Miz boux swhgih hai ci hung ndeu, ciengzciengz bae Yinznanz、Gveicouh rag doxgaiq, de naeuz baihde lwgsau lai, cam Lij Gozvwnz naemj mbouj naemj aeu, danghnaeuz aeu, de baezlaeng gvaqbae couh daiq geij dah daeuj hawj Lij Gozvwnz senjsenj.

Lij Gozvwnz dwg lwgmbauq baeznduj raen beixnangz——naj- nyaenq dangqmaz. Caiqgangj de baenzneix geq lo, dwg baez daih’it miz vunz hawj de dwen daengz aeu bawx, de cij dwg riuriu, mbouj naeuz aeu hix mbouj naeuz mbouj aeu.

Hai diemq le, Lij Gozvwnz ciengzciengz haeuj ndaw singz bae aeu huq, Maz lauxbanj dwg mehmbwk ndaej 40 lai bi ndeu, de ndang bizbwdbwd, saeknaj hoengzmaeq hoengzmaeq, baenzsau, ndeiyawj.

Ngoenz ndeu, Lij Gozvwnz bae aeu huq, Maz lauxbanj naeuz:“Mwngz ngoenz lawz huq gai liux, youh mbouj ndaejhoengq daeuj aeu, couh dwk dienhvah daeuj, gou heuh vunz soengq bae hawj mwngz hix ndaej.”

Maz lauxbanj baez daih’it soengq huq daeuj hawj Lij Gozvwnz, raen Lij Gozvwnz haeujhaeuj okok cungj dwg boux ndeu, cam Lij Gozvwnz naeuz:“Aeu doxgaiq mwngz gag daeuj, youq ndaw diemq hix dwg mwngz gag guh gaicawx, ndaw ranz mwngz ni?”

Lij Gozvwnz naeuz, de lij caengz miz baz, mbouj miz bouxndawranz. Maz lauxbanj naeuz:“Ndaw diemq gou miz song dah vunzhong, hix dwg ndaej 30 lai bi lo, lij caengz haq vunz, gou gangj dah he hawj mwngz, ndei mbouj ndei?” Lij Gozvwnz naj fwt nding, yaep he youh gag naemj, swhgeij hix caen baenz rara boux- cawjranz he lo.

Haj

Daxmeh miz bingh ae’ngab, noix mbouj ndaej yw, gij yw de gwn liux lo, ngoenzneix aeu bae aeu yw hawj de lo. Lij Gozvwnz gwih cimozdoz daeuj daengz ndaw haw, gvaq aen diemq doenghbaez de daeuj aeu huq haenx, Maz lauxbanj cingq nyaengq dawz huq hawj vunz. Lij Gozvwnz sijsaeq yawj haeuj ndaw diemq, naemj yawjyawj song dah vunzhong Maz lauxbanj naeuz haenx maj ndaej baenzlawz yiengh.

Dah ndeu nyumx byoemhenj, ndang reux, naj saekheu, song diuz heujdou diuz dinj diuz raez, lij miz di ndaem, baenzlawz yawj cungj mbouj suenq baenzsiengq. Dah ndeu ndang biz, vunz daemq di, naj luenz noh hau, naj haenqdikdik, yawj daeuj beizheiq aiq mbouj daiq ndei. Song dah neix, danghnaeuz swhgeij nienzgeij lij noix di, Lij Gozvwnz baenzlawz hix yawj mbouj hwnj da, seizneix nienz laux lo, rangz yaek gvaq cin, vunz yaek gvaq mboengq lo, dah lawz nyienh haq hawj de, de hix naemj sawq gyau cingzngeih gonq.

Maz lauxbanj riunyinyi, aeu lwgda vix Lij Gozvwnz yawjyawj song dah vunzhong de. Lij Gozvwnz rox eiqsei lo, hix coh Maz lauxbanj riuriu, gangj vab naeuz:“Gou mbouj gamj caeuq songde gangj vah.”

Maz lauxbanj naeuz:“Mwngz ndaek bouxsai neix, damj baenz lai iq, mwngz couh lumj caeuq gou gangj vah yienghneix bae caeuq songde dox- dongx, roxnaj roxnaj gonq, gvaqlaeng gou caiq dawz mwngz lwnh hawj songde.”

Doeklaeng, Lij Gozvwnz lij dwg mbouj gamj caeuq songde gangj vah couh byaij deuz lo.

Lij Gozvwnz aeu ndaej yw dauq daengz bakdou diemq bihfaz, sawq- mwh dingqnyi miz vunz hemq:“Lauxbanj, lauxbanj, mwngz baenz- lawz yiengh?” Lij Gozvwnz baenq laeng bae yawj, Maz lauxbanj laemx youq gyang doxgaiq ndaw diemq, Lij Gozvwnz baez daih’it ndaej raen yiengh saeh neix, mbouj rox baenzlawz guh ndei. Dah vunzhong he hemq naeuz:“Mwngz lij ndwn guh maz, vaiq daeuj bang dou soengq Maz lauxbanj bae yihyen vei.”

Lij Gozvwnz dingq le cij singj gvaqdaeuj, de aemq hwnj Maz lauxbanj couh buet bae coh yihyen, yihyen liz diemq bihfaz mbouj gyae, diemq doiqnaj buenq leix loh couh daengz, Maz lauxbanj ndang hung, goet naek, Lij Gozvwnz youh ganj ndaej gip, de baeg ndaej rauheiq fofo, daengx ndang dumz hanh.

Canghyw naeuz Maz lauxbanj mbouj miz maz bingh, couhdwg hezdangz daemq, youh caengz gwn gvaq ngaizromh cij daraiz laemx roengz, baezlaeng aeu haeujsim di cij ndaej.

Lij Gozvwnz yaek dauqbae lo, Maz lauxbanj naeuz:“Mwngz aemq gou daeuj, couh caiq fuz gou dauqbae ba.”

Lij Gozvwnz cim Maz lauxbanj da he, yousim riri fuz de dauqbae ndaw diemq.

Yienghneix baebae dauqdauq, Lij Gozvwnz lajbyonghngoenz cij dauq daengz ranz hai diemq.

Banhaemh, Lij Gozvwnz lumj doenghbaez nei hai diemq guh gaicawx, Maz lauxbanj hai aen cisamloek he daeuj daengz lo, Maz lauxbanj riu naeuz:“Gou haemhneix daeuj dwg song gienh saeh, daih’it dwg daeuj docih mwngz haetneix soengq gou bae yihyen, daihngeih dwg cam mwngz song dah vunzhong gou mwngz yawj dah lawz ngamj sim. Mwngz aeu cagaenj di, mbouj ni, vunz haq le, ngwz gvaq cij mboengj naemh couh guh mbouj gib lo.”

Lij Gozvwnz dingq le, riuhoho naeuz:“Gij saeh neix mwngz caen dang caen lo.”

Maz lauxbanj naeuz:“Dwg vei, danghnaeuz mwngz dah lawz cungj yawj mbouj hwnj da, gou couh haq hawj mwngz lo.”

“A!” Lauheiq Maz lauxbanj cij dwg gangj guh riu, Lij Gozvwnz dingq le hix doeksaet lo. De gven diemq le, daiq Maz lauxbanj haeuj ranz bae, naeuz ranz de couhdwg yienghneix yienghneix, miz bouxlawz cuengqsim haq hawj de.

Maz lauxbanj naeuz de hix dwg boux vunz ndeu, seizneix songde dwg boux he noix geu vaq, boux ndeu ngah geu buh, de gangj vah dwg dietding dok, mbouj dwg rok daek raemx. Lij Gozvwnz dinghdingh cim Maz laux- banj, mbouj rox de gangj gij vah neix dwg caen roxnaeuz dwg gyaj.

Roek

guh baenz lo, ga roen neix sohlitlit, bingzcwtdwt, bien roen ndaem faex ndaem va, ndeiyawj dangqmaz. Haemh laep daengz, daeng ronghsagsag, ngoenzhwnz ci bae ci dauq.

Duenh seizgan neix, Lij Gozvwnz doemq ranz gaeuq bae lingh hwnj ranzlaeuz moq, aenvih dwg youq bien roen, ranz mbouj ndaej swhgeij naemj baenzlawz hwnj couh baenzde hwnj, baihgwnz miz doz daeuj, cij ndaej hwnj 6 caengz donh.

Roengz giek ranz ngoenzhaenx, Maz lauxbanj daeuj daengz ranz Lij Gozvwnz, naeuz de naemj bangbang Lij Gozvwnz, bang ngaenz bang rengz de cungj nyienh. Lij Gozvwnz dingq le, ngaekngaek gyaeuj, sim raeuj- subsub.

Ndaw mbanj ranzranz nyaengq guh ranzlaeuz moq, vunzhong haeuj- haeuj okok, Lij Gozvwnz youh aeu ganq seng’eiq, youh ganq guh ranz, caen miz di nyaengq mbouj gvaqdaeuj, lij ndei miz Maz lauxbanj bang de buet neix buet haenx, diuz rap gwnz mbaq de cij mbaeu di.

Haemh ndeu vunzhong sou hong dauqbae lo, Maz lauxbanj hix yaek dauqbae lo, Lij Gozvwnz gazngadngad doiq Maz lauxbanj naeuz:“Haemhneix mwngz gaej dauqbae ndaej mbouj ndaej, gou ra dieg ninz hawj mwngz couh ndaej.”

Maz lauxbanj naeuz:“Mwngz gangj caen roxnaeuz gangj gyaj a!”

“Gangj caen.” Lij Gozvwnz naeuz.

Haemhhaeux, Maz lauxbanj couh youq ranz Lij Gozvwnz gvaq hwnz. Neix dwg vah baezlaeng lo.

Miz vunz naeuz, Lij Gozvwnz caen miz fukheiq, de yaek haeujninz seiz cungj miz vunz soengq swiz daeuj hawj de demh gyaeuj. Lij Gozvwnz hix roxnyinh, geij bi neix daeuj, mbouj rox vih maz, haujlai baez de cungj bungz daengz saehndei.

Caet

Roen guh baenz, ranz guh baenz. Aen mbanj Lij Gozvwnz gaenq caeuq ndaw singz doxrangh baenz diuz gai ndeu.

Maz lauxbanj guhcawj youq ndaw ranz Lij Gozvwnz caiq hai aen diemq bihfaz ndeu dem, Lij Gozvwnz dang lauxbanj. Lij Gozvwnz naeuz:“Daengzcog danghnaeuz raeuz ganq mbouj gvaqdaeuj, song aen diemq couh gyonj guh aen ndeu ndaej lo.” Maz lauxbanj naeuz:“Ndaej, daengz seizhaenx mwngz gangj couh suenq.”

Lij Gozvwnz caeuq Maz lauxbanj yaek doxaeu lo, songde cingq dox- yaeng cingj mbouj cingj hek. Ngoenz ndeu, baihgwnz miz saw daeuj, naeuz daxboh Lij Gozvwnz yaek dauqranz lo. Aen siusik neix hung lai lo, Lij Gozvwnz ninz mbouj ndaek, daxmeh hix ninz mbouj ndaek, gyoengq vunzmbanj cungj ninz mbouj ndaek.

Daxboh Lij Gozvwnz heuhguh Lij Vwnzvaz, ndaej 28 bi seiz okrog bae guh seng’eiq, de daengz byongh roen couh deng vunz rag bae dang bing, doeklaeng gaen budui bae hoenx- ciengq, daj Guengjdoeng hoenx daengz Fuzgen caiq daengz Nanz- gingh, doeklaeng daengz Daizvanh le caiq hix dauq mbouj ndaej. De youq Daizvanh mbouj miz lwg yah, seizseiz cungj naemj dauq maranz, geij bi gonq miz cwngcwz hawj dauq lo, de youh baenz bingh dauq mbouj ndaej, ngoenzneix de dauqdaej ndaej lumj mbawfaex loenq dauq goek lo.

Gvaq geij ngoenz, geij aen ci hai daengz naj ranz Lij Gozvwnz, geij bouxcoz fuz goenglaux ndeu roengz ci daeuj, Lij Gozvwnz byaij gvaqbae song boux doxgot daejsoebsoeb. Lij Vwnzvaz byaij haeuj ranz bae, gotdawz daxmeh Lij Gozvwnz, sing saenzdidi naeuz:“Doiq mbouj hwnj mwngz lo.” Daxmeh dingqnyi vah daxboh, riu naeuz:“Mwngz dauq le couh ndei, mwngz dauq le couh ndei.”

Lij Vwnzvaz cuengq hai Daxmeh, boux ndeu byaij ok bakdou bae, song da dinghdingh yawj coh seiqhenz, de aiq dwg naemj ra aen mbanj gaxgonq de ba! Doeklaeng de gag gangj gag naeuz:“Bienqvaq mbwk lai lo, bienqvaq mbwk lai lo, guekcoj caen ak, guekcoj caen gyaeundei a!”

（sat）