Vangz Cauh youq aen siujgih baihrog hai aen cauhsi iq he, vih fuengbienh gyoengqvunz ndaw siujgih cawx doenghyiengh, de daegdaengq youq baihlaeng cauhsi hai aen dou- vang he.

Geij ngoenz neix daeuj, Vangz Cauh fatyienh gij doxgaiq ndaw cauhsi laebdaeb mbouj raen geij yiengh, cungj dwg gij doxgaiq cug ndaej cigsoh oet haeuj ndaw bak.

Vangz Cauh cam dahsau bang gai doxgaiq, dahsau naeuz de hix mbouj rox vihmaz, caemh mbouj raen maz vunz daeuj cawx gij doxgaiq mbouj raen gvaq. Vangz Cauh roxnyinh geizheih, de baez cazyawj genhgung couh doeksaet lo, duz mahenj hung he moix ngoenz deq youq aen douvang cauhsi, swnh vunz mbouj haeujsim seiz laeglemx ndonj haeuj cauhsi daeuj, youq gwnz gaq baij gij gwn haenx gamz bau doxgaiq he, baenq ndang couh buet.

Ngoenzneix, Vangz Cauh gyawz cungj mbouj bae, daegdaengq youq ndaw cauhsi deq “bouxcaeg” daeg- bied neix.

Vangz Cauh da mbouj yaep yawj genhgung, naengh baenz buenq ngoenz, duz mahenj hung haenx lumjbaenz gaenq rox nei, ngaeuz cungj mbouj raen. Vangz Cauh miz di saetmuengh, cingq yaek baenq ndang byaijdeuz seiz, duz mahenj hung haenx daeuj daengz lo.

Duz mahenj hung neix youq baihrog aen douvang muengh yaep ndeu, raen mbouj miz maz vunz, youh laeglemx ndonj haeuj ndaw cauhsi daeuj. Duz mahenj hung neix ndwn youq baihnaj gij gwn haenx muengh yaep ndeu, baezneix de senj aen gyaeqgaeq baucang ndei ndeu, baez aeu bak gamz dawz baenq ndang youh buetdeuz lo.

Vangz Cauh itloh riengz duz mahenj hung neix bae, de byaij gvaq geij diuz gai, vang gvaq geij diuz loh, ngut bae ngut dauq, duz mahenj hung neix youq aen ranz youh daemq youh iq he dingz roengzdaeuj. Aen ranz iq neix miz di doekgungx, henz ranz lij miz gaiq reih byaek he heufwdfwd. Fa dou diet iq haep dwk, duz mahenj hung yungh gyaeuj baez daemj, dou couh hai lo.

Vangz Cauh muengh haeuj ranz bae, ndawranz gaebgebgeb, doengh- yiengh mbouj miz geijlai, cix baij ndaej caezcingj dangqmaz. Boux vunz he ninz youq gwnz congz, aeu denz moek ndang doengh hix mbouj doengh, faj naj cienq haeuj baihndaw bae. Duz mahenj hung neix byaij gaenh aen congz raeuq song sing le, boux ninz gwnz congz haenx cij menhmenh ngeuxgyaeuj gvaqdaeuj.

Seizneix Vangz Cauh yawj ndaej seuq lo, dwg daxheiz ndaej 60 bi baedauq ndeu, de song aen da mboep roengzbae laeglumlum, ndang gig byom, mbangmbimbi lumj mbaw ceij nei, byomroz ndaej lumjbaenz mbouj miz saekdi rengz.

Vangz Cauh ndwn youq rog ranz gwq muengh gwq naemj, roxnyinh daxheiz neix youq gyawz raen gvaq nei, yaep neix cix ngeix mbouj hwnj.

Cij raen duz mahenj hung neix aeu din ndeu caij dawz bau doxgaiq haenx, aeu bak sik byak baihrog bae, ngiengxgyaeuj ndenq hawj daxheiz. Daxheiz iet faj fwngz byombyangbyang de, lumhlumh aen gyaeuj duz mahenj hung, ndaq naeuz:“Daeghenj ha, mwngz dwg mbouj dwg youh bae gyawz caeg doxgaiq bouxwnq lo, gou mbouj gwn gijneix.”

Raen daxheiz mbouj haengj gwn doxgaiq, mahenj hung gip lo, naengh youq bak congz raeuq mbouj dingz. Gvaq haujlai nanz, daxheiz mbouj nyaenxsim, fwngz saenzdedded gaem aen gyaeqgaeq haenx haeb gaemz iq he, caiq ndoet gaemz raemx he soengq roengzbae.

Daxheiz neix aiq cibciengz baenzbingh, henz ndang vihmaz mbouj raen saek boux vunzcaen ganqleix ne? Vangz Cauh naemj.

Vangz Cauh mbouj caiq lawq saekdi, byaij haeuj ranz bae.

Raen Vangz Cauh bouxseng neix haeuj ranz, daxheiz caeuq duz mahenj hung haenx cungj nyengh lo. Duz mahenj haenx hix mbouj aj bak raeuq, de buet daengz henz ndang Vangz Cauh, ngauzgyaeuj baet rieng, lij aeu ndang bae ngad gavaq de, angqcoux de haeuj ranz daeuj.

“Daxheiz, mwngz baenzbingh luma? Gij vunz ranz mwngz ne?” Vangz Cauh cam.

Daxheiz cengqgengz naengh hwnjdaeuj, sing iq naeuz:“Gvan gou caeuq daeglwg gou haujlai bi gaxgonq couh mbouj youq lo, gou boux ndeu gag youq neix, lij miz Daeghenj buenx gou ne. Daeghenj lij iq seiz couh deng bouxcawj gonq vut bae, gou daengz gyawz de couh gaenlaeng daengz gyawz, dou doxbaengh gvaq ndwen- ngoenz gaenq ndaej 5 bi lo. Gou bingzseiz ndaem di byaek gai, geij ngoenz neix mbouj rox vihmaz gyaeuj ngunh daraiz hwnqcongz mbouj ndaej, Daeghenj ciengzciengz daj baihrog gamz di doxgaiq ma, dwg caeg aeu duh mwngz luba?” Daxheiz gangj sat couh iet fwngz bae gaem diuz faexmbaenq henz congz yaek moeb Daeghenj.

Vangz Cauh gipmuengz bae lanz, Daeghenj hix swngzgei ndoj haeuj baihlaeng Vangz Cauh bae, loh ok song aen da muenghyawj daxheiz.

“Daegmbauq ha, danghnaeuz daeglwg gou lij youq, hix lumj mwngz yienghneix hung lo.” Daxheiz naeuz.

“Gou caeuq gvan gou baenzgya ceiz, 30 geij bi cij miz daeglwg gou. 20 bi gaxgonq aen seizdoeng nityauyau, daeglwg gou gvaq 7 bi ngoenzseng, dou ranz ndeu sam boux angqfwngfwng bae gunghyenz youz. Dauqma deq daengheu gvaq maxloh seiz, aen ci rag namh he lumj fatbag nei coh dou mbiengj neix cung gvaqdaeuj, seizhaenx henz ndang dou lij miz laeq lwgsai he, nienzgeij caeuq daeglwg gou ca mbouj geijlai. Boux- gvan gou muengz nyoengx laeq lwgsai haenx gvaq mbiengj ndeu bae, cihgeij caeuq daeglwg cix deng ci nap lo.”Gangj daengz neix, daxheiz gaenq daej mbouj ok sing.

Daxheiz youh naeuz:“Gou diuz ga ndeu deng raek bae, seizhaenx, gou dungx saej yaek goenq, caen siengj riengz song bohlwg caez bae suenq lo. Hoeng gvaqlaeng caiq naemj, vunz suenq mbouj beij mbwn suenq, gyoengqde song bohlwg yienznaeuz mbouj youq lo, cix gouq ndaej diuz mingh boux lwgnyez haenx, mboujnex lajmbwn youh lai miz ranz vunz ndeu siengsim lo.”

Gij vah daxheiz hawj Vangz Cauh doeksaet yat, ndaw uk de sikhaek dauqngeix gienh saeh 20 bi gaxgonq.

Bihaenx seizdoeng nitsisi, Vangz Cauh hix ngamq ndaej 7 bi, ngoenz- haenx dwg lajbyonghngoenz singz- geizroek, daxmeh de youq gwnz haw gai byaek, de yaek soengq ngaiz bae hawj daxmeh. Seizhaenx de cingq caeuq ranz vunz sam boux ndeu deq daengheu yaek gvaq maxloh, aen ci rag namh he lumj fatbag nei coh gyoengqde 4 boux cung gvaqdaeuj, daxau haenx da raeh fwngz riengj muengz nyoengx de gvaq mbiengj ndeu bae, cihgeij caeuq daeglwg cix deng gienj haeuj laj loek ci bae, yah de diuz ga he hix deng raek bae lo. Gvaqlaeng, bohmeh Vangz Cauh hix ciengzciengz daiq de bae yawj daxheiz haenx, docih gvan de gouq diuz mingh daeglwg. Doeklaeng mbouj rox vihmaz daxheiz haenx mbouj youq gizhaenx lo. Bohmeh Vangz Cauh cazcam vunz- wnq, cungj mbouj rox daxheiz haenx buen gvaq gyawz bae.

Vangz Cauh yied naemj yied gikdoengh, naeuz:“Daxheiz, gou couhdwg boux lwgsai bihaenx daxau gouq ndaej ha, danghnaeuz mbouj baengh sou, gou hix mbouj ndaej lix roengzdaeuj, sou dwg vunzaen gouq- mingh gou. Gvaqlaeng dou daengx ranz ra mbouj raen mwngz, hix mbouj rox mwngz gvaq gyawz bae, simgip yaek dai, ngoenzneix ndaej doxbungz, dwg aen mbwn hai da ha.” Vangz Cauh lwgda dumzswdswd gangj.

Ciepdwk, Vangz Cauh youh gienj diuz genbuh baihgvaz hwnjdaeuj naeuz:“Daxheiz, mwngz yawjyawj, seizhaenx daxau yunghrengz fid gou gvaq mbiengj ndeu bae, diuz gencueg neix lij deng lot bae gaiq naeng youh hung youh raez ndeu ne.” Daxheiz lumhlumh diuz rizsieng gencueg Vangz Cauh, danq gaemz heiq he, raemxda youh ndik roengzdaeuj.

“Daxheiz, mbouj, daxmeh, mwngz couhdwg daxmeh gou, daj ngoenzneix hwnj, gou mbouj hawj mwngz dandog gvaq ndwenngoenz lo, hawj gou ganqhoh mwngz gvaq seizgeq ba!”

Daxheiz ngaekngaek gyaeuj, gaemdawz faj fwngz Vangz Cauh ndaetndaet bae.