Youq Duh’anh Yauzcuz Swciyen mbangj yanghcin ndawde, miz cungj fungsug cienzdoengj “mbokfaexcuk Ndoetlaeuj Dwklwggyongj” ndeu riuzcienz mbouj byaiz, gyoengq mbauqsau dangdieg youq seizhoengq doxcomz youq giz ndeu, aeu mbokfaexcuk guh huz guh cenj, baijyienj ok gij angqyangz langhcuengq bouxcoz Bunujyauz, dawz ndoetlaeuj caimax caeuq guhhong ngoenznaengz giethab hwnjdaeuj, aeu gij vahgangj ndangdaej lai cungj lai yiengh、yienghdoengh daengxndang、fuengsik biujyienj loenghriu haenx, lumjlili dwk baijyienj gij ciengzmienh angqhoh “dwklwggyongj” “ndoet laeuj fiz, da ndi’nduq muengh mbwn, laeuj sinz dwk buhvaq dumz” vunz Yauzcuz haenx.

Vunz Bunujyauz Duh’anh dingzlai dwg youq ndaw luegbya, bya sang lueg laeg roen mbouj doeng nem gij vahbonjdeih mbouj doengz haenx, hawj gij fungsug “dwklwggyongj” youq mwh riuzcienz ndawde bienqbaenz mwngz yiengh gou gaiq, mbouj miz aen “hoenz” caezcienz baenzdauq ndeu. Bi 2008 ndwen 2, Cinz Cwngdangz boux dang Duh’anh Vwnzgunghdonz donzcangj、vwnzvagiz fugizcangj gvaq neix, ma daengz mbanjranz Yaau Cin Mbanjdavang, gag ok ngaenz laebbaenz le aen dieggoek hawj vunz- mbanj hag、maeq、cienz minzcuz vwnzva cienzdoengj ndeu——Suenmbanj, doenghfwngz cimhra cingjleix “dwklwggyongj” fungsug cienz- doengj. Doengzseiz laebbanh le aen yisuzdonz vunzguhnaz ndeu, daiq gyoengq bouxyienj youq ndaw Suenmbanj baizlienh yienjok. De aeu Suenmbanj guh daizheiq, itmienh cimhra cingjleix, itmienh baizlienh yienjok, caemhcaiq mboujduenh bae boujcung caezcienz, hawj diuqfoux minzcuz cienzdoengj “mbokfaexcuk ndoetlaeuj dwklwggyongj” ciemh baenz yiengh. Doeklaeng de youh dauqcawq bae cazyawj gij swhliu doxgven haenx, caemhcaiq caeuq gij canghheiq laux wnq doxcaez mumaeq、doxyaeng、doq yienj doq gaij, caiq doiq gij vunzmbanj camgya biujyienj haenx guh ndei sonlienh, hawj “mbokfaexcuk ndoetlaeuj dwklwggyongj” yisuz cizlieng ndaej daezswng, neiyungz caemh demgya ndaej ndei, yienj hwnjdaeuj gig ndeiyawj yinx- vunz. Ginggvaq haj bi roengzrengz bae guh, bi 2013 ndwen 12, diuqfoux minzcuz biujyienj “mbokfaexcuk ndoetlaeuj dwklwggyongj” youz Cinz Cwngdangz cimhra cingjleix haenx ndaej yamq hwnj gwnz daizheiq Hozciz Si Daih Cibseiq Gaiq Ciet Yisuz Fwen Nyenz Feihvuzciz Vwnzva Yizcanj baijyienj bae, de caemh baengh neix ndaej soengqhawj aen “ciengj cimhra cingjleix”. Yienznaeuz Cinz Cwngdangz goenglaux gaenq gvaqseiq, hoeng aen diuqfoux minzcuz biujyienj “mbokfaexcuk ndoetlaeuj dwklwggyongj” de cimhra cingjleix neix louz roengz caizfouq vwnzva gig dijbauj.

Seizneix, aen diuqfoux minzcuz biujyienj “mbokfaexcuk ndoetlaeuj dwklwggyongj” yiengh foux ndeiyawj、loenghriu yinxvunz neix, aeu gij hingzsik diuqfoux fungsug minzcuz cienzdoengj, ndaej deihdeih bin hwnj gwnz daizheiq minzcuz vwnzyi comzyienj、feihyiz vwnzva baijyienj roxnaeuz minzcuz cienzdoengj cietgingq yienh- ciengz doenghgij vwnzva hozdung hunghoengh haenx bae, cugciemh baenz Duh’anh Bunujyauz fungsug minzcuz vwnzva cienzdoengj ndawde aen neiyungz youqgaenj noix mbouj ndaej ndeu, baenz le gaiq “baizgim” cienzboq Bunujyauz vwnzva ndeu.