Ndaw gvaengzveh、gwnz ciengz、gwnz ndoengj、gwnz aencaengq…… Youq ndaw dieggoek swnjcienz Vehdung Sanhgyangh Dungcuz Swciyen Duzdung Cin Duzdung Cunh, venj rem、baij deihdaenz gij mbawveh vunzguhnaz Sanhgyangh gaenq veh sat roxnaeuz caengz veh ndaej haenx.

Mbawveh vunzguhnaz Sanhgyangh, dieggoek swnjcienz dajveh cawjdaeuz comz youq Sanhgyangh Duzdung Cin, ranghdieg swnjcienz nangq daengz Dungzloz、Bazgyangh、Gujyiz、Doujgyangh、Liengz- gouj、Meizlinz daengj yanghcin. Gij veh neix lizsij gyaenanz, seiz Dangzciuz couh caep maenh giekdaej, Cingciuz “Vehbaengzdung” ranghdieg Bouxdung Sanhgyangh gaenq riuzmingz gwnzbiengz. Mbawveh vunzguhnaz Sanhgyangh youq dangdieg aeu caizliuh, gaxgonq dwg aeu mijrek、 goromj caiqlij gij lwgmak gwnz bya guh liuhsaek, aeu nyefaex guh bitveh, gvaqlaeng liuhsaek swnggaep baenz mbaraemx、bingjhih daengj. Mbawveh mboujdan veh youq gwnz ceij、ciengz、baengz, lij veh nyumx hwnj gwnz ndangdaenj、daehbeq、saihwet、daehngaenz、gaenfwngz Bouxdung daengj doenghyiengh ngoenznaengz yungh haenx bae. Aeu laeuzgyong guh gyangsim, bau daengz giuzbumz、laeuzheiq、ranzcanx daengj vwnzva yienhsiengq aenranz、minzsug fungcingz、sibgvenq gvaq ndwenngoenz daengj, cungj dwg daezcaiz youqgaenq mbawveh vunzguhnaz Sanhgyangh dajveh haenx, hawj gij hingzsik caeuq neiyungz de ndaej giethab caeuq doengjit ndaej engq ndei, gyoebbaenz gij minzcuz funggek daegbied gag miz ndeu. Mbawveh vunzguhnaz Sanhgyangh gij saek de doiq- beij haenqhwd, gij heiq gvaq ndwen- ngoenz naekgywg, daezcaiz genjleh gagdingh, gyoepdoz simlangh, giuj yungh aenfap sanqdiemj daeuqrongh. Aeu coenz vah ndeu daeuj gangj de dwg: Riengz sim siengj bae genjleh daezcaiz, “hozoiq simlangh” dwk bae cawqleix najveh, “fouz dauhleix” dwk bae gyoep gij saek, cienz fuengvih lai gakdoh bae yienj diemjyawj. Lumjbaenz mbawveh《Gangjguenj》, couh lumjlili dwk yienh’ok le gij cingzgingj vunzlai ndaw mbanj comz youq diegdangz naj laeuzgyong dingq goengguenj gangj- guenj haenx.

Mbawveh vunzguhnaz Sanhgyangh gyaepgouz saemjgyaeu ciuhneix, roengzrag diegnamh minzcuz, biujyienh gij ndwen- ngoenz yienhsaed caeuq gyoengqvunz guhhong seizneix, yienj ok gij minzcuz daegsaek sienmingz, neiyungz gvaq ndwenngoenz lai cungj lai yiengh, moix mbaw veh cungj dwg cauhnduj, gig miz gij dijbauj yisuz daegbied de. Cungj veh minzsug ciuhneix comzrom guek raeuz Bouxdung ndawbiengz vwnzva maenhndei cienzdoengj neix, cingq daj ndaw luegbya byaij okdaeuj, byaij coh aen dienhding yisuz swnhndei bae, byaij haeuj ndaw lwgda gak cuz lwgminz cimyawj haenx, ciep raiz bien faenzcieng moq Cungguek minzcuz ndawbiengz meijsuz haenx.

Bi 2012, mbawveh vunzguhnaz Boux- dung Sanhgyangh ndaej lied haeuj Swcigih feihyiz henhoh mingzloeg; bi 2003, Gvangjsih Meijsuzgyah Hezvei Vwnzyi Ciyen Fuzvu Gihdi youq Duzdung venjbaiz laebbaenz.