Ngoenzbonz ngamq doek fwn hung, haetneix ndit ronghsagsag, gyuemluemz daengx aen singz, lumj hawj aen singz bu hwnj caengz saek henjgim ndongqmyanmyan he. Mbwn lamz fwj hau gvengqyauyau, bien daihloh, faex heuauau va hai hoengh- fwgfwg, hawj vunz byaij youq gwnz roen sim sangj raixcaix.

Gwnz gai ci bae vunz dauq nauhyied dangqmaz, diuz gai song mbiengj baenz baiz baenz baiz ranzlaeuz moqsaksak、sangvidvid, gij bouq gai doxgaiq lai cungj lai yiengh aen dep aen, hawj vunz yawj ndaej daraiz gyaeuj luenh bae.

Daeghan byaij youq gwnz gai, de seiz mbouj seiz gaemh soujgih ingj dangqnaj gij gingjsieng hwngvuengh neix, seizneix de caen maqmuengh aen ngaeuzingj ngoenz naemj hwnz muengh couh youq baihnaj……

Daeghan ndaejgeiq, 6 bi gax- gonq, benq dieg neix dwg benq ndoi fwz he, gwnz ndoi faexcoengz mwn- cupcup, ndaetfwdfwd, lij maj miz gogut gohaz, caeuq haujlai go maknim. Seizcin, va gonim hai ndaej rim ndoi rim baq seiz, Daeghan caeuq Dahsez ciengz daeuj neix guhcaemz, songde doxgyaep guh’angq, angq- yangz dangqmaz. Seizhah maknim cug le, rang doh ndoi seiz, songde youh doxiu daeuj gizneix mbaet maknim, gwn mbouj sat, lij dawz maranz cimqlaeuj dem.

Seizneix haifat benq ndoi neix lo, gizgiz dwg laeuz sang loh moq, gaxgonq song aen ngaeuz mbouj doxliz haenx hix mbouj raen lo……

Daeghan gwq naemj gij saeh- gaeuq neix, sawqmwh, roxnyinh lajdin lumj caij deng maz doxgaiq raeuz- radrad, de siengj suk din dauq, hoeng gaenq mbouj gib lo. De saemxsaemx saxsax doiq dauqlaeng geij yamq, cadi couh laemx roengz gwnznamh bae. Aen soujgih ndaw fwngz hix sinz bae geij mij gyae, de ndwn dingh le muengz bae gip soujgih, raen dwg gaiq naeng gvehoengz ndeu hawj de yaek laemx.

“Ha ha ha, daeggo neix, byawz heuh mwngz byaij loh mbouj siujsim ne? Lwgda cij goq muengh lwgsau luba.”Daeghan cingq hoznyap, dingq- nyi aen sing sug he cienz daeuj, de nyengh lo, ngiengxgyaeuj baez yawj, simdaeuz cungj yaek diuq okdaeuj lo.

“Dahsez!”Daeghan sing hung hemq naeuz.

Dahsau gyaeugigi、daengx ndang reuxredred ndwn youq bakdou aen bouq gai buh, song da maezfwd muenghyawj Daeghan, mbouj guhsing lo.

“Dahsez, mwngz mbouj geiq ndaej gou luma?” Daeghan byaij bae gaenh dahsau, naj hoengzgyoeng- gyoeng cam.

“Daeghan, mwngz dwg Daeg- han!”Dahsau ngenggyaeuj naemj yaep ndeu le, ciepdwk hix angq hemq hwnjdaeuj.

Song boux doq gangj doq daeuj daengz ndaw diemq gwn caz. Daeghan naeuz:“Dahsez, 6 bi mbouj raen, mwngz di he hix mbouj bienq, lij gyaeundei lumj gaxgonq.”

“Daeghan, 6 bi neix daeuj gou hix mbouj rox gij saeh mwngz saekdi, gou youq neix hai aen bouq gai buh neix, lij suenq gvaq ndaej bae.” Dahsez roxnyinh ndaw da miz di dumz, aen sim miz di in.

“Seizneix baihgwnz daengz laj- mbanj bangfuz, gou baezneix dwg daeuj ndaw singz aen singgeiz ndeu hag baenzlawz dajciengx, ngoenzcog couh yaek dauqbae lo, ngoenzneix okdaeuj youzyouz, caemhcaiq naemj rara mwngz, mbouj ngeix youq neix raen lo.” Daeghan riuriu naeuz.

6 bi gonq, Daeghan daeuj ndaw singz guhhong caeuq Dahsez roxnaj, song boux gig miz cingzeiq. Daxboh Daeghan ga’gvez, guh mbouj ndaej hong naek, couh baengh daxmeh sinhoj ciengx de caeuq song dah- nuengx, ndawranz hojndoq, Daeghan mbouj ndaej doeg geijlai saw couh okdaeuj guhhong lo. Daeghan lij coz caengz roxsoq, de youq gizneix guh song sam ngoenz, gizhaenx guh cib ngoenz buenq ndwen, gwn can gwnz, you donq laj, ndaw daeh ciengz byouqbyangbyang, faen cienz he gvaq haemh cungj mbouj miz.

Daeghan gyaez daenj geu buh mbouj miz genbuh ndeu, loh ok song diuz gen cangqcwtcwt, lij byaengq aen aek lohlanglang, dawz aen gizdah ndeu doq danz doq ciengq go, de sim fouzfangfang, cungj mbouj roengzsim guhhong, mizseiz bae Yinznanz geij ndwen, mizseiz bae Sihcang geij ngoenz, baebae dauqdauq mbouj raen saek faen ngaenz cixbah, lij yiemq haujlai caiq dem.

Bohmeh Dahsez youq ndaw singz guh seng’eiq, gyoengqde rox yaek ra ndaej ngaenz, couh aeu gwn ndaej hoj, Daeghan yienghneix ngoenz guh sam ngoenz gwn, gyoengqde yawj mbouj hwnj da, dailix mbouj doengz’eiq Dahsez caeuq de youq giz ndeu, naeuz:“Daegcoz neix laengzlaengz saengj- saengj, ciuhvunz nanz guh ndaej saeh, gou caeuq meh mwngz cij miz mwngz dahlwg dog neix, danghnaeuz mwngz laemxsim gaen de, ciuhneix gaej siengj yamqdin haeuj aen ranz neix lo.”

Haidaeuz Dahsez mbouj dingq, lij ciuqgaeuq caeuq Daeghan doxndei. Daxboh Dahsez couh heuh meh Dah- sez aeu dai daeuj bik Dahsez, meh Dahsez naeuz:“Daegmbauq neix saw mbouj doeg, hong mbouj guh, gou caeuq boh mwngz mbouj nyienh raen mwngz daengzcog dwgrengz sinhoj, danghnaeuz mwngz gvaq mbouj ndei, gou nyienh goenq saihoz dai bae lo.”

Baez ndeu, boh Dahsez ra daengz Daeghan, haenqnaj doiq Daeghan naeuz:“Danghnaeuz siengj caeuq dah- lwg gou doxaeu, mwngz aeu bwh miz 10 fanh maenz ngaenzlaex cij ndaej, noix faen ndeu cungj mbouj baenz!” Gangj sat baenqndang yamq hung byaij bae lo.

Muengh dwk daxboh Dahsez, Daeghan miz di doeksaet, de ngaem- gyaeuj naemj: Dwg ha, boux vunz he ranz hoj youh gik hong, guh bohmeh byawz nyienh dahlwg cihgeij bae caeuq duz vunz neix gvaqngoenz gwn hoj ne?

Caeuq Dahsez doxbiek le, Daeg- han mbouj caiq youz bae cet dauq, de dauq daengz ranzmbanj, ngaemgyaeuj guh saeh.

Lajmbanj bya lai ndoi lai, gwnz bya gwnz ndoi dauqcawq dwg nywj oiq, Daeghan gietdingh ciengx cwz, ndaw ranz de gaenq miz song duz cwzmeh, de caiq bae cawx daeuj song duz cwzmeh dem, de ngoenz- ngoenz langh geij duz cwzmeh hwnj bya bae gwn nywj, gag naemj: Caiq gvaq sam haj bi, gij cwz gou roengz cwzlwg lai le, mbouj saenq gou mbouj miz ngaenz.

Bilaeng, guekgya bangfuz cwng- cwz daengz lajmbanj, ranz Daeghan dwg ranz gungzhoj, ndaej baihgwnz bangfuz, cwngfuj hawj de soengq daeuj 5 duz cwzmeh, muengh de ndeindei ciengx cwz, vaiqdi duetgungz baenzmiz.

Daeghan engq yawjraen maq- muengh lo, de bau gij reih ndaw mbanj ndaem go’nywj, ngoenzngoenz haeujsim bae dajleix gij saeh ciengx cwz ciengx vaiz, haet ok haemh haeuj nyaengqnyaennyaen.

Miz mbangj cwzmeh roengzlwg lo, hong lai nyaengq mbouj gvaqdaeuj, Daeghan couh cingj gyoengq vunz- mbanj daeuj bang guhhong. Ngaenz- hong hix mbouj sai geijlai, caemhcaiq vunzmbanj mbouj yungh bae gizgyae dajgoeng couh miz ngaenz coq daeh, bouxboux nyienh guh, lij riuhoho haenh de coengmingz rox gwn rox suenq. Miz vunz couh eufwen:

“Daeghan ukgyaeuj lingz,

Coengmingz gvaq vunzlai,

Ndaem nywj ciengx cwz vaiz,

Daiq vunzlai fatcaiz.”

Geij bi roengzdaeuj, Daeghan miz souhaeuj lo, de youq diegcoj guh ndaej aen ranzlaeuz moq 3 caengz buenq ndeu, youq ndaw singz cawx ndaej dauq ranz ndeu, hix miz ciiq hai lo. Seizneix de suenq dwg yienghyiengh miz caez, couh ienq ra mbouj raen Dahsez.

Baezneix youq ndaw singz caeuq Dahsez doxbungz, Daeghan cij rox, Dahsez hix dwg boux ndeu gvaq ndwenngoenz ndwi. Bohmeh Dahsez coi de haq vunz, Dahsez naeuz, gaej yungh gip lai, lwgsau haq vunz aeu cengq lwgda hung yawj cingcuj, mboujnex ciuhvunz ienqhoij mbouj gib. Bohmeh Dahsez dingq dahlwg baenzneix gangj, caenh bi gyaeuj danqheiq.

Daeghan gaemh ndaet fwngz Dahsez naeuz:“Dahsez, mbatneix, gou caiq hix mbouj siengj caeuq mwngz doxbiek lo.”

Dahsez loq miz di najnyaenq naeuz:“Gou laihnaeuz mwngz gaenq lumz gou bae lo, laihnaeuz seiq neix caiq hix ra mbouj raen mwngz lo.”

Daeghan eufwen:

“Gaxgonq gou hoj lai,

Sim maij mbouj ndaej aeu,

Seizneix gou baenz fouq,

Caen sim daeuj ra nuengx.”

Dahsez eufwen hoiz:

“Byaleix youq gyang haij,

Naihhoz mbouj ndaej aeu,

Go miz sim gvaqdaeuj,

Nuengx lij youq gizneix.”

Raen gvaq Dahsez le, Daeghan sim gig hai, ngoenzngoenz fwen rim bak:

“Dangj lumj bohmeh raeuz,

Yienghyiengh dawz haeujsim,

Van haemz guhdoih cimz,

Laemxsim aeu bienq yiengh.

Bangfuz daengz lajmbanj,

Ranzranz ndaej duetgungz,

Boux ndaw singz ndaw rungh

Vuenyungz gvaq saedceij.”