Cienzgangj Luzcuh singq Liengz, ranzmbanj de dwg seizneix Bozbwz Yen Sanghfung Yangh Bingzsanh Cunh Mbanjluzloz, de coengmingz gyaeundei, rox diuqfoux ciengqgo, lij rox raiz sei boq dig.

Gwn Va’ngaeux Seng Lwg

Riuznaeuz mwh Nijvah aeu rin bouj mbwn, mbouj haeujsim hawj di rin soiq doek daengz Mbanjluzloz, couh baenz aen gumz ndeu, doeklaeng caiq bienqbaenz aen cingj he. Aenvih ndawcingj maj miz va’ngaeux, ndigah heuhguh Cingjva’ngaeux.

Seizde ndawmbanj miz ranz he singq Liengz, mehyah 50 lai bi lo, lij caengz miz lwg. Miz haemh ndeu, yah de fangzhwnz raen dahsien naeuz, gwn gij va’ngaeux aen Cingjva’ngaeux couh ndaej miz lwg. Song gvanbaz neix buenq saenq buenq ngeiz, couh bae mbaet va’ngaeux ma gwn. Mbouj geij nanz, yah de couh roxnyinh aen dungx yiengjhuhu lumj byajraez nei, yienghneix couh mizndang lo. Doeklaeng yah de seng le dah lwg ndeu, song gvanbaz gyaez dahlwg neix lumj gyaez aencaw nei, an coh de guh Liengz Luzcuh.

Ngaiz Ep Guh Yahnoix

Cinciuz Daigangh nienz, Siz Cungz gvaq Bozbwz, raen Luzcuh baenzneix gyaeundei, yaek aeu bak daeuj cawdongq coux de guh yahnoix. Coux Luzcuh ngoenzde, aen mbwn fwjndaem fwjbumz, Siz Cungz daiq vunz daeuj daengz Mbanjluzloz. Luzcuh gaenq hwnj ndoi bae ndoj lo, hoeng ndoj bae ndoj dauq, doeklaeng cix deng Siz Cungz gaemhdawz lo.

Mwh doxbiek, Luzcuh caeuq vunzmbanj gangj：“Ngoenzneix gou bae lo, hoeng aensim gou lij caeuq aen sou doxnem, gou dai hix aeu bienq guh duzhag mbin dauq ranzmbanj, mboujguenj dailix cungj dwg vunz Nanzliuz!”

Miz ngoenz he, Siz Cungz naeuz：“Mwngz gyangngoenz gwn huq ndei, gyanghaemh ninz rug gim, gou doiq mwngz baenzneix ndei, mwngz vihmaz mbouj simhai saekdi ne?”Luzcuh rox mbouj ndaej buetdeuz daengz gizwnq bae lo, ngeix le yaep ndeu han naeuz：“Gou couhdwg gig niemh ranzmbanj gou. Yaek hawj gou simhai najriu, aeu laeb aen laeuz sang miz fanh ciengh, hawj gou ndaej hwnzngoenz muengh coh ranzmbanj.”Siz Cungz dingq le naeuz:“Gij saeh iqetet neix, vihmaz mbouj caeuxdi naeuz gou nyi?”

Doeklaeng Siz Cungz couh hwnj le aen “Laeuzginhguj”. Aen laeuz neix moix caengz cungj mbouj doxdoengz, sangsetset daengj haeuj gwnz mbwn bae, benqfwj heuxgeuj ledled, aen cueng hai coh baihnamz, ndaej muengh daengz giz gyae- yaeng’yaeng baihnamz.

Hoenz Bienq Duzhag Dauq

Luzcuh maj ndaej gyaeu, lajbiengz cungj rox caez, byawz rox gingqyienz cauxhux lo. Seizde Cauvangz Swhmaj Lunz miz boux cienggun heuhguh Sunh Siu, dingqgangj Luzcuh boux yahnoix Siz Cungz gyaeundei caemhcaiq dungxcaiz rimrwd, couh heuh Siz Cungz aeu Luzcuh, Siz Cungz mbouj hawj.

Sunh Siu hozgaek dangqmaz, couh gangj gij vah mbouj ndei Siz Cungz hawj Swhmaj Lunz nyi, Swhmaj Lunz couh laihnaeuz Siz Cungz mbouj cungsim, doengzeiq de daiq bing bae humx Laeuzginhguj. Siz Cungz rox le doiq Luzcuh naeuz：“Ngoenzneix gou vih mwngz daekcoih bouxmizgienz lo.” Luzcuh doq daej doq gangj：“Gou nyienh doq dai youq dangqnaj mwngz!” Gangj sat de raiz souj sei ndeu, duet buhsei, daj laeuz sang diuq roengzbae dai lo. Caenh raen raq rumz ndeu ci gvaqdaeuj, Luzcuh bienqbaenz duzhag ndeu, mbin coh baihnamz bae.

Duzhag mbin dauq ranzmbanj, hwnzngoenz daejaa. Bohmeh Luzcuh cix loqraen dahlwg daengx ndang lengh lwed dauqma. Vunzmbanj ngeix daengz gij vah Luzcuh, couh vix duzhag naeuz：“Neix couhdwg Luzcuh!”Caiq laeb miuh bae geiqniemh de, gaij coh diuz dah baihnaj Miuhluzcuh guh Dahluzcuh. Dingj Lingjswngnij miz ndaek rinvahgangh hungloet ndeu, cienzgangj dwg duzhag mbin dauq le youq gizneix dingz din yietnaiq, doeklaeng vunzmbanj heuh ndaek rin neix guh “Rinluzcuh”.