Cunghgung Cunghyangh cungjsuhgi、 Guekgya cujsiz、 Cunghyangh Ginhveij cujsiz Siz Ginbingz mboengqneix cazyawj Gvangjsih le gangjvah dawznaek naeuz: Baenzlawz cungj aeu ciuq gij gietdingh caeuq baijbouh Cunghyangh bae guhdaengz caezcup, naemj doh、dawzcinj、hengz caez aen hwngfat leixniemh moq, dingjmaenh aen diuhgoek guhhong youq ndaw bingzonj gouz baenaj, gamj siengj gamj guh, gyonj rengz guhdoih、dangrap caen guh, cingjdaej suenqveh fuengzre gaemhaed binghraq caeuq hwngfat ginghci nem ndawbiengz, cingjdaej suenqveh hwngfat caeuq ancienz, daemh ok roen moq doinyoengx ranghdieg minzcuz henzguek hwngfat ndeindet, guh baenzsaeh moq fugsaeh caeuq yungzhaeuj gij gapgyaq hwngfat moq, caiq yamqbae moq doinyoengx gij hwngfat saekheu baenaj, caiq dangrap moq gya’maenh caeuq gya ndei gak cuz caezhoz、aenbiengz onjdingh、henzguek caemdingh, cauhlaeb aen Guengjsae gyaeundei sevei cujyi miz gij daegsaek Cungguek seizdaih moq.

4 nyied 25 hauh daengz 27 hauh, Siz Ginbingz miz Gvangjsih Bouxcuengh Swcigih Dangjveij suhgi Luz Sinhse caeuq swcigih cujsiz Lanz Denhliz buenxriengz, gonqlaeng daeuj daengz Gveilinz、Liujcouh、Nanzningz daengj dieg, bae daengz ndaw gijnengvanj、lajmbanj、giyez、bozvuzgvanj daengj, cazrox caeuq naemjngeix hongsaeh ciuq gij cingsaenz Gaiq Cibgouj Hajcung Cienzhoih Aendangj guhdaengz caezcup、guh hagsib songyauq lizsij aendangj、doinyoengx“cibseiq haj”hai hong ndei hwnjdin ndei daengj.

（Sinhvazse）