Daihcib’it Aulungzgveiz Gangj Goj (Daihseiq)

Lungz Byauh daj gwnz bya byaij roengzdaeuj daengz ranz seiz, gij ga gawh ndaej lumj gamou nei, byangj- bywtbywt, hawj de ceng mbouj geijlai yo mbouj hwnj din. Daxmeh de gip ndaej dauqcawq cam vunz, lienzhwnz dawz daengloengz bae ra loek ywdoj, youq ndaw rum iq ndeu daem yungz song sam cungj go’nywj, oep youq gij baksieng de, lij cawx le yienglab, daengz miuhsaenzvangz bae siuyieng, gouz duzyou baujyouh.

Gizsaed mbouj aeu duzyou bauj- youh, Siu Cuh couhdwg duzyou, danghnaeuz mbouj miz Siu Cuh, daxmeh de gaenq mbouj ndaej raen de lo.

“Meh!” Ngoenz daihngeih, de ninz youq gwnz congz, caiq hix mbaet mbouj ndaej gij vah ndawsim lo, “Danghnaeuz mbouj dwg boux dahsau haenx bang gou sup lweddoeg okdaeuj, gou gaenq dai lo!”

“Ha! De caen dwg boux vunzaen ranz dou, dahsau haenx dwg ranz lawz, hawj gou daiq di laex bae gyo’mbaiq de.”

“Meh——” Lungz Byauh ngauz gyaeuj, “Gou mbouj gangj, caj ga gou ndei le caiq gangj ba.”

“Mbouj baenz, itdingh aeu gyo- mbaiq de, miz aencingz mbouj bauq- dap, baenzlawz baenz?”

“Meh, mwngz gaej gip ma!” Lungz Byauh rag fwngz daxmeh de, sing iq gangj, “Aeu gyo’mbaiq hix mbouj aeu mwngz bae.”

“Yienghneix couh mbouj miz caensim lo, mbouj ndaej mbouj ndaej, gou itdingh aeu caenndang daengz ranz de bae gyo’mbaiq de.”

“Camhseiz gaej gangj baenzlai baenz mbouj baenz? Dahsau haenx mbouj vih saek yiengh bang gou sup lweddoeg, gij saeh neix cienz okbae mbouj ndei, daj gizndei bae ngeix dwg de simsienh, danghnaeuz daj gizrwix bae siengj ne——”

“Ai! Deng o, de boux dahsau he……”

“Ndigah gou naeuz daxmeh ha, yaek gyo’mbaiq, ceiq ndei dwg cingj Buzsimjsam bang dou bae ba!”

“Ra Buzsimjsam——?” Daxmeh de nyengh baez ndeu, sawqmwh singj gvaqdaeuj, bekbek gwnz mbaq daeg- lwg, riunyumnyum naeuz:“Ha! Lwg,