Youq Mbanjcuengh Sihlinz Yen rangh Dahdozniengz duenhgwnz, miz cungj fungsug doxaeu daegbied ndeu, lwgsau daengz nienzgeij haq le, cix mbouj dwg haq okbae, cix dwg aeu gwiz hwnj coemq, cungj doxaeu daegbied heuhguh “aeugwiz” neix daj ciuhgeq couh riuzcienz daengz seizneix, caiqlij raen miz lai、hwng raeuh. Vaenlaex dwg baih ranz bouxmbwk guh, mbouj sou ngaenzlaex caeuq doxgaiq.

Fungsug aeugwiz gaenq miz 2000 lai bi lizsij, haq lwgmbauq baenz fungsug aeugwiz ndawde aen gingj gig saenzmaed yinxvunz ndeu, ndaej vunzraeuz naeuz dwg “gueklwgmbwk henz Dahdozniengz”, dwg Sihlinz cungj fungsug doxaeu daegbied gag miz、yinxdaeuz lai raeuh、heuhcomz hoenghhwd ndeu. Aeugwiz cawjdaeuz dwg lwgsau yaekaeu, lwgsau cawjdoengh genj bouxgvan bonjfaenh habhoz haenx. Youq ngoenzndei aeugwiz, hozdung yienhciengz lai yiengh ndeiyawj, miz laengzhaq、doiqfwen、ciengj haeuxnaengj、gingqlaeuj、rap raemx haeuj ranz、bawxmoq aemq gwizmoq haeuj rugmoq daengj, ndawde ceiq yinxvunz dwg laengzhaq, mehmoiz caeuq bawxmoq daiq aendoih ciepcaen bae daengz ranz lwgmbauq, hoeng yaek haeuj bakdou cix mbouj yungzheih, bakdou miz faexsaux caeuq caencik baengzyoux lwgmbauq laengz dwk, baih lwgsau itdingh aeu ginggvaq haujlai cungj gaujniemh cij ndaej haeuj dou couxcaen, lumjbaenz bawxmoq yaek ndoet sam duix laeujhaeux, baih lwgmbwk yaek caiduenz caeuq doiqfwen ndaej hingz daengj. Caiqlij gwizmoq bae daengz ranz lwgmbwk, caemh aeu ciepsouh gaujniemh, gwizmoq yaek rap rap raemx ndeu bae daengz henz gangraemx ranz lwgmbwk, yiengh byaij roen aeu habngamj iugouz, aeu cigsoh rap daengz ranz lwgmbwk cij ndaej. Gijneix dwg niemh ndangrengz gwizmoq, danghnaeuz raemx mbouj sinz okdaeuj geijlai, gangjmingz gwizmoq ndang rengz. Bouhloh aeugwiz caeuq bingzciengz aeubawx doxdoengz, cungj aeu ginggvaq camcaen、dinghcaen、hab betcih、couxcaen daengj. Riengzdwk gaijgwz hailangh, guhfap doxaeu vunzlai caemh miz bienqvaq lo, aeugwiz caeuq aeubawx bouhloh caeuq baizciengz cungj gemjnoix bae haujlai.

Cungj doxaeu neix caeuq gij fungsug hwnj- coemq diegwnq guek raeuz mbouj doxdoengz, fungsug aeugwiz ndawde, bouxsai “haq” haeuj ranz lwgmbwk haenx, bohmeh dem banlaux doiq de caeuq lwg bonjfaenh doxdoengz, mboujlwnh youq ndawranz roxnaeuz gwnzbiengz, vunzraeuz doengz- yiengh aeueiq gyoengqde, caeuq bouxsai ndaw mbanj ndaw coengcug miz diegvih doxdoengz. Haujlai lwgmbauq diegwnq doiq fungsug aeugwiz gig haengjgyaez, miz lwgmbauq Gveicouh、Yinznanz daengj dieg haenx cix angq “haq” bae Sihlinz. Youq Nazlauz Yangh, miz bouxgwiz daegbied ndeu heuhguh Cungz Yenz, de dwg daj Hah’wjbinh daeuj. Cibgeij bi gaxgonq, de caeuq dahsau Mbanjnazlaiz Liz Veihungz roxnaj doxgyaez, doeklaeng deng gij swyenz vanzging gyaeundei Nazlauz caeuq gij dahsau saundei gizhaenx “loxyaeuh”, hixnaengz “haq” bae Mbanjnazlaiz. Youq Mbanjnazlaiz aen mbanj miz 45 ranz vunz neix, gij bouxsai lumj Cungz Yenz baenzneix “haq” bae haenx couh miz 27 boux.

Fungsug aeugwiz youq bi 2012 ndaej lied haeuj swcigih buek daihseiq feihyiz henhoh mingzloeg. Aen yienh neix ingbaengh gij ranzgaeuq hakdoj Cinzsi、gij gingjsaek gyaeundei yinxvunz Dahdozniengz、fungsug aeugwiz Mbanjnazlaiz, haenqrengz hwngfat hongsaeh cwxcaih youzcet lajmbanj, yinx haujlai hekyouz bae yawjngonz, baenz diemjrongh vunzmbanj demlai souhaeuj ndeu.