Bi daengz sam nyied sam, gyoengqvunz mbouj yungh iu, youh bae Runghdaihsam baiq Daegraez- goeng.

Cienzgangj, Daegraezgoeng dwg boux Lwggyax ndeu. Yienzlaiz, de mbouj heuhguh aen coh neix, gaxgonq bohmeh de dai le, mbouj miz vunz hawj de an coh, gyoengqvunz couh heuh de guh “Lwggyax”. Lwggyax ndaej 6 bi le couh bae ranz boux caizcawj guhhong. Boux caizcawj gig simdoeg, ciengzseiz mbouj hawj de gwn imq mbouj hawj de daenj raeuj, cungj saedceij neix Lwggyax itcig gvaq daengz bonjfaenh ndaej 16 bi.

Miz ngoenz ndeu, Lwggyax langh cibgeij duz vaiz caizcawj haeuj ndaw Runghdaihsam bae. Ngoenzhaenx, daj banhaet daengz banhaemh, youh doek fwn youh byajraez. Mbwn laep le, hix mbouj raen Lwggyax gyaep gyoengqvaiz maranz. Ngoenz daih- ngeih, boux caizcawj baij vunz bae ra. Ra le sam hwnz sam ngoenz cungj ra mbouj raen gyoengqvaiz caeuq Lwg- gyax. Gyoengqvunz cungj nyinhnaeuz Lwggyax dai lo.

Boux doengzdoih Lwggyax ndeu siengsim raixcaix, couh naengh youq gwnz rin daejnganga naeuz:“Lwggyax ha, mwngz youq gyawz ha? Mwngz okdaeuj vaiqdi……” De doq daej doq uet raemxda. Sawqmwh, de yawjraen miz diuz roen iq moqyupyup ndeu daj dinbya ngutngut ngeujngeuj hwnj gwnz bya bae. De roxnyinh gig geizheih, hix mbouj lau dwgrengz, doq riengz diuz roen iq neix buetrobrob coh gizsang gwnz bya bae.

Daengz byongh bya le, de yawjraen Lwggyax dai ninz youq henz ndaek rin hung ndeu, de raemxda doeksedsed lo. De buet daengz ndaw mbanj hemq gyoengqvunz bae ram Lwggyax dauq. Hoeng, mwh gyoengq- vunz bae daengz seiz, aen goet Lwggyax mbouj raen lo, cix miz aen muh moq ndeu youq gizhaenx. Geu buh vaih Lwggyax coq youq gwnz muh moq. De couh bae ra gaiq rin bingz ndeu cuengq youq aen muh moq baihnaj, dangguh beimoh.

Miz boux vunzmbanj he naeuz:“Lwggyax seiq vunz neix mbouj miz aen coh ndeu, de dai ngoenzde gwnzmbwn cungj byajraez, couh heuh de guh Daegraezgoeng ba.” Gangj sat le, gyoengqvunz couh youq gaiq rin bingz gwnzde aeu mid gaek “Aen Moq Daegraezgoeng”.

Doeklaeng, moix daengz ngoenz- ciet, boux doengzdoih Daegraezgoeng cungj dawz di nohmou caeuq laeuj bae baiq Daegraezgoeng. Mbouj rox vihmaz, daj seizhaenx hwnj, gij saed- ceij de gvaq ndaej yied daeuj yied ndei. Dingqnaeuz de youq aen moh Daegraezgoeng baihnaj gouz maz, gvaqlaeng cungj ndaej. Gyoengqvunz rox le, baez daengz ngoenzciet hix cungj bae baiq Daegraezgoeng, gouz vunz ndawranz ndaej bingzan swnh- leih.

Seizneix, moix bi ndwencieng gyoengqvunz cungj youq ngoenzndei bae baiq Daegraezgoeng. Danghnaeuz aen ranz miz daegmbauq aeu bawx, bohmeh cungj bae baiq Daegraez- goeng, gouz aeu ndaej boux bawx ndei. Danghnaeuz aen ranz Lwgnyez yaek gaujsi, bohmeh hix bae baiq Daeg- raezgoeng, baujyouh gauj ndaej ndei.

Daxmeh gou ciengzseiz gangj:“Gaxgonq mwngz cunghgauj, gou caeuq boh mwngz bae baiq Daeg- raezgoeng, mwngz cij gauj ndaej hwnj bw!” Daxmeh gou baez yienghneix gangj, gou cungj mbouj buek de, riuriu ndwi. Danghnaeuz gou mbouj yungh- rengz doegsaw, gouz fukheiq gouz caijsoq ndwi miz maz yungh ne?

Seizneix bae baiq Daegraezgoeng gaenq baenz aen fungsug dieg dou lo.