It

Lij Gozvwnz guh fangzhwnz hix siengj mbouj daengz, diuz roen hung ndeu coih gvaq doiqnaj ranz de. Diuz roen neix daj ndaw singz guh daeuj, gvangq miz 6 diuz roen ci.

Lij Gozvwnz fuz daxmeh daengz bakdou, daxmeh dafangz, yawj mbouj raen maz, de couh naeuz:“Meh, miz diuz roen gvaq bakdou ranz raeuz lo, baezneix bae haw fuengbienh lo.”

“Dang dang dang” gij sing gouh- gih vat namh caeuq con rin yiengj dwk, daxmeh song rwz ndaejnyi, naj hai riu naeuz:“Roen doeng couh ndei lo, roen doeng couh ndei lo.”

“Caj roen doeng le, gou daiq mwngz bae haw youzyouz. Gangj mbouj dingh, roen doeng le, daxboh gou couh dauq lo.” Lij Gozvwnz roxnyinh gangj hix mbouj miz yungh, couhdwg caen daiq daxmeh bae youz lo, daxmeh hix yawj mbouj raen maz. Danghnaeuz daxboh lij lix youq, baenzlawz hix mbouj rox baenz nanz mbouj dauqma.

Daxmeh mbouj sing mbouj swt, song da dinghdingh muengh coh gizgyae. Daxmeh ndaej 80 bi lo, byoemgyaeuj hau lumj ndaij, naeng naj nyaeuq lumj gvehaemz, din fwngz roz lumj nyefaex sauj nei. Lij ndei, ndang lij cangq, ndaej lix daengz ngoenzneix, suenq de miz fukheiq lo.

Daxmeh cam Lij Gozvwnz:“Vunz guh roen gvaqdaeuj, aen ranz raeuz mbouj deng doemq ba?” Lij Gozvwnz naeuz:“Mbouj deng doemq, roen gaenq rau ndei, vunz gaenq hai hong lo, baenzlawz hix doemq mbouj daengz ranz raeuz.”

Daxmeh couh lau doemq ranz, engq lau senj ranz, de naeuz miz aen ranz neix, daxboh dauq le cij ra ndaej raen.

Ndit ciuq daengz bakdou daeuj lo, Lij Gozvwnz fuz daxmeh dauq ndawranz, daek ngaiz daengz gwnz daiz, heuh daxmeh gwn ngaiz. Caeuzcaeuz ngaizngaiz, song mehlwg neix couh yienghneix guhdoih gwn, gvaq le geijcib bi.

Daxboh guh seng’eiq, Lij Goz- vwnz doekseng bihaenx, de okbae couh caiq mbouj dauqranz gvaq, daxmeh muengh daengz ndaej 50 bi seiz, song da couh yawj mbouj raen roen lo.

Aen mbanj Lij Gozvwnz liz yienhsing song leix gyae, ndawranz couh de boux ndeu guh reihnaz, ndaejhoengq couh bae yienhsingz guh di honglingz, souhaeuj noix, gyaranz hoj, baebae dauqdauq, de hix ndaej 50 bi lajdin lo, caengz aeu ndaej baz. Daxmeh youq mbouj onj, de hix mbouj rox baenzlawz guh cij ndei.

Ngeih

Daxmeh gwn imq le, Lij Gozvwnz sou duix dawh yaek bae swiq. Miz sam bouxsai daeuj daengz bakdou, cam naeuz miz mbouj miz vunz youq ranz.

“Gou youq ranz ni.” Lij Gozvwnz cuengq roengz duix dawh, daeuj daengz bakdou, cam miz maz saeh. Bouxsai ndeu naeuz:“Dou naemj co aen ranz mwngz guh ranzcoihci, mwngz co mbouj co? Danghnaeuz co, bi he aeu geijlai ngaenzco?”

Lij Gozvwnz riuriu, de baenzneix hung, naemj hix caengz naemj gvaq miz ngoenz ndeu miz vunz daeuj ra de co ranz.

Aen mbanj Lij Gozvwnz miz 40 geij hoh, ranzranz hwnj ranzlaeuz, couh ngamq aen ranz de lij dwg ranzvax. Baihgwnz guh roen gvaq doiqnaj mbanj daeuj le, miz mbangj vunz daengx aen ranz cungj deng doemq bae, miz mbangj ranz deng doemq bae buenq, couh ngamq ranz Lij Gozvwnz mbouj deng doemq.

Aen ranz de miz song gan, gan he faen guh song aen rugninz, de ninz rug baihrog, daxmeh ninz rug baihndaw. Gan he hix faen guh song, baihrog dwg ranzding, bingzseiz miz vunz daeuj gangjgangj goj, baihndaw dwg ranz- dajcawj caeuq ranzgwnhaeux, doiqnaj ranz miz benq dieg hoengq ndeu, bingzseiz aeu daeuj dakdak haeux, dakdak ndangdaenj.

Lij Gozvwnz naeuz:“Co ranz hawj sou le, dou mehlwg bae gyawz youq?”

Geij bouxhek dingq le cungj riuriu, miz bouxhek he naeuz:“Dou couh co gan ranz ndeu cang doxgaiq, co aen dieg hoengq neix guh dieg coih ci, dou gag dap diengz.”

Lingh bouxhek naeuz:“Dou gyau ngaenzco hawj mwngz le, mwngz couh ndaej rom ngaenz guh ranzlaeuz lo, lau mbouj miz ranz youq, mwngz gaej miz ngaenz mbouj rox aeu ha.”

“Hix deng bo!” Lij Gozvwnz dingq bouxhek baenzneix gangj, miz di simdoengh lo, hoeng gangj lauxsaed, de caen mbouj rox bi he aeu geijlai ngaenzco.

Bouxhek ndeu raen Lij Gozvwnz mbouj gamj roengz gietdingh couh naeuz:“Yienghneix ba, dou bi he hawj 25000 maenz ngaenz hawj mwngz, couh co mwngz gan ranz ndeu caeuq aeu dieg hoengq neix. Mwngz naemj- naemj gonq, gvaq song ngoenz dem dou caiq gvaqdaeuj, danghnaeuz baenz, dou couh gyau ngaenz hawj mwngz.”

Lij Gozvwnz ndwn youq bak hongh, da yawj geij bouxhek dauqbae, ndawsim miz di luenh, mbouj rox guh baenzlawz ndei.

Lij Gozvwnz vunz sang mij roek, naj seiqcingq, noh ndaemndat, naeuz de baenz siengq hix mboujsuenq baenz siengq, naeuz de yak siengq hix mboujsuenq yak siengq. De ien mbouj cit laeuj mbouj gwn, mbouj miz geijlai boux baengzyoux, gyoengq doengzdoih aeu yah baenzranz le, de engq mbouj caeuq geijlai boux doxvaij lo, aiq dwg yienghneix, seizneix lij caengz miz baz, mbouj miz maz geizheih lo.

Seizneix vunz naeuz daeuj co aen ranz de, de couh lumj guh fangzhwnz nei, de baenzneix laux lij caengz raen gvaq baenzlai ngaenz, seizneix de baez dapwngq ngaenz couh daengz fwngz lo. “Dauqdaej dwg bouxsien lawz soengq gij saehndei neix daeuj a, co ranz song sam bi gou couh miz ngaenz lo, gou aeu ndeindei naemjnaemj, gij ngaenz neix baenzlawz yungh.” Lij Gozvwnz naemj dwk.

Sam

Seizgonq guh roen aeu miz vunz cien vunz fanh daeuj buen namh daeh rin, seizneix cibgeij aen gouhgih caeuq geij aen cidoinamh, geij ngoenz seizgan, roen couh guh ndaej bingzcwtcwt. Ciepdaeuj haiheij rwed rinsoiq, bu suijniz, doiqnaj ranz Lij Gozvwnz bienq ndaej moqsaksak.

Gyoengqvunz co ranz guh ranzcoihci daeuj hai hong lo, ci hung ci iq ngoenzngoenz hai haeuj hai ok nauhyied swdswd. Lij Gozvwnz ndaejhoengq couh dawz gij bienqvaq bakdou ranz lwnh hawj daxmeh nyi, daxmeh naj hairiu lo. De ciengzciengz boux he mbouj sing mbouj swt naengh youq bakdou ranz, aen naj geq de cienq ok baihrog bae, nanznanz mbouj senj ndang.

Mizseiz Lij Gozvwnz hix naemj daengz, daxmeh aiq dwg naemj daxboh lo, daxboh lix mbouj raen vunz dai mbouj raen goek, baenzlawz hawj vunz mbouj naemj. Daxboh nuengx daxmeh song bi, de lij lix youq gwnzbiengz, seizneix hix ndaej 78 bi lo. Lij Gozvwnz mbouj rox baenzlawz nai daxmeh, de cijndei ngoenzngoenz dawz saehndei lwnh hawj daxmeh, muengh de dingq le simhai di.

Miz roen doeng, ndoeng bienq gim, Lij Gozvwnz rox, danghnaeuz naj ranz de mbouj coih ga roen neix, vunz hix mbouj daeuj co aen ranz de. Ndwenngoenz bienqvaq vaiq, yienh- saed bienqvaq hix vaiq , aen sim Lij Gozvwnz hix foepfep mbouj dingz lo, de haemh haeuj ninz couh gag naemj:“Vunz de dwg maz vunz, baenzlawz couh rox naemj daengz aeu daeuj gizneix co ranz coih ci ni? Gou hix dwg vunz, ngoenz gwn imq le couh rox bae guhhong, guhhong dauq le couh gwn, gwn imq le couh ninz, vihmaz mbouj rox naemj daengz baenzlawz bae conz ngaenz ni?”

Haujlai baez, Lij Gozvwnz boux dog youq najcueng mwnhswdswd ndwn muengh ok baihrog bae. Giz- gyawj, ga roen doiqnaj ranz couh yaek guh baenz lo, gaenq miz lohdaeng rongh lo, boux daeuj youzbyaij haemh beij haemh lai. Gizgyae, roen baih- haenx vunz cingq guh ranzlaeuz, laeuz moq geijcib aen, aen geijcib caengz, gizneix mbouj geijlai nanz couh baenz haw lo.

Miz haemh he, Lij Gozvwnz youh naemj daengz aen mbanj de, dingq- naeuz aen mbanj de hix yaek gai dieg hawj lauxbanj daeuj haifat le, cwngfuj youq bienroen hwnj boux gan ranz hawj gyoengq vunzmbanj, mbouj geijlai nanz, gij vunz mbanj de baenz vunz gwnz haw lo, de hix baenz vunz gwnz haw lo. Vunz gwnz haw guh maz, vunz gwnz haw couhdwg aeu guh gaicawx, Lij Gozvwnz naemj daengz neix, de gietdingh hai aen diemq guh gaicawx.

Seiq

Lij Gozvwnz couh youq bien ranzcoihci hai diemq, gai ien、gai raemx、gai laeuj. Gizneix ngamq doeng roen moq, caengz miz vunz hai diemq. Hainduj Lij Gozvwnz ngoenz canh bak maenz geijcib, mbouj geij nanz couh ngoenz canh geij bak maenz. De mbouj lumz dawz gij saeh’angq neix lwnh hawj daxmeh nyi, hawj de rox daengz seizneix ndawranz gwndaenj mbouj you lo.

Gyoengq boux daeuj coih ci, dawz ci hai haeuj diengz bae coih le, gyaez daengz ndaw diemq Lij Gozvwnz daeuj naengh, cawxcawx raemx gaij hozhawq, cawxcawx ien gaij mbwq, swnhbienh caeuq de gangjgoj guhriu.

（caengz sat）