Laeng mbanj dou miz aen bo ndeu, coh heuhguh Bosoem, liz mbanj dou aiq miz goengleix he gyae. Bo neix dwg bonamh, hix miz di ringonj cab ndaw namh. Bi 1984 gaxgonq, Bosoem dwg bofwz, yienznaeuz noix miz gofaex hung, hoeng, gofaex iq、gooen、gogaeu、gohaz doenghgij gofaexcaz neix, doxdaz doxgeuj ndaetfoedfoed, maed- mwdmwd, lumj gaiq re dwkbya nei, nanz ra ndaej roen hwnj bo bae. Seizhaenx vunzmbanj dou mbouj dawz aen bofwz neix haeuj da saekdi.

Bi 1984, mbouj rox byawz sien naeuz Bosoem miz meuzgim, duzboux duzmeh, moix duz aiq miz 10 gaen, lij miz 3 duz meuzlwg dem. Mbouj rox caen gyaj, fanjcingq boux lwnh boux nyi, mbanj cienz mbanj dingq, liuz ndaej ningcumzcumz, liuz doh baenz yienh bae.

Meuzgim dijbauj nw! Dangh- naeuz byawz ndaej geij duz meuzgim neix, ciuh vunz de couh fatcaiz raeuh lo, lauheiq ciuh lwg ciuh lan de hix mbouj you gwn you daenj bw. Ndigah miz haujlai vunz hwnj bo bae vat namh ra meuzgim.

Boux bae nduj dwg song daeglwg Yahgimq mbanj dou. Yahgimq neix dwg vunz sengj rog, ranzvunz de daeuj lajdin Bosoem guh gang’vax oengqvax gai. Seiz sauiq couh raen de riengz vunzranz daeuj guhhong. Doeklaeng couh haq daeuj guh bawx mbanj dou. Mbouj geij bi, couh naeuz de baenz gimq lo. Dingqnaeuz de suenqmingh cinj, byoekgvaq hix cinj, naeuz de dwg buenq vunz buenq sien. Mingzdaeuz guhgimq de okmingz raixcaix, seiq- lengq geijcib aenmbanj cungj miz vunz daeuj ra de siu cai siu nanh, ndigah couh heuh de guh Yahgimq.

Bi 1984, song daeglwg de cingq baenzmbauq, vunz sang ga maengh rengz hung. Songde dawz liemz dawz gvak hwnj bo bae vat bo, gaenx dangqmaz. Vunzmbanj raen le, hix gonqlaeng bae riengz, bouxboux cungj lau bouxwnq vat ndaej meuzgim gonq. Vunz mbanjnden raen le hix youq mbouj onj lo, daihgya ceng gonq lau laeng cungj hwnj bo bae ra meuzgim, boux raen boux bae, mbanj riengz mbanj ndij.

Dangqnaj Bosoem dwg rangh diegbingz ndeu, dieg neix miz 60 lai aen mbanj, yienhsingz hix youq gaiq diegbingz neix. Fanzdwg gij mbanj lah ndaej raen Bosoem, ca mbouj geijlai ranzranz miz vunz hwnj Bosoem bae vat namh ra meuzgim. 3 ndwen seizgan ndawde, Bosoem dauqcawq dwg vunz, guggug gehgeh cungj miz. Daj laj bo yawj bae, Bosoem lumj baek geizlaisaek nei, rim bo rim lueg, valoekloek, doenghyebyeb, biufifi. Bide, gienh saeh neix gingdoengh daengx yienh.

Seizhaenx, daxboh caeuq daeggo gou youq rog guhhong. Dahcej caeuq gou lij doeg siujyoz, vunz nyieg rengz iq. Daxmeh nyaengq hongdoengh hongranz, ranz gou mbouj miz byawz ndaej hwnj bo bae riengz vunzlai ra meuzgim, vihneix daxmeh ciengz haeujaw naeuz:“Ranz raeuz cij ndaej ngonz vunz ndaej meuzgim、ngonz vunz fatcaiz lo.”

6 ndwen seizgan gvaqbae lo, moix cik namh Bosoem cungj deng vunz vat gvaq, hoeng, mbouj raen saek boux naeuz ndaej meuzgim, vunzlai cungj simnaiq lo. Gyoengqvunz hwnj bo bae haenx hix ngoenz beij ngoenz noix lo.

Cingq youq seizneix, Yahgimq mbanj dou naeuz gij rin Bosoem dwg gij haexnyouh meuzgim bienqbaenz, cijaeu dawz gij rin neix dauqranz oemq youq ndaw gang’vax, mbouj hawj de raen ndit raen rumz, cungj miz ngoenz ndeu rox bienq dauq baenz gim.

Vunzlai couh caenx haeuj gizdieg gai oengq gang ranzdaiq Yahgimq bae cawx gang, yaepyet oengq gang ranz de couh mbouj gaeuq gai lo. Vunz ranzdaiq Yahgimq baenz- ngoenz baenzhwnz ganj guh, seng- eiq hoenghhwdhwd.

Mbatneix, daxmeh gou mbouj cuengq gvaq lo. Ngoenzhaenx banhaemh, souhong dauqranz, mbwn gaenq laep, cij raen de gipmuengz nda rapcengh okdou, hix mbouj naeuz bae guhmaz.

Aen lai cungdaeuz gvaq le, de dauq lo. Laxlawz dwg be Bosoem aeu rin. Rin ndaw cengh rimfoedfoed, ndarap gwnzmbaq de naekwt, de baez diq rap, aj bak baegfofo. Hoeng, de mbouj yietnaiq saek yaep, couh dawz aen gangraemx gaenq dek ndawranz daeuj baet seuq, aeu naez daeuj bouj gizdek. Bouj ndei le, youh aeu gaen ndaek daeuj uet aengang, ndaw rog cungj uet ndaej sawrikrik, caiq dawz rin caep roengzbae. Doeklaeng bak- gang sien bu caengz suliu he, caiq aeu aen ndoengj bae goemq, gwnz ndoengj bu mbaw ceijhoengz ndeu, neix heuh- guh gvaqhoengz. Gwnz ceij lij aeu aen daengqfiengz ndeu bae gaemh, lau mbaw ceijhoengz lot bae.

Daxmeh guh gijneix, nyinhcaen dangqmaz. Daxboh raen le naeuz vunzbag guh saeh huk! Aen gang neix git da, yaek dem gou dawz bae dub vaih bae. Daxmeh dingq le gip lo, naeuz:“Aengang youq neix youh mbouj cam mwngz aeu haeux gwn roxnaeuz aeu buh daenj, git da mwngz maz ne? Mwngz dub vaih gou aeu ngaenz bae cawx aen moq dauq.” Daxboh mbouj oksing lo, de lau daxmeh bae cawx aen moq dauq sai ngaenz. Aen gang gvaqhoengz neix ce youq laj congzcaet. Ngoenzmiuz ngoenzciet daxmeh aeu laeuj noh bae caeq, muengh de vaiqdi bienqbaenz gim. Dingqnaeuz vunzmbanj cungj dwg yienghneix guh.

Buenq bi gvaqbae le, cij lw song daeglwg Yahgimq lij hwnj bo bae ra meuzgim. Song beixnuengx haetromh dawz liemz dawz fouj okdou, ban- haemh rap fwnz dauqranz, laeng ranz de doi ndaej gong fwnz hung lumj aen bo iq nei. Dingznoix vunzmbanj haenh songde rengzngangq, dingzlai vunz- mbanj riu naeuz songde ngah meuzgim ngah ndaej baenzbag lo.

Mboujguenj vunzmbanj baenz- lawz riu, songde mbouj leix mbouj langh, gag guh faenh de. Songde dawz gij haz roz fwnz roz baez di baez di coemh bae, Bosoem yied daeuj yied seuqsak. Mbouj geij nanz, Bosoem fwzrwd mwh gonq gaenq bienqbaenz aen bo’ndoq ndeu.

Bi ndeu gvaqbae le, Bosoem dauq did miuz heu. Haemq nanz, vunzmbanj cij rox gij miuz heu neix dwg gomiuz faexnganqciq, dwg song daeglwg Yahgimq bae ndaem. Daj seizhaenx hwnj, Bosoem bi beij bi heurwd、mwncup. Gogo faexnganqciq sohrwdrwd, daengjvidvid, rengzdeng- deng, lumj bouxbing soujsauq nei. Song beixnuengx yied yawj yied simhai, vunzmbanj yied yawj yied hozhaenz.

Byaibi bi 1986, vunzranzdaiq Yahgimq dauq ranzcoj gvaqcieng, caiq mbouj raen daeuj guh gang’vax lo. Gizdieg guh gang deng gyoengqde vat baenz aen gumh hung ndeu, baez doek fwn, ndaw gumh gyaeng raemx rimfoed. Bi 1988, song daeglwg Yahgimq dawz aen gumh neix gya gvangq gya laeg, humx baenz daemzbya, dajsuenq ciengx bya ciengx bit. Guh aen daemz neix sai bae baenz bi seizgan nw. Bi 1989 seizhah, cij ndaej roengz byalwg、cuengq bitnumh. Vunzmbanj raen le gig da’nding.

Bi 1990, faexnganqciq baenz gai lo, 10 lai fanh go. Miz lauxbanj daeuj soucawx, lij gag daiq vunzhong daeuj raemj dem. Bihaenx ranz Yahgimq ruq canh ndaej bit ngaenz hung ndeu. Couh youq bide, ranz de daengj ndaej ranzlaeuz, song fungh sam caengz, ndaw rog cungj nem meng’vax, cang ndaej gyaeundei raixcaix. Aen laeuz neix, youq gyang mbanj gig lwenqda. Seizhaenx, ranz Yahgimq dwg ndaw mbanj ranz daih’it hwnj ranzlaeuz.

Vunzmbanj hozhaenz youh da- nding, caemhcaiq hix singjuk lo, naeuz Bosoem caeuq aen daemzbya dwg diegnamh vunzlai, wnggai gvi dauq vunzmbanj, baen hawj gak hoh.

Hoeng, song daeglwg Yahgimq baenzlawz doengzeiq? Songde cungj gaemh coenz vah ndeu——“Bo dwg bofwz, daemz hix dwg diegfwz, byawz haifwz gonq couh gvi byawz.”

“Dwg sou haifwz la? Dwg vunzlai bang sou hai.”

“Buenq yienh vunz cungj daeuj haifwz lo.”

“Aiq naeuz Bosoem miz meuzgim dwg Yahgimq naeuz nw?”

“Haengjdingh dwg de naeuz.”

“Lij yaeuh vunzlai naeuz rin Bosoem dwg gij haexnyouh meuzgim bienqbaenz dem. Hawj baenzlai vunz bae ranzdaiq de cawx oengq cawx gang oemq rin, canh ndaej geijlai ngaenz bae?”

“Deng lo, gyoengqde canh ndaej bit cienz hung le dauqbae ranzcoj le.”

“Danghnaeuz gyoengqde mbouj dauqbae, dou aeu gyaep gyoengqde biq ngaenz okdaeuj cij baenz.”

“Namh dwg namh dou, deng songde dawz bae ndaem faex vat guh daemzbya gai aeu ngaenz. Dou caen dwg vunzbamz, deng vunz gai, lij bang vunz geq cienz dem.”

“Mbouj gyaep gyoengqde deuz, mbwn hix mbouj yungz bw!”

Vunzmbanj boux gangj maz cungj miz. Vunzmbanj hix gaemh coenz vah ndeu——“Bosoem caeuq aen daemz- bya dwg diegnamh vunzlai, aeu gvi dauq ndaw mbanj.”（caengz sat）