Seiq Cuj Swz Youqgaenj

Rox Cungjsuhgi Gaujcaz Gvangjsih

4 nyied 25 daengz 27 hauh, Siz Ginbingz cungjsuhgi daengz Gvangjsih gaujcaz. Mbatneix, raeuz yawj seiq cuj swz youqgaenj bae loengh rox gij eiqsei baihlaeng cungjsuhgi gaujcaz Gvangjsih.

“Iq caeuq hung”. Cungjsuhgi daj gyaeuj daengz rieng cungj dawz gaiqhuq iq haeuj sim. De gaujcaz gij canjnieb makit Mbanjgo’ndoek, mbanj neix gaenq bienq baenz mbaw “mingzben”gyae gyawj cungj mizmingz ndeu, hawj vunzmbanj ndaej duetgungz, lij dazyinx guhhoengh lajmbanj. Gij“cwnghcangjgiz”iqetet neix raiz ok bien faenzcieng hwngfat“sam nungz” hung ndeu.

“Mbaeu caeuq naek”. Cungjsuhgi ngoenz ndeu laebdaeb gaujcaz le Liujcouh song aen canjnieb. Aen cicauyez aeu Liujgungh guh daibyauj neix dwg gij goek laeb guek、gij giek giengz guek; aen canjnieb daegsaek gaiqgwn aeu Lozswhfaenj guh daibyauj neix, yienznaeuz“mbaeumbeng” hoeng gvendaengz gwnzdaenj. Songde cungj gangjmingz giyez yaek majhung hoenghhwd、youq hawciengz yaek gai ndaej bae aeu gag rox cauhmoq.

“Ndaw caeuq rog”. Cungjsuhgi daengz Gvangjsih Bozvuzgvanj yawj le “ciethawfwen” sam nyied sam daengj minzcuz vwnzva biujyienj. De naeuz:“Cunghvaz Minzcuz fukhwng hungmbwk aeu hwngfat Cunghvaz vwnzva.”Roengzrag conzdungj, gyalaeg minzcuz doxgiet, Gvangjsih yaek hamj ok yamq maenhsaed ndeu.

“Seizneix caeuq gaxgonq”. Cungjsuhgi daengz Gvangjsih gaujcaz camh daih’it couhdwg Gveilinz Hungzginh Cangzcwngh Sienghgyangh Canyi Gijnenyenz. Yaek hoenx hingz gij hojnanz diuz roen cangzcwngh moq, liz mbouj ndaej gij cingsaenz gwzming yinghyungz vutmingh、mbouj lau saek di haenx, gij saehnieb hungmbwk yaek guh ndaej hingz, aeu ciengxlwenx genhciz aeu aendangj dazyinx. Cungjsuhgi gangj:“Baezlaeng aeu yamq coh diuz roen moq, buekguh aen moegbiu daihngeih aen bak bi, mbouj ndaej noix saek aen minzcuz, gyayouz、roengzrengz, caiq bae cangzcwngh!”

（ciuq Sinhvazse）