Moix bi seizcin, gij Yizhoengz Nazboh Yen cungj aeu banh aen yizsiz gouz fwn, mbaenjgouz bineix fwn yinz rumz dingh. Yizhoengz cawj- daeuz youq laeng Baksengj Yangh Mbanj- mienhliengz aen yienh neix, gij cietgouzfwn neix gyoengqde gaenq cienz le cienbak bi lo. Cietgouzfwn mbouj miz ngoenz dingh ndei ndeu, moix bi liggaeuq ndwensam ndawnyieb, aeu diengan deihcei ma suenq, bungq daengz ngoenzduzlungz couh youq ngoenzde banh yizsiz bae gouzfwn.

Cienznaeuz, cojgoeng Yizhoengz mwh senjdieg gig boihseiz, youq buenq roen roeb daengz raemxrongz, seizde rumz haenq fwn hung, raemxlaux dumhmued. Doiq beixnuengx ndeu youq ndaw raemx duengh dawz aen lwggyoh hungloet ndeu, mbon congh le couh ndonj haeuj ndaw lwggyoh bae ndoj nanh. Lwggyoh deng raemxlaux dongj bae dongj dauq, fouz le caet caet seiqcib gouj ngoenz, doeklaeng couh deng gorungz hung loh youq gwn raemx haenx gaz daengz lo. Yienghneix, song beixnuengx neix doq daj ndaw lwggyoh ndonj okdaeuj doq benz hwnj gorungz bae. Raemx- rongz doiq le, songde daj gwnz sang muengh ok seiqlengq bae, caenh raen dauqcawq fwz- ngaungau. Gyoengqde fatyienh gwnzbiengz caenh lw songde lo, sim cieg yaek dai. Doeklaeng songde cijndei baenzgya seng lwg, ciengx lwg majhung. Daj neix, vunz Yizhoengz couh dawz gorungz dangguh aenvunz gouqmingh, youh dawz gorungz yawj guh bouxsaenz ma buiz, bouxlawz cungj mbouj ndaej sienghaih gorungz, mbouj ndaej benz hwnj gwnzde bae guhcaemz. Laj gorungz lij laeb miuh dem, moix bi ndwencieng coit daengz co’ ngux cungj aeu bae cuengqcaeq. Bi ndeu ndwensam, mbwn rengxraurau, bouxvunz caeuq doenghduz cungj mbouj miz raemx gwn, doenghgo cix roz liux. Vunz Yizhoengz couh genj ngoenzduzlungz, doxcomz youq laj gorungz eu fwen diuq foux bae caeqbaiq, gouz goengmbwn doekfwn, gouq vunz gouq nanh. Aenvih gyoengqvunz maqmuengh ndwenngoenz gvaq ndaej ndei, ndigah ciet- gouzfwn couh cienz daengz seizneix.

Mwh yaek gouz fwn, aeu gaj ma gaj mou caeq goengdojdeih gonq, caiq gaj vaiz bae caeq diegdauh. Youq gak aen bakroen seiqhenz mbanj dong di nyezfaex ndip, gaj vaiz le couh aeu lwedvaiz rwed haeuj gwnz nyezfaex ndip bae, neix heuhguh “fung roen”. Bouxmbauq cix daegdingq veh naj yakyawj, fwngz gaem faexmbaengq roengzrengz roq gwnznamh hatoo, daj baihdoeng buet coh baihsae, itcig buet daengz rog mbanj. Buet gvaq ranz lawz, ranz neix couh aeu youq bakranz cit bauq, yienghneix cij ndaej bangx deuz iucing iugvaiq. Gaendwk youh baij doxgaiq dajbuiz, canghmo doegciengq sawging, dauqngeix gij lizsij haemzhoj Yizcuz senjdieg, gyo’mbaiq goengdwk cojgoeng, gouz goengmbwn miz fwn, nyinh reihnaz, baujyouh doengh gohaeux sou ndaej lai, doenghduz ciengx haenx maj ndaej baenz.

Dajcaeq liux le, vunzlai ndang daenj buhvaq cienzdoengj, doxcomz youq laj gorungz. Goeng laux ndeu ndaek song aen nyenz, aen hung aen iq, aen “boux” aen “meh”. Daengx mbanj bouxlaux lwgnyez bouxsai mehmbwk humx guh gvaengx hung ndeu. Daegmbauq ndeu cix ndwn youq cungqgyang boq siufaexcuk. Gyoengqvunz couh riengz gij sing nyenz sing siu diuq foux. Baenz dauq fouxgouzfwn gungh miz 12 aen dungcoz, eiqsei dwg naeuz hamj gvaq cibngeih aen doumbwn bae daengz diengoeng cam Yivuengz gouz fwn. Ndaek nyenz caemh miz 12 cungj banj, seizlawz diuq yamqfoux lawz cungj dwg baengh sing nyenz ceijbaij. Ngoenzciet, Bouxcuengh、Bouxmyauz、Bouxyauz ndaw yienh caemh daenj buhvaq minzcuz bae camgya cietgoufwn. Lumjbaenz aen doihvwnzyi Bouxcuengh Mbanjbakduh、aen doihvwnzyi Yizhau Mbanjdazlab daengj, yinx le haujlai hekyouz bae ngonzyawj.

Bi 2015, Cietgouzfwn Yizcuz Nazboh Yen ndaej senj haeuj buek daihhaj swcigih gaep feihyiz mingzloeg.