Seizneix youq gwnz gai, deih mbouj deih couh nyangz canghrih rag aen ciqsamloek, ndij luengqgai hemq gai maenzgangq. Moix baez mup raen heiqhom maenzgangq, gou cungj linx iemq myaizsaw, cawx saek aen ma cimz gaij hozngah. Gij heiq maenz- gangq neix, gou daj lwgnyez couh mup gvenq lo, gaenq deu youq byailinx laeglemlem, geijcib bi gvaqbae cungj mbouj rox lumz.

Yaepyet, aen lwgmaenz buenq gaen naek neix couh ruq roengz dungx bae. Gou cingznyinh, gij maenzgangq neix ndeigwn raixcaix. Hoeng gou dauq roxnyinh ndawde noix cungj feihdauh ndeu, caeuq gij lwgmaenz seiziq gou gwn haenx mbouj dox- doengz.

Mwh lwgnyez gou, ceng mbouj geijlai dwg aeu lwgmaenz guh donq gvaq saedceij. Doengh bi haenx, swnghcanjdui ndaem haeux mbouj gaeuq gwn, couh ndaem haeuxyangz、lwgmaenz、 maenzfaex doenghgo neix ma dang haeux gwn. Daegbied dwg lwgmaenz, ndaem ceiq lai. Aenvih gomaenz yungzheih did, mbaw hoengh aen duengh, gaeumaenz raezrangrang. Mbawmaenz ndaej ciengx vunz,gaeumaenz ndaej ciengx mou. Ndigah, cawz swnghcanjdui ndaem miz, ranzranz hix youq gaiq swliuzdi gag ndaem. Lwgmaenz gwn lai couh nywnx, gyoengqvunz couh naemj ok gij gwnfap lai cungj lai yiengh.

Lwgmaenz ndaej gwn ndip, hix ndaej gwn cug. Cawj cug miz dan cawj caeuq doxgyaux cawj song cungj. Dan cawj miz dumq maenz、cawj maenz caeuq saz maenz daengj. Doxgyaux cawj miz haeuxmaenzcuk、haeux- maenzseuq caeuq haeuxmaenz- faengx.

Dumq lwgmaenz ceiq yungzheih. Dawz lwgmaenz raix roengz gu raemx bae, aeu feizfoengx coemh buenq diemj cung couh cug. Lwgmaenz cawj raemxdang, sien ronq lwgmaenz baenz gaiq, caiq caeuq raemxcaep gyonj raix roengz rek, feizfoengx cawj cib lai faen cung couh daek haeuj aenvanj daeuj, dangguh byaek soengq haeux.

Saz lwgmaenz seiz, itbuen cungj dwg swnh cawj haeux cawj byaek, dawz lwgmaenz moek haeuj ndaw danqndongq roxnaeuz daeuh ndat bae, caj haeux cug byaek cug le, caiq oemq buenq diemj cung, lwgmaenz couh saz ndaej mbongmbubmbub. Baez mbiq naeng, baenz fungh ranz cungj rang- fwdfwd.

Lwgmaenz caeuq haeux dox- gyaux, cawj baenz haeuxmaenzseuq caeuq haeuxmaenzcuk. Seiz miz haeux lai couh cawj haeuxmaenzseuq; seiz haeux noix mbouj gaeuq gwn, couh cawj haeuxmaenzcuk. Haeuxmaenz yienznaeuz mbouj lumj haeuxam baenz gwn, hoeng lwgmaenz diemz, feihdauh hix mbouj ca.

Gou ceiq haengj gwn haeux- maenzfaengx. Youh diemz youh niu, daegbied dwg cuengq caep menh gwn, engq diemz. Hoeng gwn lai miz di aeksoemj. Caeklaiq hix mbouj miz lai, bi daengz byai, cij youq ndwencieng ndaej suek faengx.

Ceiq hawj gou hojlumz dwg lwgmaenzoenq. Maenzoenq feihdauh caeuq maenzgangq doxlumj. Neix couhdwg gij yienzaen gou raen maenzgangq cungj myaiz rihnengneng lo.

Youq rogndoi oenq yiuz, itbuen dwg seiznit oenq. Aenvih seiznit mbwnrengx, ndaw naz ndaw reih hawqyauyau, ra namh ra liu yungz- heih. Seizneix hix cingq dwg seiz hagseng cuengqgyaj, lwgnyez guh mbouj ndaej hongnaek, couh bang vunzlaux langh vaiz. Banringzgvaq, duzvaiz gwn nywj imq le, ndwn youq henz reih lauxlaux saedsaed henx nywj. Geij boux nyezdoih dou couh doxcomz itheij oenq yiuzmaenz.

Oenq yiuzmaenz, sien yaek miz lwgmaenz. Bae gizlawz aeu? Gwnz- biengz mbouj saehhoj, caenh’aeu rox bae guh. Cingqhab, seizdoeng reihnaz ngamq dajsou liux, ndaw reih ciengzseiz miz maenz lauq. Naeuz ra couh ra. Dou 4 boux lwgnyez faen nga bae cimh, boux bae boux gaiq reih.

Cibgeij faen cung gvaqbae lo, aen ngaeuzmaenz cungj caengz raen. Gou liuqda gyoengqdoih, caeuq gou dox- doengz, cungj dwg song fwngz hoengqvatvat. “Ndoq lumj hangx gaeqmeh, mbouj raen saek aen.” Daegnim naj saepsatsat muengh gou naeuz. Daeggam Daegdoeng hix hemqyatyat naeuz “hoj ra”. “Lainoix cungj miz, vet laeg di couh raen lo.” Gou hemq coenz he, youh ngaem- gyaeuj vet namh. Gizsaed, gou hix mbouj rox vet ndaej mbouj ndaej. Youh gvaq buenq diemj cung, gyoengqdoih ngiengxnaj doxcam:“Vet ndaej lwi?” Gou lau gyoengqdoih doeknaiq, cengqnaj riu naeuz:“Yaek ndaej lo, haenqrengz yaephe.” Gyoengqdoih youh gumx hwet cimhra. Mbouj geijlai nanz, Daegnim youh swenjdai:“Suenq lo, mbouj oenq lo.” Gou yawjyawj fajfwngz uqatat swhgeij, youh muenghmuengh seiqhenz, hix miz di doeknaiq lo. “Ndaej lo! Ndaej lo!” Sawqmwh, Daegdoeng angq hemq yatyat. “Caen miz ya.” Caezgya doq cingsaenz gvaekgvaek, ngaem- gyaeuj youh bae vet namh.

Dang caezgya ndaw rungj umj geij aen lwgmaenz ma doxcomz seiz, gaenq hanh rih hanh roenx, ajngaeb fofo. Dawz lwgmaenz raixrag couh daengjhai gwnznamh. “Caengz ndaej yiet bw, lij bae ra liu.” Gou byaij bae song yamq youh ngenggyaeuj naeuz.

Gij hong ra liu, mbouj hoj hix hoj. Naeuz mbouj hoj, seizdoeng seiqlengq haz reuq faex roz, bae nyaeb couh ndaej. Naeuz hoj, oenq yiuz yaek aeu coemh feizdanq, nyaeb diuzco cij ndaej coemh baenz danq. Geij boux nyezdoih banh bae haujlai gyaez, cij nyaeb ndaej bog liu iq ndeu. Caj gwed bog liu dauq daengz henz yiuz, gaenq naiq ndaej din unq ndang saenz.

Lwgmaenz vet ma lo, liu hix ra ndaej lo, hainduj doengh fwngz caep yiuz. Dou sien vat aen gumzluenz ndeu, daihgaiq miz cik lai laeg, song angjfwngz gvangq. Mbiengj he louz congh bakyiuz. Yienzhaeuh humx baihgwnz aengumz, aeu namhndaek doxdab hwnjdaeuj, caep baenz aen gvaengx ndeu. Caep daengz cik lai sang couh ndaej. Doeklaeng aeu ngauq namhraez ndeu fung red dingjyiuz, aen yiuzmaenz couh suenq caep baenz. Lwnh guh gig yungzheih, baez doengh fwngz cix dwgrengz dangqmaz. Aenvih namhndaek gaiq hung gaiq iq, gaiq luenz gaiq bej. Dab caengz daih’it yungzheih, caengz daihngeih cengqgengz dab onj, caengz daihsam couh miz di mbitbieng lo. Siujsim riri caep daengz caengz satbyai, ngamq fwngz mbaeu- mbengmbeng cuengq ndaek namhraez fung dingj, sawqmwh byabyo, aenyiuz yaepyet loemqlak baenz namhsoiq. Fouznaih, cij ndaej daj daeuz dauq caep. Lienzriengh caeb sam baez, lij caengz caep baenz. Gyoengqdoih miz di mbouj naihfanz lo. Gou cengqhai najriu naeuz:“Yietnaiq yaephe, naemj ndei menh caep.” Caezgya mwngz coenz gou coenz ok cawjeiq. Doek- laeng, raeuz dawz gij namhndaek haenx ciuq hung iq genj ndei, moix caep ndaej caengz he, youh aeu namhsoiq demh bingz, yienghneix, caiq caep caengz baihgwnz couh onjdubdub lo. Yawjraen aen yiuz raeuz sinhoj dwgrengz guh baenz haenx, gyoengqdoih najriu lumj dujva.

Hainduj oenq yiuz. Sien caux feiz, coemh foengx le, dawz liu oet haeuj bakyiuz bae, caiq diuz swnj diuz demgya. Itcig coemh daengz gumzyiuz feizdanq ndongqyauyau, namhyiuz fatndat hausubsub, cij ndek lwgmaenz haeuj gumzyiuz bae, caiq coemh yaephe, caj lwgmaenz saz baenz hamxhawz le, couh ndaej fung yiuz lo.

“Fung yiuz lo!” Gyoengqdoih doq hemq doq humx gvaqdaeuj, mwngz dik gou daemh. Yaepyet, yiuzmaenz couh loemq bingzbwd. Youq baihgwnz caiq bu caengz namhsoiq ndeu, caij net, fung red, mbouj hawj fwindat laeuh okdaeuj, caih lwgmaenz oemq youq laj namh ndat, menhmenh gangq biq.

Deq ninz yungzheih deq gwn hoj. Raeuz naengh youq henz yiuz, cehda cim yiuzmaenz, ndaw bak ndwnj raemxmyaiz. “Ndaej caengz?” Laeq saejswg Daegnim mbouj rox cam geijlai baez lo. “Deq yaephe, cug biq cij feih.” Gou nai de naeuz. Gizsaed, aen dungx gou hix lumj byajraez nei rongxruru.

Gig mbouj yungzheih deq gvaq aen cungdaeuz ndeu, gou baez naeuz “vet yiuz”, Daegnim doq riengjret doengh fwngz. Goq mbouj ndaej namhyiuz ndatndadndad, geij faj fwngz iq doxcanj mo haeuj yiuzmaenz bae, youh bauz youh bwed. Yaepyet, dong lwgmaenz bongzbodbod caemh- caiq mongmumu he couh lohgengz okdaeuj. “Ndat! Yu! Ndat!” Daegnim doq vax doq hemq, aen lwgmaenz youq song angjfwngz de saeuh bae saeuh dauq lumj duznou saetdiuq.

Lwgmaenz gaem youq ndaw fwngz, ndatndumndum, unqnemnem. Baez mbiq caengz naengremj, heiq- maenz homfwdfwd con haeuj ndaeng daeuj, gou aj bak doq soeggwn. Caen feih, mbambubmbub, diemzsubsub. Daengz seizneix, gij feihdauh haenx lij louz youq ndaw bak gou, gvaiq mbouj ndaej, baeznaengz yawjraen maenz- gangq gwnz gai, gou cungj hoz humzyedyed.

Ngeix daengz gizneix, gou sawq- mwh roxyiuj, gij maenzgangq gwnz gai haenx, couhdwg noix cungj feihdauh yinxdaeuz lwgnyez. Gij lwgmaenz oenqyiuz neix, ndawde miz gij vaiqlag lwgnyez, miz gij goengrengz caeuq gij coengmingz swhgeij.