“Daengz Bingzgoj, ganj hawfwen, eu fwenleux, dingq yinhyoz!” Youq Guengjsae, gij fungsug hawfwen Bouxcuengh Bingzgoj Yen ce ndaej ceiq caezcienz. Bouxcuengh dieg haenx “yawj fwen lumj mingh, fouz fwen couh lumj ndawranz fouz miz youz gyu”. Daengx yienh gungh miz 20 lai aen hawfwen, ndawde Hawmoz、Hawyeh Daibingz Cin, Byamehnangz Majdouz Cin daengj banh ndaej haemq hoengh haemq nauhyied.

Hawfwen Bouxcuengh Bingzgoj lizsij gyaenanz, giekdaej gwnzbiengz cix naekna. Ciuhgeq Bouxcuengh liglaiz maij eu fwen, gyoengqde aeu fwen ma geiqcienz lizsij, cienzson gingniemh guh ndaem ciengx gvaq ndwenngoenz. Hawfwen daj gij cunghgyau hozdung ciuhnduj daeuj, nanz le couh baenz gvenq lo. Ciuq laizyouz ma baen, hawfwen Bingzgoj aiq ndaej baen guh sam cungj.

It dwg mbaenjgouz. Lumjbaenz hawfwen Hawmoz. Cienzgangj aengamj Hawmoz miz ndaek rin ndeu gig lumj duzmoz, liggaeuq ndwensam coseiq, vunzlai couh bae baihnaj duzmozrin guh cai, gouz goengmbwn doek fwn, danghnaeuz duzmozrin miz singciuz, bide couh rumz dingh fwn yinz. Guh cai sat le lij banh hozdung ciengj bauqva、eu fwenleux daengj.

Ngeih dwg guh’angq caeuq ra youx, lumj hawfwen Byamehnangz. Cienznaeuz dahsien Mehnangz miz song dah lwgmbwk gaenxguh、gyaeundei youh gig rox eu fwen. Liggaeuq ndwencaet, maknim gwnz ndoi baenz mbaet lo, song cejnuengx couh hwnj ndoi bae, itmienh mbaet mak itmienh eu fwen. Singfwen cienz bae gig gyae, bouxcoz mbanj henzgyawj dingqnyi le couh youq ngoenz liggaeuq ndwencaet cibseiq hwnj ndoi bae caeuq songde doiqfwen, eu le sam ngoenz sam hwnz sawhingz cungj mbouj dingh. Caezgya cungj fug songde, hoeng cix nyinhsaw. Ndwencieng youh daeuj caeuq songde doiqfwen, daj ndwencieng coit doiq daengz cosam caemh faen mbouj ok sawhingz. Byamehnangz bi banh song baez hawfwen couh baenz gvenq lo, bienqbaenz giz bouxcoz dangdieg guhcaemz ra youx.

Sam dwg geiqniemh. Lumj Byamehnangz lij lingh miz aen cienznaeuz ndeu. Riuzgangj, dahsau Mehnangz caeuq daegmbauq Sam’ouj Lungzanh guhyoux, ngoenz liggaeuq ndwen- caet cibseiq songde baenzgya, mboujliuh Byavaz bouxvunzrwix neix bae ciengj yah. Doeklaeng, Byavaz deng raemj gyaeuj, gyaeuj de bienqbaenz ndaek bya iq ndeu, Sam’ouj caemh deng Byavaz raemj gyaeuj, gyaeuj de deng dik daengz doiqhamq Dahyougyangh bae. Mehnangz raen neix couh bienqbaenz ndaek bya dog, henhoh youq gizde. Haenx couhdwg Byamehnangz seizneix, eiqsei dwg goengq byabawx. Mehnangz doiq cingzgyaez giendingh mbouj bienq, gyoengqvunz vih geiqniemh de couh youq dinbya Byameh- nangz laeb daiz cuengqcaeq, doeklaeng youh bienqbaenz hawfwen, cienz nanz le couh baenz gvenq lo.

Hawfwen Bouxcuengh Bingzgoj caeuq gizyawz hawfwen Guengjsae gak dieg ityiengh, ciepcienz hwngfat caeuq gyoebcomz langhbaij le cienzdoengj vwnzva minzcuz. Vih le haivat vwnzva hawfwen, fatyiengz cienzdoengj minz- cuz, Bingzgoj Yen daj bi 2008 hainduj banh cietyinhyoz hawfwen Bouxcuengh. Lumj bi 2010, cietyinhyoz miz fwenleux cienzdoengj、fwenleux moq、doiqfwen、lwgnyez habciengq daengj, lij langhbaij le gij minzsug naengj haeuxnaengj、dub gyaeq dazsaek、baenzgya daengj; bi 2011 cix miz fouxnyenz Yauzcuz Denzlinz、Fwengujmeij Denzyangz、Heiq- cuengh Nazlauz Sihlinz、fwen Bouxgun Lingzyinz、Hahleux yozdui ciengq go daengj, neiyungz yiengh lai yinxvunz.

Seizneix, hawfwen Bouxcuengh Bingzgoj gaenq bienqbaenz dangdieg aen binjbaiz vwnzva miz daegsaek Bouxcuengh. Fwenleux cix yungz haeuj saedceij gyoengqvunz bae, ciengq ok vunzlai maqmuengh ndwenngoenz gvaq ndaej ndei.