Binaengz ndwenloeg ndwencaet, Vujsenh ranzranz cungj aeu guh geij biengx soemjndwqnding ce dwk ngoenzlaeng gwn. Ciengzseiz dingq gij vunz Vujsenh youq diegrog haenx naeuz, gyaez gij soemjndwqnding ndawranz raixcaix. Cungj ndaej- geiq byailinx neix, daiq miz gij cingzngeih gij vunz youq diegrog, bienqbaenz gij gyaezranz ndujdaeuz gyoengqvunz.

Soemjndwqnding, couhdwg aeu ndwqnding ma iep hing、lauxbaeg、lwgmanh、duhnoh、lwgbieng、duhyangj、gyaeujsuenq、gyaeujgiux daengj, mwh oemq ndaw biengx aeu loq hwngq gvaq ndawranz di ndeu. Gij dinfwngz aeu ndwqnding iep soemj youq ranghdieg baihbaek Dahgenzgyangh raen haemq lai, lumj Doengyieng、Samleix、Vangzmauz、Ngeihdangz doengh dieg neix. Doenghgij dieg neix youq baihnamz Byadayauz, dienheiq caeuq diegwnq mbouj doengz, aeu gij haeuxciemyouz ndei diegde ndaem haenx ma oemq ndwqnding, gijde engq hoengzmaeq、homfwt. Aeu ma iep soemj cungj feih ndei gvaq gij wnq. Saek nding soemjndwqnding daj gizlawz daeuj ne? Neix couh mbouj ndaej mbouj dwen daengz “cehndwqnding” lo. Cienznaeuz, vunzmbanj Ngeihdangz Cin Mbanjgvanghsanh aeu geij cungj ywdoj caeuq haeuxseuq itheij oemq, ndaej oemq ok ndwqnding daeuj. Hoeng gij ywdoj ndaw dan yied hwnj yied noix, doeklaeng engqlij raeg liux. Yaek baenzlawz guh ne? Doeklaeng vunzmbanj ngeix daengz gij ndwqnding bonjfaenh couh daiq miz cehraet, gyoengqde couh dawz ndwqnding langh hawq le ce guh cehndwqnding mbatlaeng yungh. Cehndwqnding couh yienghneix ciuh cienz ciuh.

Yaek guh soemjndwqnding aeu guh ndwqnding gonq. Naengj gu haeuxseuq ndeu, naengj ndaej langh caep le, couh gya di cehndwqnding、meiq caeuq laeujhaeux roengzbae. Gyaux yinz le caiq aeu baengzfaiq goemq gvaq baihgwnz, hawj ndawde haemq raeuj, guh ndei le couh cuengq youq ndaw rug oemqfat. Doeklaeng lij aeu swiq sam baez、langh sam baez、oemq sam baez cij ndaej. Neix aiq aeu guh baenz 3 ngoenz cij baenz ndwqnding. Cawzok dawz di ndwqnding bae dak hawq louz guh cehndwqnding, gizyawz cungj aeu bae guh soemj liux. Iep soemjndwqnding aeu swiq cingh gij byaek, caiq dak daengz caet bet cingz hawq gonq. Dub gij suenq、lwgmanh daengj soiq le raix haeuj ndwqnding bae gyaux, yaek cuengq geijlai cix youz swhgeij haengj. Aen biengx soemj swiq cingh langh hawq, ciuq gij gonqlaeng caengz ndwqnding、caengz byaek、caengz gyu coux aen biengx soemj rim bae. Aeu daegbied siujsim, biengx soemj mbouj ndaej uq youz, mboujnex ndawde couh hwnjmwt lo. Iep ndaej saek cib ngoenz buenq ndwen, soemjndwqnding couh iep baenz lo. Ndawde, hinglwgfwngz caeuq lwgmanh iq aeu ma iep soemj ceiq feih lo.

Yab yawj, baihgwnz soemj miz caengz giengh nding ndeu, gwn haeuj bak feihdauh soemj、manh、van、hamz、byot cungj miz caez, sangjbak dangqmaz. Soemjndwqnding aeu ma soengq haeuxcuk ceiq baenz. Mbangjbaez gwn laeuj lai le, nip dawh soemj ndeu gwn, heiqlaeuj doq siu liux. Gyoengqvunz caemh ciengzciengz aeu ndwqnding (raemx ndwq- nding) ma cauj byaek. “Doengyieng Samleix gwn haeuxbieg, Vangzmauz Ngeihdangz beng saejmoz”, coenz vah doeklaeng couhdwg gangj “ndwqnding cauj saejlaux” cungj byaek ndeigwn neix lo. Vunz Vujsenh nyinhnaeuz, mwh guh laeuj aeu ndwqnding cauj saejlaux、ndwqnding gug bya roxnaeuz ndwqnding cauj dungxmou ma daihhek ceiq ndei lo.

Luz Gingcinh dwg vunz Ngeihdangz. De dwg ndawranz daih daihsam bouxciepcienz dinfwngz iep soemjndwqnding, de ciep diuzrap neix gaenq miz cibgeij bi lo. Aenvih dinfwngz de ndei, vunzmbanj seiqhenz caeuq vunzlai Gveibingz、Siengcouh daengj dieg cungj gag daeuj aen dieggoek iep soemj de ngonzyawj caeuq hagsib guh soemj. Gaxgonq Vujsenh cungj dwg diengzhong gak ranz gwnzbiengz gag guh soemjndwqnding bae gai, seizneix gaenq hwngfat baenz diuz lienhcanjnieb iepguh caeuq gaicawx. Soemjndwqnding Vujsenh caemh ndaej byaij haeuj hawciengz daengx guek gak dieg, ndaej rengzrwd coicaenh gij hwngfat ginghci dangdieg.