Seizgan: Doengxngoenz

Diegdeih: Gwnz gai

Boux ndawheiq: Doengj nyapnyaj daih’it, doengj nyapnyaj daihngeih, doengj nyapnyaj daihsam, doengj nyapnyaj daihseiq, genjcwng Doengj it、Doengj ngeih、Doengj sam、Doengj seiq; song boux siujhagseng, baihlaj heuhguh Nyez it、Nyez ngeih.

Hai muq: (4 aen doengj nyap- nyaj baizlied.)

Doengj it:

Mbangjseiz mbwn ok ndit,

Mbangjseiz nit youh fwn,

Ngoenzngoenz youq neix ndwn,

Miz vunz yiemz dou uq.

Doengj ngeih:

Diegrum nywj heuwt,

Va hoengzhwd baenz gyaeu,

Miz vunz yiemz dou haeu,

Cungj naeuz gaz da’naj.

Doengj sam:

Gwn heiq ndi vunz rox,

Nyapnyuk coq baihndaw.

Doengj seiq:

Gaej cam dou dwg byawz,

Aen doengj dawz nyapnyaj.

(Nyez it Nyez ngeih gak riuj geij daeh nyapnyaj hwnj)

Doengj it: Ei!

Song lwgnyez byaij daeuj,

Dwg mbouj dwg lwg gvai,

Ceiq lau boux euq lai,

Naeuz dai cix mbouj dingq.

Nyez it:

Raeuz dwg vunz Namzningz,

Caux vwnzmingz ranzmbanj.

Nyez ngeih:

Yawj vunz cien vunz fanh,

Doxcanj guh vunz gvai.

Nyez it:

Diegdeih raeuz baet seuq,

Nyapnyaj beuj deuz caez,

Gij fouzyungh caeb ndei,

Dawz bae gveng roengz doengj.

Nyez ngeih: (Vit nyapnyaj hawj Doengj seiq, deng Doengj seiq gveng okdaeuj) Baenzlawz okdaeuj ni?

Nyez it: (Vit nyapnyaj hawj Doengj ngeih, deng Doengj ngeih gveng okdaeuj) Geizheih lo? Gij gou baenzlawz hix okdaeuj ni?

Nyez ngeih: Coq lingh aen (vit nyapnyaj hawj Doengj sam, youh deng gveng okdaeuj).

Nyez it: Hei, raeuz dwk roengz aen neix.

Nyez it Nyez ngeih: (Caez gip aeu nyapnyaj vit hawj Doengj it) Ei! Lij dwg doeng neix baenz, dwk roengzbae couh mbouj okdaeuj lo.

Doengj it: Byawz gangj? (De gveng nyapnyaj okdaeuj) Daihgya cungj okdaeuj!

Doengj ngeih、 Doengj sam caeuq Doengj seiq: Ndei!

Nyez it Nyez ngeih: Sou, sou dwg byawz?

Doengj it Doengj ngeih Doengj- sam caeuq Doengj seiq: Dou dwg geij beixnuengx doengj nyapnyaj!

Doengj ngeih:

Gaiq feiq ndaej baenz bauj,

Sou doxdauq ce ndei,

Gaej yienghyiengh vit bae,

Saek seiz lij miz yungh.

Doengj sam:

Gou rox heiq rox you,

Cien sou gij mizhaih,

Vanzbauj saeh hungdaih,

Gaiqhaih aeu ce ndei.

Doengj it:

Gou sou haeux byaek saeu,

Nyaenx haeundad haeugengx,

Gaej daujdak seiqlengq,

Bauj seuqcengh dieg raeuz.

Doengj seiq:

Aeu mbouj caez mbouj caenh,

Gij wnq dawz hawj gou,

Nyapnyaj mbouj ndaej louz,

Cungj sou caez sou doh.

Nyez ngeih: Laxlawz dwg seiq aen doengj nyapnyaj!

Nyez it: Gou lij laihnaeuz dwg maz fangzgvaiq ne?

Doengj seiq:

Dou yienghyiengh cungj aeu,

Dienhyouz gaeuq guenq vaih,

Gij miz ik miz haih,

Gaiqgaiq cungj aeu bae.

(Nyez it Nyez ngeih): Hw, gangj ndaej caen ndeidingq!

Doengj seiq: Mbouj dwg gangj ndwi bw, dou caen maz cungj sou.

Nyez it Nyez ngeih: Yienghneix vihmaz mbouj aeu gij dou?

Doengj seiq:

Sou mbouj guh ndaej deng,

Miz rengz cix guh loek,

Nyapnyaj gyonj caemh boek,

Caux huxgoek hawj biengz.

Doengj it、Doengj ngeih caeuq Doengj sam: Sou gijneix mbouj faen- loih, doiqdauq!

Nyez ngeih: Nyapnyaj faenloih?

Doengj it、Doengj ngeih、Doengj sam caeuq Doengj seiq: Neix sou couh mbouj rox lo, hawj dou daeuj naeuz sou nyi ba!

Doengj seiq: (vix Doengj ngeih)Neix dwg “dahnuengx cien sou gij miz yungh”, geij beixnuengx dou couh de ceiq seuq, ceiq cengh.

Doengj ngeih:

Nyapnyaj dwg baen loih,

Doihdou guh bajgvan,

Raeuz mbouj lau mazfanz,

Ndei lwglan lwglaenj.

Doengj sam: Gou cienmonz sou gij nyapnyaj mizhaih.

Nyez ngeih: Gij lawz dwg nyap- nyaj mizhaih ha?

Doengj sam:

Mbouj lujluj lajlaj,

Nyapnyaj aeu guenj ndei,

Yw nungzyoz gvaq geiz,

Mbouj ndaej bae luenh vit.

Yungh gvaq gij dienhyouz,

Aeu sou bae cien guenj,

Daengbauq nem daengguenj,

Mbouj luenh vit luenh gveng.

Doengj it:

Bouxboux gangj vanzvei,

Ranzranz ndaej vuenyungz,

Vanzvei dwg saehhung,

Hen ndwenngoenz cenghseuq.

Nyez it: (Cam Doengj it) Mwngz sou gijgwn lw?

Doengj it: W, deng!

Naengmak naenggva naeuh,

Haeux lw nem byaek lw,

Caezgya aeu haeujrwz,

Yaek cw ndei goeb maenh.

Guh cenghseuq gunghcwngz,

Caez doengh fwngz cij ndaej,

Gemj uqlah daihdeih,

Ndaej gemj noix nengznyaen.

Nyez it: Dingz dingz dingz!

Gangj dwk rwz cungj dumz,

Caen nyex vunz hozgaek,

Di naengmak mbawbyaek,

Lij yaek raemh nyaenx lai.

Doengj it: Dangyienz la,

Biengz uq vunz gwn vei,

Cwngfuj miz vahdaengq,

Gyuekuq byawz cix haengj,

Cenghseuq baengh daihgya.

Doengj ngeih Doengj sam Doengj seiq: Deng!

Nyapnyaj guh faenloih,

Ndaej gemjnoix gyuek biengz,

Cenghseuq lumj diegsien,

Leih vunz cien vunz fanh.

Nyez it Nyez ngeih: Hw!

Nyapnyaj luenh youh haeu,

Lij aeu guh baenzneix,

Lumj ep meuz gwn meiq,

Mbouj yungzheih guh daengz.

(Dauq gip daeh nyapnyaj ndenq hawj 4 aen doengjnyapnyaj yawj.)

Doengj it、Doengj ngeih、Doengj sam caeuq Doengj seiq: Luenh lai lo.

Doengj ngeih: Gij ceij neix gou aeu,

Doengj sam: Dienhyouz neix gou ciep,

Doengj it:

Maknaeuh neix gou lieb,

Caiq geij dip naenggve.

Doengj seiq: Gij lw roengzdaeuj couhdwg hawj gou lo.

Nyez it Nyez ngeih: Aeya! Gyo- mbaiq sou lai lo!

Nyapnyaj faenloih ndei,

Daihgya gyaez vanzbauj,

Nyapnyaj gaej gyonj dauj,

Hab lai gauj senhconz.

Doengj it、Doengj ngeih、Doengj sam caeuq Doengj seiq: Deng lo!

Doengj it:

Vunz sou lai haeujsim,

Senglingz cungj doxbaengh,

Vanzbauj ceiq youqgaenj,

Deng hen maenh hen ndei.

Doengj ngeih:

Nyapnyaj luenh vit uq,

Huxhaih hawj gyoengqvunz,

Doengj sam:

Faenloih dwg saehhung,

Gaej guh lumz guh lauq.

Doengj seiq:

Digiuz ciemh bienq raeuj,

Fangzgvaiq daeuj hengzmanz,

Bik cien gya fanh ranz,

Lwglan bae gyawz ndoj.

Nyez it:

Vunz dou caez roengzrengz,

Hen raemx hen hoengheiq.

Nyez ngeih:

Nyapnyaj aeu cingjceih,

Faenloih leih lwgminz.

Doengj it、Doengj ngeih、Doengj sam caeuq Doengj seiq:

Guh faenloih nyapnyaj,

Daxbaj nem daxliuz,

Caez daeuj ganj cauzliuz,

Angq riu coux ngoenzmoq.