Buzvuengz dwg bouxcoj Yauzcuz cungj baiqfug ndeu, bi bi liggaeuq ngux nyied daengz caet nyied, gak mbanj Yauzcuz Guengjsae、Huznanz cungj gvaq ciet Buzvuengz, guh gak cungj hozdung caeq Buzvuengz, mbaenjgouz biengz dingh vunz onj.

Gojgaeq Cienznaeuz

Gunghcwngz Yauzcuz riuz miz gij goj “Buzvuengz sam beixnuengx”. Goj daih’it dwg naeuz Buzdaih youq Dangzvangz, Buzngeih youq Ouhcai, Buzsam youq Siqgyangh, lij miz vunz naeuz “daxbuz Dangzvangz ceiq cingqheiq, daxbuz Si’gyangh ceiq funglouz, daxbuz Ouhcai ceiq ak daej.” Lingh aen goj cix naeuz Cejdaih youq Mbanjyangzmeiz, Cejngeih youq Mbanj- cingjdouz, Cejsam youq Mbanjdagwnghdij. Lij cienznaeuz Buzvuengz dwg yah Buenzvuengz. Buzvuengz lij youq haenx, ciengzseiz guh saeh ndei, caux fuk hawj vunzbiengz.

Gangjnaeuz, Dangzciuz Lij Dan youq Meiz- sanh ndojnanh gvaq. De ndoj haeuj Miuh- buzvuengz bae, youh hwnj yieng mbaenjgouz Buzvuengz haeuj de, caemhcaiq nyinh Buzvuengz guh mehciengx. Gvaqlaeng Lij Dan ndoj gvaq cainanh, swnhleih dang vuengzdaeq. De mbouj lumz aencingz Buzvuengz, dang vuengzdaeq bi daihngeih, youq ngoenz ngux nyied ngeihroek couh bae Miuhbuzvuengz vih mehciengx “dwksouh”, fung Buzvuengz guh “Ginhgvanh Swngmuj”, caiq soengq aen goenhgim ndeu guh geiqniemh. Yienghneix couh menhmenh baenz dwksouh、liebyawj、sou bing sam aen cietgeiz. Liggaeuq ngux nyied ngeihroek dwg ngoenzseng Buzvuengz, ngoenzde yaek gawjbanh hozdung bae dwksouh; loeg nyied ngeihsam daengz ngeihhaj cix aeu ram duzyou Buzvuengz bae liebyawj, guh baenz sam ngoenz; caet nyied cocaet cix gaj vaiz sou bing, daengz neix gij hozdung guhcaeq couh sat lo. Vih hen ndei aen goenhgim, mbouj hawj de law bae, vunzlai lij dingh ngoenz loeg nyied ngeihhaj banh hozdung “ciengj bauqva (goenhgim)”.

Neiyungz Cietheij

Yauzdangzvangz Gyahvei Yangh sam bi guh gaiq ndeu, ngoenz liggaeuq loeg nyied ngeihsam ram Buzvuengz okdaeuj, 50 vunz gapbaenz duivuj youzsaenz. Gyoengqde daj Dunghyangh Byadangzvangz lieb daengz Sihyangh Mbanj- ciyouz, caiq bae Bwzyangh Cangzgyah、Lingjveij、Sizbwnz daengj mbanj, ngoenz daihngeih couh dauqma ndawmiuh. Sam ngoenz ciet ndawde, hozdung “Buzvuengz liebyawj” dwg gij hainduj aen ciet neix, “Buzvuengz” daengz gizlawz, vunzmbanj gizlawz couh faenfaen bae caeq de, gouz rumz swnh fwn laeng. Daengz gwn ngaiz- bakranz Yauzcuz, vunzvunz cungj gyaez daeuj ciemz.

Loeg nyied ngeihhaj caiq an “song bauq”, “bet ranz cibsam mbanj” bae ciengj “bauqcawj”, yienghneix bae dingh “ranz guhcawj”gaemguenj gaiq baihlaj de. Mbanj rog gak singq cix daeuj ciengj “bauqhek”, byawz ndaej couh dawz ma ranz gungq, daengz gaiq gaxlaeng caiq gapdoih dauq boiz, guh faenh nauhyied de. Dieg foux saeceij ciengj bauqva haenx, gyoengqvunz gvaengz dwk baihrog sam caengz baihndaw sam caengz, vunz lai vunz daih. Haujlai vunz lij benz hwnj gofaex seiqhenz bae, bouxboux cungj siengj yawj gij nauhyied ciengj bauqva. Cawz gijneix, Yauzcuz doxdax diuq foux gvangjcangz、gwn ngaizyouzcaz Gunghcwngz、foux lungz、doxdax dwk lamzgiuz daengj hozdung cungj guh dwk foenxfoenx. Gyoengqvunz Yauzcuz、Bouxgun、Bouxcuengh daengj caeuq bouxhek gak dieg doxcomz giz ndeu, caez caemz caez angq.

Ciet Buzvuengz Gunghcwngz hawj gak minzcuz beixnuengx doxgyau doxrox, demgiengz minzcuz vwnzva nyinhdoengz、hwngguh deihfueng vwnzva、coicaenh gwnzbiengz doxgiet, hawj seizdaih moq gij ndwenngoenz vwnzva lajmbanj dem rongh dem saek.