizneix youq yihyen lienhguh. Dahngeih hix yaek gauhgauj lo, de siengj doeg swhfan yozyau, gou hix muengh de baihlaeng ndaej lumj mwngz nei, guh lauxsae, son saw gyauq vunz. Daegnyez neix, couh yawj de roengzrengz lainoix lo……” Mehsimj angq naeuz.

“Guek raeuz cwngcwz ndei, doiq dou gij vunz gungzhoj gvansim lailai …… Bi’gvaq, ranz gou ndaej gaijcau hwnq laeuzmoq lo. Bouxdangsaeh lij son gou baenzlawz dajndaem dajciengx, ndawranz saedceij ngoenz beij ngoenz ndei lo. Mwngz yawj, seizneix gyoengq siujhagseng cungj miz bangbouj lo.” Mehsimj yied gangj sim yied hai.

Aiq dwg gij ginggvaq de caeuq vunz mbouj doxdoengz, mehsimj gig rox gyoaen, doq gangj doq gamjdoengh ndaej uet raemxda.

Mwh gou son de baenzlawz guh gij caizliuh sinhcingj bangbouj seiz, de gaem fwngz gou, docih mbouj dingz, vah ndei vah van baenz gyangj, hawj gou cungj najmong caez.

Gizsaed mehsimj mbouj rox, gou dauq gig baiqfug de, baenzneix genhgyangz、baenzneix hauqswnh、baenzneix yawj ndaej gyae, baenzneix gungzhoj lij soengq sam boux lwg doegsaw.

Mehsimj caeuq gou doxbiek le, siujsim sisi byaij daengz bakdou, riuj gouh haizbaengz dumz daenj haeuj din bae, gang aen liengjva he, coh baihrog byaij bae. Yienznaeuz miz di ndukndek, hoeng, de yamqyamq cungj giendingh, rumz hung geijlai fwn doek geijlai cungj mbouj daengx.

Gij fwn lij doeksubsub mbouj dingz mbouj duenh, mboujgvaq beij haxbaenh iq lai lo. Goreiz youq rog cueng dingj rumz dingj fwn, lumjnaeuz bienq ndaej engq sangnengneng、heusausau lo.