“Youq ndaw segih dou, vunzlai guhdoih gvaq ngoenzciet gak minzcuz, gak minzcuz doxgiet caezhoz baenz ranz ndeu.”Liz Cinginz——dax- cejdaih Bouxcuengh youq Nanzningz Si Sihyanghdangz Gih Cunghvaz Cunghlu Segih youq 34 bi nanz de baenzneix naeuz. Aen segih neix youq ranghdieg vunz lai haw hoengh gyawj Aen Camh Nanzningz Hojcehcan, ndawde miz vunz Bouxgun、Boux- cuengh、Veizvuzwjcuz daengj 19 aen minzcuz, dwg daengx guek aen segih yienghbanj minzcuz doxgiet baenaj.

4 nyied 13 hauh, Cunghvaz Cunghlu Segih guh aen hozdung gyoengqvunz gak minzcuz caez angq“sam nyied sam Bouxcuengh·cungj riengz aendangj byaij·haenhndei aencingz dangj”. Gyoengqvunz Boux- cuengh ndaw neix aeu ngaiznaengj raiz、ceizbyaekngaih gyoebbaenz yienghsiengq cihsaw“angqhoh Cungh- goz Gungcanjdangj laeb ndaej 100 hopbi”; ranz Maijdusung·Yisung——vunz Veizvuzwjcuz daj Sinhgyangh daeuj de daengx ranz gag guh gijgwn ndeigwn lumj ngaizfwngzvaz、aen nangzbingj、roix nohyiengz gangq daengj……Gyoengqvunz gak minzcuz ndaw segih neix doxcomz gvaq ciet guh angq, ciengq go diuq foux, guhdoih angqhoh aen ciet“sam nyied sam Bouxcuengh”.

4 nyied 8 hauh, aen yizsiz hai guh hozdung daengx gih guh“ndwen senhconz minzcuz doxgiet”de youq Fangzcwngzgangj guh, neix hix dwg daengx Gvangjsih daj bi 2018 dox- daeuj, daih 14 baez ndabaiz ndaw gih gizgiz cungj guh“ndwen senhconz minzcuz doxgiet”.

4 nyied 8 hauh, Nanzningz Si Vujmingz Gih Senhhuz Cin guh aen hozdung eu fwen cawjdaez ndwen senhconz minzcuz doxgiet, haujlai boux canghfwen eu fwen lwnh minzcuz doxgiet, vunzlai baez dingq couh rox, youh mizyinx youh ndeidingq, boux- yawj bekfwngz bobbob; 4 nyied 10 hauh, Bwzswz banh baenzroix hozdung“sam nyied sam Bouxcuengh·minzcuz dijyuz ak”, diuq fouxfaexsaux、caij maxfaex、bauq aendomq daengj, yinx haujlai vunz daeuj yawj; 4 nyied 14 hauh, aen hozdung cawjdaez vunzlai ciengq go hoengz“sam nyied sam Bouxcuengh· youq Guengjsae ngamj- ndei”bi 2021, youq Nanzningz Si Cinghsiusanh guh lo……

Aen ciet“sam nyied sam Bouxcuengh”, mboujdan dwg aen ciet gyoengqvunz gak minzcuz caemh gvaq, dwg diuzsai youqgaenj hawj gak minzcuz lai doxgiet raeuh, caiqlij dwg aen bingzdaiz hawj vunzlai nyinh- doengz gak minzcuz vwnzva.

（Liu Ciyungz Lai Gyanghmeiz）